អនុប្រធានសមាគមមូលនិធិ កែម ឡី ឱ្យដឹងថា យុត្តិធម៌សម្រាប់អ្នកវិភាគពីបញ្ហាសង្គមនិងនយោបាយដែលមានប្រជាប្រិយភាពនេះ គឺមិនទាន់មានពន្លឺនៅឡើយទេ ខណៈក្រុមគ្រួសារកំពុងរៀបចំផ្លាស់ប្តូររូបថតថ្មីនៅខាងមុខផ្ទះនៅស្រុកកំណើតនៃខេត្តតាកែវ ដើម្បីប្រារព្ធខួប៥ឆ្នាំនៃឃាតកម្មកាលពីជិត៥ឆ្នាំមុន។
អ្នកជំនាញផ្នែកសុខុមាលភាពសង្គម និងជាអនុប្រធានសមាគមមូលនិធិ កែម ឡី លោក ជឹម ចរណៃ មានប្រសាសន៍នៅថ្ងៃទី៣០ ខែមិថុនា ថានៅថ្ងៃខួប៥ឆ្នាំនៃមរណភាពលោកបណ្ឌិត កែម ឡី នេះ សមាគមគ្រោងនឹងជួបជុំគ្នាដើម្បីដាក់កម្រងផ្កាត្រង់ទីតាំងដែលឃាតករបាញ់ប្រហារដែរ។ ប៉ុន្តែដោយសារស្ថានភាពកូវីដ-១៩ គម្រោងនេះអាចនឹងមានការប្រែប្រួល ដើម្បីរួមចំណែកកាត់ផ្តាច់នៃការចម្លងជំងឺកូវីដ-១៩។
លោកបន្តថា៖ «យើងប្រហែលចេញត្រឹមសេចក្តីថ្លែងការណ៍ជាសាធារណៈហ្នឹង អំពីការរំឭកខួបហើយនិងអំពីការបន្តស្វែងរកយុត្តិធម៌។ យើងនៅតែបន្តតស៊ូមតិអ៊ីចឹងដដែល! ការដែលយើងជួបជុំគ្នាច្រើនទៅហ្នឹង យើងបារម្ភអំពីបម្រាមសុខាភិបាលនិងកូវីដ។ អ៊ីចឹងម្ល៉ោះហើយមានវិធីមួយ គឺចេញសេចក្តីថ្លែងការណ៍ឬតំណាងទៅចូលរួមបំពាក់កម្រងផ្កាអីហ្នឹង»។
បើតាមលោក ជឹម ចរណៃ ថ្វីបើមកដល់ពេលនេះ ឃាតករត្រូវបានតុលាការផ្តន្ទាទោសក្តី ប៉ុន្តែថា នេះមិនមែនជាការផ្តល់យុត្តិធម៌នៅឡើយទេ សម្រាប់លោកបណ្ឌិត កែម ឡី ព្រោះទាំងភស្តុតាងដាក់បន្ទុកនិងអង្គហេតុនៃសំណុំរឿងគឺមិនស៊ីចង្វាក់គ្នា។
បញ្ហានេះ ក្នុងនាមសមាគមនៃមូលនិធី កែម ឡី នៅតែបន្តទាមទារឱ្យមានយុត្តិធម៌ពិតប្រាកដមួយសម្រាប់អ្នកវិភាគពីបញ្ហាសង្គមនិងនយោបាយនេះ។ លោក ជឹម ចរណៃ បន្តថា តាមពិតទៅ នៅក្នុងគម្រោងបាញ់សម្លាប់នេះមិនមែនមានតែឃាតករម្នាក់ទេដែលរៀបចំគម្រោង គេជឿថា នៅមានជនសមគំនិតនិងអ្នកពាក់ព័ន្ធផ្សេងទៀតក្នុងអំពើមនុស្សឃាតនេះ។
ម្តាយលោកបណ្ឌិត កែម ឡី គឺអ្នកស្រី ភោគ សេ បញ្ជាក់ថា សម្រាប់បុណ្យខួបគម្រប់៥ឆ្នាំដែលគ្រោងនឹងរៀបចំនៅថ្ងៃទី១០ ខែកក្កដាខាងមុខនេះ មិនមានពីធីអ្វីធំដុំឡើយ នៅស្រុកត្រាំកក់ ខេត្តតាកែវ។ ស្រ្តីវ័យប្រមាណ៧០ឆ្នាំរូបនេះបន្តថា សម្រាប់បុណ្យរំឭកខួប៥ឆ្នាំលើកនេះ និមន្តព្រះសង្ឃត្រឹម៥អង្គសម្រាប់សូត្រមន្ត រាប់បាត្រ និងមានការចូលរួមពីសាច់ញាតិខ្លះៗប៉ុណ្ណោះ។
អ្នកស្រីបន្តថា៖ «យើងអត់មានធ្វើអីដូចមុនទៀតទេ ព្រោះយើងខ្លាចអាជ្ញាធរគេមកឃាត់មកអីទៅ វានាំតែពិបាក។ ប៉ុន្តែធ្វើនៅតែធ្វើអ៊ីចឹង»។
បើតាមអ្នកស្រី ភោគ សេ អ្នកស្រឡាញ់រាប់អានលោកបណ្ឌិត កែម ឡី នៅតែចេញចូលអុជធូបនិងចូលថវិកាតាមលទ្ធភាពដែលពួកគេមានជាហូរហែនាពេលកន្លងទៅ។ ប៉ុន្តែក្រោយពីផ្ទុះកូវីដ-១៩ មិនមានអ្នកចូលមកគោរពបូជាដូចមុនៗទៀតឡើយ។ ក្រៅពីនេះ សម្រាប់ការស្វែងរកយុត្តិធម៌ អ្នកស្រីនៅតែយល់ឃើញថា ពិតជាត្រូវការ តែមិនដឹងត្រូវធ្វើដូចម្តេចទើបអាចទទួលបានយុត្តិធម៌ដែលកប់ទុកអស់ពេលជាច្រើនឆ្នាំមកហើយនេះ។
លោកបណ្ឌិត កែម ឡី ត្រូវបានឃាតករបាញ់ប្រហារទាំងព្រឹកព្រលឹម និងបណ្តាលឱ្យស្លាប់ភ្លាមៗនៅនឹងកន្លែង កាលពីថ្ងៃទី១០ ខែកក្កដា ឆ្នាំ២០១៦ ស្ថិតនៅក្នុងម៉ាតនៃបរិវេណហ្គារ៉ាស់សាំងកាល់តិច ស្តុបបូកគោ។ ក្រោយមក សមត្ថកិច្ចចាប់ខ្លួនបានឃាតករម្នាក់ដែលបាញ់សម្លាប់លោកបណ្ឌិត កែម ឡី ដោយសារភាពថា ខ្លួនឈ្មោះ ជួប សម្លាប់ ប៉ុន្តែគេស្គាល់ឈ្មោះពិតថា អឿត អាង។
ទាំងក្នុងដំណាក់កាលយកចម្លើយនៅចំពោះមុខនគរបាលយុត្តិធម៌និងថ្ងៃជំនុំជម្រះអំពើបាញ់ប្រហារនេះ លោក អឿត អាង បញ្ជាក់ថា មានតែរូបគេម្នាក់ប៉ុណ្ណោះជាជនដៃដល់នៃអំពើឃាតកម្មនេះ ។ មូលហេតុដោយសារលោកបណ្ឌិត កែម ឡី ជំពាក់លុយចំនួន៣ ០០០ដុល្លារ ហើយមិនព្រមសង។
កាលពីខែមីនា ឆ្នាំ២០១៧ តុលាការក្រុងភ្នំពេញបានសម្រេចផ្តន្ទាទោសឈ្មោះ អឿត អាង ហៅ ជួប សម្លាប់ ដាក់ពន្ធនាគារអស់មួយជីវិត ក្រោមបទចោទ «ឃាតកម្មគិតទុកជាមុន» និងបទចោទមួយទៀត «កាន់កាប់អាវុធដោយគ្មានការអនុញ្ញាត»។
នៅក្នុងដំណាក់កាលនៃដំណើរក្តី ប្រធានក្រុមប្រឹក្សាជំនុំជម្រះ លោក លាង សំណាត់ បានបែងចែកសំណុំរឿងនេះជាពីរ។ សំណុំរឿងទី១ ពាក់ព័ន្ធការកាត់ទោសឃាតករឈ្មោះ អឿត អាង។ ដោយឡែក សំណុំរឿងទី២ ផ្តោតលើការស៊ើបអង្កេតរកអ្នកពាក់ព័ន្ធឬអ្នកនៅពីក្រោយខ្នងនៃអំពើបាញ់ប្រហារនេះ។ ប៉ុន្តែអស់រយៈពេលជាច្រើនឆ្នាំកន្លងទៅ រឿងក្តីដែលបានញែកជាពីរនេះហាក់នៅទ្រឹងមិនដំណើរការរហូតមកដល់បច្ចុប្បន្ន។
វីអូឌី ពុំអាចសុំការបំភ្លឺបន្ថែមពីអ្នកនាំពាក្យតុលាការក្រុងភ្នំពេញ លោក អ៊ី រិន្ទ និងអ្នកនាំពាក្យក្រសួងមហាផ្ទៃ លោក ខៀវ សុភ័គ បានទេ នៅថ្ងៃពុធនេះ។
យ៉ាងណា ក្រោយពីសំណុំរឿងទី១ ត្រូវបានបិទបញ្ចប់កាលពីខែឧសភា តុលាការកំពូលបានចេញសាលដីកាដោយតម្កល់សេចក្តីសម្រេចរបស់សាលាដំបូងរាជធានីភ្នំពេញទុកជាបានការ ដោយបន្តផ្តន្ទាទោសទណ្ឌិតឈ្មោះ ជួប សម្លាប់ ដាក់ពន្ធនាគារអស់មួយជីវិតដដែល ក្នុងសំណុំរឿង «ឃាតកម្មគិតទុកជាមុន» និង «ការកាន់កាប់អាវុធដោយគ្មានការអនុញ្ញាត»៕
