អ្នកជំនាញសិទ្ធិមនុស្សរបស់អង្គការសហប្រជាជាតិ (UN) កាលពីថ្ងៃពុធម្សិលមិញ បានអំពាវនាវដល់ប្រទេសនានាឱ្យមានការដាក់ទណ្ឌកម្មសេដ្ឋកិច្ចលើវិស័យប្រេងនិងឧស្ម័នរបស់ប្រទេសមីយ៉ាន់ម៉ា ដើម្បីដាក់សម្ពាធបន្ថែមទៀតដល់របបយោធាដែលក្តោបក្តាប់អំណាចនាពេលបច្ចុប្បន្ន។
ប្រទេសមីយ៉ាន់ម៉ាបានធ្លាក់ចូលក្នុងវិបត្តិ គិតចាប់តាំងពីក្រុមយោធាបានដណ្តើមយកអំណាចមកគ្រប់គ្រងកាលពីថ្ងៃទី១ ខែកុម្ភៈ ឆ្នាំ២០២១ និងបានផ្តួលរំលំរដ្ឋាភិបាលជាប់ឆ្នោតរបស់លោកស្រី អ៊ុងសាន ស៊ូជី ដែលបង្កឱ្យមានការខឹងសម្បារនៅទូទាំងប្រទេស។
ទីភ្នាក់ងារសារព័ត៌មាន Reuters បានស្រង់សម្ដីរបស់អ្នករាយការណ៍ពិសេសអង្គការសហប្រជាជាតិលើស្ថានភាពសិទ្ធិមនុស្សនៅមីយ៉ាន់ម៉ា លោក Thomas Andrews ដែលថ្លែងប្រាប់ក្រុមប្រឹក្សាសិទ្ធិមនុស្សរបស់អង្គការសហប្រជាជាតិថា ការដាក់សម្ពាធសេដ្ឋកិច្ចទៅលើប្រទេសមួយនេះ គឺដើម្បីកាត់បន្ថយចំណូលដែលរបបយោធាត្រូវការសម្រាប់បន្តសកម្មភាពរបស់ពួកគេ និងកាត់ផ្តាច់ការប្រើប្រាស់អាវុធរបស់ពួកគេ។
លោកបន្តថា៖ «ចំណូលដែលបានមកពីវិស័យប្រេងនិងឧស្ម័ន គឺជាហិរញ្ញវត្ថុដ៏សំខាន់សម្រាប់របបយោធា ហើយត្រូវបានប៉ាន់ស្មានថា ជាអ្វីដែលចាំបាច់សម្រាប់របបយោធាក្នុងការរក្សាកងកម្លាំងសន្តិសុខដែលកំពុងកាន់កាប់អំណាច»។
លោក Thomas Andrews ក៏បានអំពាវនាវឱ្យមានការបង្កើត «សម្ព័ន្ធភាពបន្ទាន់សម្រាប់ប្រជាជនមីយ៉ាន់ម៉ា (Emergency Coalition for the People of Myanmar)» ដែលនឹងហាមឃាត់ការនាំចេញអាវុធទៅកាន់របបយោធាផងដែរ។
លោកថា៖ «ប្រទេសនានាចាំបាច់ត្រូវតែដាក់សម្ពាធលើរបបយោធាមីយ៉ាន់ម៉ា»។
ជាមួយគ្នានេះផងដែរ សហរដ្ឋអាមេរិកក៏បានអំពាវនាវឱ្យមានការចាត់វិធានការម៉ឺងម៉ាត់ ដើម្បីទប់ស្កាត់ការបង្ហូរឈាមគ្នាបន្តទៀតនៅក្នុងប្រទេសមីយ៉ាន់ម៉ា។
លោកស្រី Meryn Schneiderhan តំណាងស្ថានបេសកកម្មសហរដ្ឋអាមេរិក ប្រចាំនៅអង្គការសហប្រជាជាតិ នាទីក្រុងហ្សឺណែវ ថ្លែងថា៖ «យើងជំរុញឱ្យប្រជាជាតិទាំងអស់បញ្ឈប់ការនាំចេញអាវុធនិងផ្ទេរបច្ចេកវិទ្យាដែលអាចប្រើបានពីរស្តង់ដារទៅកាន់របបយោធា»។
កាលពីពេលថ្មីៗនេះ លោកស្រី Michelle Bachelet ឧត្តមស្នងការទទួលបន្ទុកសិទ្ធិមនុស្សនៃអង្គការសហប្រជាជាតិ ក៏បានជំរុញឱ្យបណ្តាប្រទេសអាស៊ានបើកកិច្ចពិភាក្សានយោបាយជាមួយរបបយោធានិងមេដឹកនាំជាប់ឆ្នោតតាមបែបលទ្ធិប្រជាធិបតេយ្យនៅក្នុងប្រទេសមីយ៉ាន់ម៉ាផងដែរ។
លោកស្រីថា អាស៊ានបានយល់ព្រមលើការឯកភាពគ្នាចំនួន៥ចំណុច ជាមួយលោកឧត្ដមសេនីយ៍ មីន អ៊ុងឡាំង (Min Aung Hlaing) អគ្គមេបញ្ជាការកងយោធាមីយ៉ាន់ម៉ា កាលពីខែមេសា។
លោកស្រីបន្ថែមថា៖ «ប៉ុន្តែជាអកុសល មេដឹកនាំរបបយោធាមីយ៉ាន់ម៉ាបានបង្ហាញសញ្ញាតិចតួចពីការអនុវត្តតាមការព្រមព្រៀងនោះ»។
លោកស្រីបន្តថា៖ «វាគឺជាកិច្ចការបន្ទាន់សម្រាប់អាស៊ានក្នុងការជ្រើសតាំងបេសកជនពិសេសម្នាក់ឬក្រុមការងារមួយ ដើម្បីធានាឱ្យបានថា ការសន្ទនាខាងនយោបាយនេះអាចកើតមានឡើងបាន។ ខ្ញុំសូមលើកទឹកចិត្តដល់អាស៊ានឱ្យចូលរួមជាមួយមេដឹកនាំប្រជាធិបតេយ្យ និងអង្គការសង្គមស៊ីវិល មិនមែនត្រឹមតែពួកយោធាប៉ុណ្ណោះទេ»៕
