លោក កែម រិទ្ធិសិត ដែលជាប្អូនប្រុសរបស់លោក កែម ឡី បានប្រកាសលាលែងពីតំណែង ប្រធានគណបក្សខ្មែរតែមួយ ដោយផ្ទេរសិទ្ធិទាំងស្រុងទៅឱ្យលោក គុជ លី ធ្វើជាប្រធាន ស្តីទីជំនួសវិញ។
លោក កែម រិទ្ធសិត បានចុះហត្ថលេខានៅក្នុងលិខិតផ្ទេរសិទ្ធិរបស់គណបក្សខ្មែរតែមួយ កាលពី ថ្ងៃទី១៥ខែធ្នូ ឆ្នាំ២០២០។ លោកបានលើកឡើងក្នុងលិខិតនោះថាមូលហេតុនៃការលាលែង របស់លោកគឺធ្វើឡើងដើម្បីប្រជាធិបតេយ្យផ្ទៃក្នុងគណបក្ស។ លោកក៏បានសម្រេចចិត្តផងដែរថាលោកនឹងមិនឈរឈ្មោះធ្វើជាបេក្ខភាពប្រធានគណបក្សខ្មែរតែមួយនៅអាណត្តិក្រោយទៀតនោះទេ។
តាមលិខិតនោះ លោក រិទ្ធិសិត បានផ្ទេរសិទ្ធិទាំងស្រុងទៅឱ្យលោក គុជ លី ក្នុងការចុះហត្ថលេខាលើលិខិតរដ្ឋបាលនានារបស់គណបក្ស ក៏ដូចជាការដឹកនាំ ការគ្រប់គ្រង និងការចាត់ចែងការងារទូទៅរបស់គណបក្សខ្មែរតែមួយ។
លោក កែម រិទ្ធិសិត ប្រាប់វីអូឌីបន្ថែមថាការលះបង់តួនាទីជាប្រធានគណបក្សទៅឱ្យសមាជិកបក្សដឹកនាំជំនួសវិញ ជាវប្បធម៌ចែករំលែកបទពិសោធន៍ស្របតាមគោលការណ៍ប្រជាធិបតេយ្យ។ លោកបន្តថាក្រោយពីលាលែងពីតួនាទីប្រធានគណបក្សនេះលោកនឹងក្លាយទៅជាប្រធានកិត្តិយសរបស់បក្សវិញ។
គណបក្សខ្មែរតែមួយត្រូវបានបង្កើតឡើងកាលពីខែមីនា ឆ្នាំ២០១៨ ដោយលោក កែម រិទ្ធិសិត។ គណបក្សក៏បានចូលរួមក្នុងការបោះឆ្នោតជាតិកាលពីឆ្នាំ២០១៨កន្លងទៅដែរ ប៉ុន្តែពុំទទួលបានអាសន្ននោះទេ។ ទោះយ៉ាងណាក្តីក្រោយការបោះឆ្នោតលោកនាយករដ្ឋមន្រ្តីហ៊ុន សែន បានសម្របសម្រួលឱ្យមានការបង្កើតឧត្តមក្រុមប្រឹក្សាពិគ្រោះ និងផ្តល់យោបល់ដែលមានសមាសភាពមកពីគណបក្សប្រជាជន និងគណបក្សដែលបានចូលរួមការបោះឆ្នោត១៥ផ្សេងទៀត។ កាលពីថ្ងៃទី៦ ខែកញ្ញា ឆ្នាំ២០១៨ មេដឹកនាំបក្សនយោបាយដែលចូលរួមក្នុងក្រុមប្រឹក្សានោះត្រូវបានព្រះមហាក្សត្រផ្តល់ឋានៈស្មើទេសរដ្ឋមន្រ្តី និងរដ្ឋមន្រ្តី។ ចំណែកលោក កែម រិទ្ធិសិត ក៏ចូលរួមក្នុងក្រុមប្រឹក្សានោះដែរដោយលោកទទួលបានឋានៈស្មើទេសរដ្ឋមន្រ្តី។
លោក រិទ្ធិសិត បានប្រាប់បន្ថែមថាសម្រាប់តួនាទីនៅឧត្តមក្រុមប្រឹក្សាពិគ្រោះ និងផ្តល់យោបល់ ប្រសិនបើមិនមានព្រះរាជក្រឹត្យណាមួយក្នុងការបញ្ចប់សមាសភាពរបស់លោកទេលោកនៅតែបន្តវត្តមាន ប៉ុន្តែករណីបើមានព្រះរាជ្យក្រឹត្យបញ្ចប់តំណែងនោះលោកក៏គោរពតាមដែរ៕