សាច់ញាតិរបស់សកម្មជនការពារព្រៃឈើម្នាក់នៅក្នុងខេត្តរតនគិរី ដែលបានគេចខ្លួនពីផ្ទះសម្បែងរបស់លោកតាំងពីខែកក្កដាមកនោះ បានស្នើទៅអាជ្ញាធរឃុំសេដា អនុញ្ញាតឱ្យរូបគាត់ដាំដុះដំណាំលើដីចម្ការរបស់គាត់។
លោក ឡាំ ហេង មានអាយុ៤៧ឆ្នាំ គឺជាបងថ្លៃរបស់សកម្មជនការពារព្រៃឈើ លោក ឆន ផល្លា ដែលបានគេចចេញពីផ្ទះសម្បែងរបស់លោកចាប់តាំងពីខែកក្កដាក្នុងឆ្នាំនេះ បន្ទាប់ពីលោករងអំពើហិង្សានៅក្នុងវេទិកាសាធារណៈមួយនៅក្នុងស្រុកលំផាត់។
កសិកររូបនេះបានឱ្យដឹងថា អាជ្ញាធរបានមកឃាត់លោកពេលកំពុងធ្វើការភ្ជួរលើដីចម្ការចន្ទីរបស់ខ្លួនឯង ខណៈដែលមានការភ្ជួរគ្រប់ទីកន្លែង បែរជាអាជ្ញាធរមកឃាត់តែលោកម្នាក់។
លោកបន្តថា អាជ្ញាធរថាដីរបស់លោកមានបញ្ហា តែមិនបានបញ្ជាក់ថាបញ្ហាអ្វីនោះទេ នៅពេលដែលលោកចោទសួរបន្តចំពោះរឿងនេះ ដោយគ្រាន់តែប្រាប់ថា កុំសួរច្រើនពេក ឈឺក្បាលណាស់។
លោកបញ្ជាក់ថា នេះជាដីលោកស្របច្បាប់ មានប្លង់ត្រឹមត្រូវ ហើយនៅថ្ងៃនេះ លោកនឹងយកប្លង់ដែលបានដាក់កម្ចីនៅគ្រឹះស្ថានហិរញ្ញវត្ថុ ទៅបង្ហាញនៅសាលាឃុំ។
លោក ឡាំ ហេង និយាយថា៖ «[ពេលមិនបានភ្ជួរ] ខ្ញុំដេកអត់លក់ កាលណាភ្លើងឆេះព្រៃ ខ្ញុំថា ងាប់ហើយ ដឹងតែងាប់ចងកហើយ ភ្លើងឆេះព្រៃ ដឹងឆេះចន្ទីអស់អាលីងហ្មង។ ចន្ទីខ្ញុំបានផលហើយ ខ្ញុំដាំឡើងបីបួនឆ្នាំហើយ»។
លោក ឆន ផល្លា បាននិយាយថា សមត្ថកិច្ចនៅស្រុកលំផាត់ បានហាមឃាត់បងថ្លៃរបស់លោកដែលកំពុងភ្ជួរលើដីចម្ការរបស់ខ្លួនឯងកាលពីថ្ងៃទី២១ ខែធ្នូនេះ គឺចង់ធ្វើបាបបងរបស់លោកឱ្យពិបាកក្នុងការប្រកបមុខរបរ។
លោកបន្ថែមថា កាលពីថ្ងៃអង្គារកន្លងមកនេះ បងថ្លៃរបស់លោកត្រូវបាននគរបាលកោះហៅទៅធ្វើកិច្ចសន្យា ឱ្យបញ្ឈប់ការធ្វើសកម្មភាពភ្ជួរនិងកាត់ស្មៅនៅលើដីនោះបន្តទៀត។
លោក ឆន ផល្លា និយាយថា៖ «គាត់ធ្វើបែបនេះ គឺគំរាមកំហែងសកម្មជនមិនឱ្យការពារព្រៃឈើ ធ្វើឱ្យអ្នកដែលស្រឡាញ់ធនធានធម្មជាតិ ដែលស្រលាញ់ដីព្រៃរបស់រដ្ឋ និងធ្វើឱ្យគាត់ពិបាកក្នុងការធ្វើស្រែធ្វើចម្ការដូចគេ»។
វីអូឌី បានស្វែងរកការបកស្រាយពីប្រធានរដ្ឋបាលប៉ុស្តិ៍ឃុំសេដា លោក អង្គ ប៊ុនធាង ប៉ុន្តែលោកមិនលើកទូរសព្ទនោះឡើយ។
ចំណែកឯអភិបាលស្រុកលំផាត់ លោក នូ ថេ បានប្រាប់អ្នកសារព័ត៌មានឱ្យចុះទៅជួបលោកផ្ទាល់ ប្រសិនបើចង់បានព័ត៌មាននេះ។
អ្នកសម្របសម្រួលសមាគមការពារសិទ្ធិមនុស្សអាដហុកប្រចាំរតនគិរី លោក ឌិន ខន្នី បានចាត់ទុកទង្វើបែបនេះរបស់អាជ្ញាធរមូលដ្ឋាន គឺជាការគំរាមកំហែងទៅលើសាច់ញាតិរបស់សកម្មជនបរិស្ថាន ដែលតែងតែត្រូវបានធ្វើទុក្ខបុកម្នេញពីសំណាក់អាជ្ញាធរដែលនៅទីនោះ ហើយមកដល់ពេលនេះ នៅសល់ប្រហែលជាបីនាក់ទៀតដែលនៅតែបន្តសម្ងំលាក់ខ្លួនមិនហ៊ានចូលស្រុកកំណើត ដើម្បីគេចពីការធ្វើបាបរបស់អាជ្ញាធរ។
លោក ឌិន ខន្នី និយាយថា៖ «វាគឺជាការគាបសង្កត់ទៅដល់សកម្មជនការពារព្រៃឈើ ការពារដីធ្លី និយាយឱ្យចំ គឺធ្វើម៉េចផ្ដាច់ឆ្នាំងបាយរបស់ពួកហ្នឹងតែម្ដង»។
មន្ត្រីសម្របសម្រួលសិទ្ធិមនុស្សរូបនេះ បញ្ជាក់ថា លោក ឆន ផល្លា និងអ្នកភូមិ២នាក់ទៀត បានគេចចេញពីផ្ទះសម្បែងរបស់ពួកគេតាំងពីខែកក្កដាមក ហើយមិនទាន់បានវិលត្រឡប់ទៅភូមិវិញទេ ដោយបារម្ភពីសុវត្ថិភាពរបស់ពួកគេ៕
