ក្មេងស្រីខ្មែរម្នាក់ដែលចាញ់បោកមេខ្យល់នាំយកទៅលក់នៅប្រទេសចិន បានរត់គេចខ្លួនទៅប៉ុស្តិ៍ប៉ូលិសចិន ដើម្បីស្នើសុំឱ្យជួយនាំត្រឡប់មកកម្ពុជា។
ក្មេងស្រីអាយុ១៤ឆ្នាំម្នាក់ អះអាងប្រាប់ វីអូឌី តាមសារជាសំឡេងលើបណ្តាញសង្គមហ្វេសប៊ុក នៅថ្ងៃទី២០ ខែធ្នូ ឆ្នាំ២០២០ ថារូបគាត់បានចាញ់បោកមេខ្យល់ដែលមិនស្គាល់អត្តសញ្ញាណ ហើយនាំយកទៅប្រទេសចិនរយៈពេល៤ខែមកហើយ។
ក្មេងស្រីរូបនោះបន្តថា នៅប្រទេសចិន រូបគាត់ត្រូវបានប្តីជនជាតិចិនវាយធ្វើបាបត្រូវមុខ ដងខ្លួន និងទាញទម្លាក់ពីលើគ្រែដេក ស្ទើរជារៀងរាល់ថ្ងៃ រហូតដល់ទ្រាំលែងបាន ទើបសម្រេចចិត្តលួចរត់ទៅប៉ុស្តិ៍ប៉ូលិសដែលមានចម្ងាយពីផ្ទះជនរងគ្រោះប្រមាណ១០គីឡូម៉ែត្រ ដោយពុំស្គាល់ទីតាំងភូមិសាស្ត្រនៅតំបន់នោះឈ្មោះអ្វីនោះទេ។
ក្មេងស្រីរូបនោះនិយាយទៀតថា គិតត្រឹមថ្ងៃទី២០ ខែធ្នូ ឆ្នាំ២០២០នេះ មានរយៈពេល២យប់៣ថ្ងៃហើយត្រូវបានប៉ូលិសចិនទុកឱ្យស្នាក់នៅបណ្តោះអាសន្ន និងឱ្យបាយទឹកចំនួន៣ពេលក្នុងមួយថ្ងៃ និងមានសុវត្ថិភាពផងដែរ។
នាងនិយាយថា៖ «ខ្ញុំមកប៉ុស្តិ៍ប៉ូលិសនេះ គឺដើម្បីឱ្យគេជួយជូនខ្ញុំទៅខ្មែរវិញ ព្រោះខ្ញុំអត់ចង់នៅនេះទៀតទេ»។
អ្វីដែលគួរឱ្យកត់សម្គាល់ ក្មេងស្រីរូបនោះបង្ហាញក្តីបារម្ភថា ខ្លាចប៉ូលិសចិននាំរូបគាត់ទៅផ្ទះប្តីដែលវាយធ្វើបាបគាត់វិញ ដោយសារបច្ចុប្បន្ននេះ គាត់មិនចេះចិន បានត្រឹមតែធ្វើកាយវិការទៅកាន់ប៉ូលិសនោះតែប៉ុណ្ណោះ។ ករណីនេះ នាងស្នើទៅអាជ្ញាធរនិងរដ្ឋាភិបាលកម្ពុជាជួយអន្តរាគមន៍ទៅប៉ូលិសចិន ដើម្បីនាំរូបគាត់បានត្រឡប់មកកម្ពុជាជួបជុំក្រុមគ្រួសារវិញផង។
VOD មិនអាចទាក់ទងអ្នកនាំពាក្យក្រសួងការបរទេស និងកិច្ចសហប្រតិបត្តិការអន្តរជាតិកម្ពុជា លោក កុយ គួង និងប្រធាននាយកដ្ឋានប្រឆាំងការជួញដូរមនុស្ស និងការពារអនីតិជន លោក ជីវ ផល្លី ដើម្បីបញ្ជាក់បន្ថែមនៅឡើយទេ នៅថ្ងៃចន្ទនេះ។
ប៉ុន្តែក្នុងគេហទំព័ររបស់អគ្គស្នងការដ្ឋាននគរបាលជាតិ បានដកស្រង់ប្រសាសន៍របស់លោក ជីវ ផល្លី ផ្សព្វផ្សាយថា កាលពីរសៀលថ្ងៃទី១៨ ខែធ្នូ ឆ្នាំ២០២០ ក្រោមកិច្ចសហប្រតិបត្តិការរវាងអាជ្ញាធរចិននិងសមត្ថកិច្ចពាក់ព័ន្ធរបស់កម្ពុជា បានស្រាវជ្រាវស្វែងរកឃើញកន្លែងស្នាក់នៅរបស់ក្មេងស្រីរងគ្រោះខាងលើ និងបានជួយសង្គ្រោះបញ្ជូនមកស្នាក់ការនគរបាលនៅខេត្តហឺណាន ប្រទេសចិន ដើម្បីចាត់ការបន្ត និងរៀបចំបែបបទបញ្ជូនក្មេងស្រីរងគ្រោះខាងលើឱ្យវិលត្រឡប់មកកម្ពុជាវិញ។
លោក ជីវ ផល្លី អះអាងថា ស្ថាប័នជំនាញ នឹងសហការជាមួយសមត្ថកិច្ចពាក់ព័ន្ធ រង់ចាំទទួលជនរងគ្រោះ ហើយក្រោយពេលដែលជនរងគ្រោះបានអនុវត្តវិធានការចត្តាឡីស័ករបស់ក្រសួងសុខាភិបាលរួច មន្ត្រីជំនាញនឹងធ្វើការសម្ភាសស្វែងរកព័ត៌មានលម្អិត ដើម្បីកំណត់អត្តសញ្ញាណជនសង្ស័យជាមេខ្យល់ និងឈានដល់ការនាំខ្លួនមកផ្ដន្ទាទោសតាមច្បាប់ជាធរមាន។
ចំណែកអ្នកនាំពាក្យគណៈកម្មាធិការជាតិប្រយុទ្ធប្រឆាំងការជួញដូរមនុស្សកម្ពុជា លោក យឹម វិរៈ មានប្រសាសន៍ថា ករណីនេះ អាជ្ញាធរបានជួយសង្គ្រោះបានហើយ នៅរង់ចាំបញ្ជូនជនរងគ្រោះមកកម្ពុជាវិញប៉ុណ្ណោះ។
បញ្ហាស្ត្រីខ្មែរចាញ់បោកមេខ្យល់ទៅលក់នៅប្រទេសចិននេះ បានកើតមានយូរណាស់មកហើយ ដែលធ្វើឱ្យស្ត្រីខ្មែរជាច្រើននាក់រងគ្រោះជាបន្តបន្ទាប់។
របាយការណ៍ក្រសួងការបរទេសកម្ពុជា ឱ្យដឹងថា គិតត្រឹមខែតុលា ឆ្នាំ២០២០នេះ ក្រសួងបានជួយសង្គ្រោះស្ត្រីខ្មែរដែលចាញ់បោកគេទៅរៀបការនៅក្នុងប្រទេសចិន ចំនួន៧៥នាក់ហើយ។
មន្ត្រីផ្នែកកម្មវិធីទេសន្តរប្រវេសន៍នៃអង្គការសង់ត្រាល់ លោក ឌី ថេហូយ៉ា យល់ថា មូលហេតុដែលនៅតែមានករណីស្ត្រីខ្មែរចាញ់បោកមេខ្យល់ទៅប្រទេសចិននេះ បណ្ដាលមកពីកម្សោយនៃការចាត់វិធានការលើមេខ្យល់ និងអំពើពុករលួយ។
លោកមានប្រសាសន៍ថា៖ «មានច្រើនករណីនៅក្នុងភ្នំពេញ ដែលមេខ្យល់ជាអ្នករត់ការណ៍ចេញអត្តសញ្ញាណបណ្ណបង្គ្រប់អាយុ ដើម្បីធ្វើលិខិតឆ្លងដែនបាន ហើយជាដំណើរការរបស់គេ គឺហាក់បីដូចជាធ្វើលឿន គឺតែមួយថ្ងៃអី គេធ្វើបានហើយ។ អ៊ីចឹងខ្ញុំគិតថា អំពើពុករលួយនេះ វាបង្កើតឱ្យមានក្រុមមេខ្យល់បញ្ជូនស្ត្រីខ្មែរយើងទៅប្រទេសចិនហ្នឹង»។
លោកឱ្យជាយោបល់ថា ការលុបបំបាត់អំពើពុករលួយគឺជារឿងដែលចាំបាច់បំផុត ដើម្បីបញ្ឈប់លែងឱ្យមានរឿងនេះកើតឡើងបន្តទៀត។
លោកថា៖ «ប្រសិនបើអំពើពុករលួយជាប្រព័ន្ធនេះ វានៅតែមាន អ៊ីចឹងដំណើរការនៃការជួញដូរមនុស្សហ្នឹង ក៏នៅតែមានដដែល។ ការអនុវត្តច្បាប់ វាធូររលុង ហើយអ្នកអនុវត្តន៍ច្បាប់ហ្នឹង វាពាក់ព័ន្ធនឹងការជួញដូរមនុស្សហ្នឹងទៀតផង អ៊ីចឹងវារឹតតែអត់មានប្រសិទ្ធភាពក្នុងការបំបាត់នូវអំពើជួញដូរមនុស្សហ្នឹងទេ»។
ក្នុងរបាយការណ៍ស្ដីពីការជួញដូរមនុស្ស ឆ្នាំ២០២០ សហរដ្ឋអាមេរិកបានដាក់កម្ពុជាទៅក្នុងប្រទេសមានកិច្ចប្រឹងប្រែងតិចតួចក្នុងការដោះស្រាយបញ្ហាជួញដូរមនុស្ស ឬហៅថា Tear 2 Watchlist ដោយថា រដ្ឋាភិបាលកម្ពុជាមិនបានចាត់វិធានការដល់កម្រិតស្តង់ដារអប្បបរមាពេញលេញ ក្នុងការកម្ចាត់ការជួញដូរមនុស្សនៅឡើយទេ រួមទាំងបញ្ហាគ្មានកិច្ចប្រឹងប្រែងប្រមូលទិន្នន័យឬចែករំលែកព័ត៌មានសំខាន់ៗអំពីការងារ អំពើពុករលួយ ការមិនបានបង្កើតប្រព័ន្ធឃ្លាំមើលតុលាការដែលនាំឱ្យជនសង្ស័យរួចខ្លួន ហើយនិងបញ្ហាផ្សេងៗទៀតដែលមិនបោះជំហានរីកចម្រើន តាំងពីពេលចេញរបាយការណ៍ឆ្នាំមុន៕