ស្ថិតក្នុងសម្លៀកបំពាក់ពណ៌ទឹកលឿងចាស់ដែលមានកៅអៀករុំករនឹងដប់ទឹកសុទ្ធដាក់ក្នុងហៅប៉ៅអាវផ្នែកខាងឆ្វេង អតីតមេឃុំជាប់ឆ្នោតបក្សប្រឆាំងនៅឃុំឃ្លាំងមាស លោក អ៊ុក ឆុំ បានប្រាប់ទៅចៅក្រមថា រូបលោកមិនបានទំនាក់ទំនងជាមួយមេដឹកនាំ និងសកម្មជនដទៃទៀតរបស់បក្សប្រឆាំងនោះឡើយ ក្រោយពីគណបក្សសង្គ្រោះជាតិត្រូវបានរំលាយ។
លោក អ៊ុក ឆុំ និង លោក លាស់ ឆេងឡាយ សមាជិកជាប់ឆ្នោតរបស់គណបក្សសង្គ្រោះជាតិនៅក្រុមប្រឹក្សាស្រុកបវេល ត្រូវបានសមត្ថកិច្ចខេត្តបាត់ដំបងចាប់ខ្លួនកាលពីថ្ងៃទី១០ ខែកក្កដាកន្លងមកនេះ ហើយត្រូវបានចោទប្រកាន់ពីបទ«ញុះញង់បង្ករឱ្យមានភាពវឹកវរដល់សង្គម»។
ក្នុងសវនាការប្រហែល ៤ម៉ោងនៅព្រឹកថ្ងៃនេះនៅឯសាលាដំបូងរាជធានីភ្នំពេញ លោក អ៊ុក ឆុំ អាយុ ៧៤ឆ្នាំ ត្រូវបានចៅក្រមជំនុំជម្រះ ចោទសួរអំពីការប្រើប្រាស់បណ្ដាញទំនាក់ទំនងសង្គម និងការទាក់ទងគ្នារបស់លោកជាមួយអតីតមេដឹកនាំគណបក្សសង្គ្រោះជាតិ លោក សម រង្ស៊ី ដែលកំពុងស្ថិតនៅឯក្រៅប្រទេសចាប់តាំងពីចុងឆ្នាំ២០១៥មក និងព្រះតេជគុណ ប៊ុត ប៊ុនតិញ ព្រះសង្ឃសកម្មក្នុងការរិះគន់លោកនាយករដ្ឋមន្ត្រី ហ៊ុន សែន។ ព្រះតេជគុណ ប៊ុត ប៊ុនតិញ ក៏កំពុងភៀសព្រះកាយនៅឯក្រៅប្រទេសផងដែរ។
ជាការឆ្លើយតប លោក អ៊ុក ឆុំ ប្រាប់ថា លោកមិនបានទាក់ទងជាមួយអតីតមេដឹកនាំបក្សប្រឆាំង លោក សម រង្ស៊ី នោះឡើយ ហើយក៏ប្រាប់ថា លោកមិនចេះប្រើយូធូបផងដែរ។
នៅពេលចៅក្រមជំនុំជម្រះ លោក រស់ ពិសិដ្ឋ សាកសួរអំពីសំឡេងសន្ទនាគ្នាតាមទូរស័ព្ទជាមួយលោក លាស់ ឆេងឡាយ ដែលជជែកអំពី«ការស្លាប់របស់លោក ហ៊ុន សែន នៅឆ្នាំ២០២៣ ដោយរកក្ដារមឈូសដាក់មិនបាន ហើយប្រពន្ធគ្មានបាយស៊ី» លោក អ៊ុក ឆុំ ប្រាប់ថា លោកចាំមិនច្បាស់ទេ។ បន្ទាប់ពីបានឆ្លើយតបទាំងអការៈញីញ័រ និងមិនអាចឆ្លើយនឹងចៅក្រមជំនុំជម្រះបន្តទៀតបានដោយសារអការៈទន់ខ្សោយ លោក អ៊ុក ឆុំ ត្រូវបានអនុញ្ញាតឱ្យសម្រាករយៈពេលខ្លី។
ក្នុងសវនាការនោះ លោក លាស់ ឆេងឡាយ ក៏ត្រូវបាននាំយកទៅចូលរួមផងដែរ ហើយត្រូវបានចៅក្រមជំនុំជម្រះសួរនាំពីចំណេះដឹងនៃការប្រើប្រាស់បណ្ដាញទំនាក់ទំនងសង្គមហ្វេសប៊ុក ការសន្ទនាគ្នាតាមទូរស័ព្ទជាមួយលោក អ៊ុក ឆុំ និងទំនាក់ទំនងជាមួយលោក សម រង្ស៊ី និងព្រះសង្ឃ ប៊ុត ប៊ុនតិញ ផងដែរ។
អតីតសមាជិកក្រុមប្រឹក្សាស្រុកបរវេលរបស់គណបក្សសង្គ្រោះជាតិរូបនេះ ប្រាប់អង្គសវនាការថា លោកពុំសូវចេះប្រើប្រាស់បណ្ដាញសង្គមហ្វេសប៊ុកទេ ដោយប្រាប់ថា លោកបង្កើតគណនីហ្វេសប៊ុកដើម្បីបានមើលព័ត៌មានតែប៉ុណ្ណោះ។
លោក លាស់ ឆេងឡាយ ប្រាប់ថា នៅពេលជជែកគ្នាតាមទូរស័ព្ទជាមួយលោក អ៊ុក ឆុំ លោកបានបើកសំឡេងចេញក្រៅ ព្រោះលោកឈឺក្បាលនៅពេលស្ដាប់សំឡេងជជែកនោះដោយផ្ទាល់ ហើយលោកថា ការជជែកនោះស្ដាប់គ្នាមិនបានសូវបានទេ។
ភស្តុតាងដែលត្រូវបានលើកបង្ហាញឡើងដោយព្រះរាជអាជ្ញា ក្នុងតុលាការព្រឹកនេះ គឺមានវីឌីអូររបស់លោក សម រង្សី ដែលបានអំពាវនាវឱ្យប្រជាពលរដ្ឋឈប់បង់លុយធនាគារ ដោយសារតែវិបត្តសេដ្ឋកិច្ចអំឡុងពេលកូវីដ។ វីឌីអូបង្ហាញអំពីព្រះសង្ឃ បុត ប៊ុញតិញ ដែលបានជេរប្រមាញទៅកាន់សម្ដេចសង្ឃ។ ការបង្ហោះរបស់លោក ទុំ ប៊ុនថន ក្នុងបណ្ដាញសង្គមហ្វេសបុកដែលកាត់តរូបភាពនឹងជេរប្រមាថថ្នាក់ដឹកនាំ។
នៅក្នុងបន្ទប់សវនាការនោះ តំណាងអយ្យការបានបង្ហាញវីដេអូឃ្លីបមួយរបស់លោក សម រង្ស៊ី ដែលបានអំពាវនាវទៅប្រជាពលរដ្ឋឱ្យឈប់សងលុយធនាគារ និងគ្រឹះស្ថានមីក្រូហិរញ្ញវត្ថុ នៅចំពេលមានវិបត្តិសេដ្ឋកិច្ចដែលបណ្ដាលមកពីការឆ្លងរាតត្បាតនៃជំងឺកូវីដ១៩ វីដេអូបង្ហាញពីព្រះសង្ឃ ប៊ុត ប៊ុនតិញ ជេរប្រមាថថ្នាក់ដឹកនាំសង្ឃជាន់ខ្ពស់ និងការបង្ហោះវីដេអូរបស់លោក ទុំ ប៊ុនថន ក្នុងបណ្ដាញសង្គមហ្វេសប៊ុក នូវរូបភាពកាត់ត និងសារ«ជេរប្រមាថ»ថ្នាក់ដឹកនាំ។
ប៉ុន្តែ លោក សំ សុគង់ មេធាវីការពារក្ដីឱ្យលោក អ៊ុក ឆុំ និងលោក លាស់ ឆេងឡាយ និយាយថា ភស្តុតាងដែលបានបង្ហាញក្នុងអង្គជំនុំជម្រះនេះ ពុំមានលក្ខណៈគ្រប់គ្រាន់ ដើម្បីចោទប្រកាន់កូនក្ដីរបស់លោកនោះទេ ហើយបានស្នើទៅកាន់ចៅក្រមឱ្យទម្លាក់បទចោទប្រកាន់ទៅលើកូនក្ដីរបស់លោកទាំងពីររូបនេះ។
លោកមេធាវី បានរៀបរាប់ថា កូនក្ដីរបស់លោកមិនមានចំណេះដឹងដើម្បីប្រើប្រាស់បណ្ដាញសង្គម ដូចជា ការបញ្ចេញមតិ និងចែករំលែកនោះទេ ហើយលោកថា ការជជែកតាមទូរស័ព្ទរបស់បុគ្គល ២រូប មិនអាចចាត់ទុកជាការញុះញង់នោះឡើយ។
ចំណែកវីឌីអូររបស់លោក សម រង្សី លោក សុគង់ និយាយថា គឺគ្រាន់តែមានលក្ខណៈផ្ដល់យោបល់លើបញ្ហារបស់ប្រជាពលរដ្ឋដែលរងផលប៉ះពាល់ដោយសារវិបត្តកូវីដ១៩ប៉ុណ្ណោះ ហើយលោកថា វាមានលក្ខណៈទូទៅ មិនសំដៅលើសមាជិកគណបក្សសង្រ្គោះជាតិឡើយ។
លោកបន្តថា ភស្តុតាងដែលបង្ហាញអំពីលោក សម រង្សី ព្រះអង្គ ប៊ុត ប៊ុនតិញ និងលោក ទុំ ប៊ុនថន គឺមានលក្ខណៈផ្សេងគ្នា និងមិនមានជាប់ពាក់ព័ន្ធគ្នានោះទេ។
លោក ឡោ ជុនធី សហមេធាវីការពារកូនក្ដីទាំងពីរ បាននិយាយថា មិនមានភស្តុតាងអ្វីដើម្បីបញ្ជាក់ថា កូនក្ដីរបស់លោកបានបញ្ចេញមតិយោបល់ ឬចែករំលែកវីឌីអូរបស់លោក សម រង្សី និងព្រះអង្គ ប៊ុត ប៊ុនតិញ និងលោក ទុំ ប៊ុនថន ទៅកាន់អ្នកដទៃនោះទេ ហើយប្រសិនបើមានមែន លោកស្នើឱ្យដាក់បង្ហាញ។
ទោះជាយ៉ាងណា ចៅក្រមបានសម្រេចបដិសេធសំណើសុំនៅក្រៅឃុំរបស់បុរសទាំង២នាក់ ដោយលើកហេតុផលថា សវនាការត្រូវនៅបន្ត ប៉ុន្តែ អ្នកទាំងពីរថា លោកស្នើសុំនៅក្រៅឃុំព្រោះតែជីវភាព និងជំងឺប្រចាំកាយ។
ខណៈដែលសវនាការកំពុងប្រព្រឹត្តទៅនោះ មនុស្សប្រហែល ៥០នាក់ បានប្រមូលផ្ដុំគ្នាតវ៉ានៅមុខសាលាដំបូងរាជធានីភ្នំពេញ ដើម្បីទាមទារឱ្យដោះលែងសកម្មជននយោបាយ សកម្មជនបរិស្ថាន និងមនុស្សផ្សេងទៀត ដែលត្រូវបានចាប់ខ្លួនជាបន្តបន្ទាប់នៅក្នុងឆ្នាំនេះ។
ចៅក្រមបានកំណត់ថានឹងប្រកាសសេចក្ដីសម្រេចរបស់ខ្លួនជុំវិញសំណុំរឿងនេះនៅថ្ងៃទី៣០ ខែធ្នូ ឬនៅសប្ដាហ៍ក្រោយ៕