សាលាដំបូងរាជធានីភ្នំពេញ បានសម្រេចផ្ដន្ទាទោសអតីតអនុរដ្ឋលេខាធិការក្រសួងយុត្តិធម៌ម្នាក់ឱ្យជាប់ពន្ធនាគារ២ឆ្នាំកន្លះ ពាក់ព័ន្ធនឹងការកាន់កាប់ដីរបស់រដ្ឋទំហំប្រមាណ១ ០០០ហិកតា ស្ថិតនៅភូមិអន្ត្រេះ ឃុំអរបួនលើ នៅស្រុកកោះញែក ខេត្តមណ្ឌលគិរី។
អ្នកនាំពាក្យសាលាដំបូងរាជធានីភ្នំពេញ លោក សួស វិទ្យារ៉ាឌី ប្រាប់ វីអូឌី កាលពីថ្ងៃពុធថា ចៅក្រមជំនុំជម្រះសាលាដំបូងរាជធានីភ្នំពេញ កាលពីថ្ងៃទី១៤ ខែកញ្ញា ឆ្នាំ២០២១ បានប្រកាសសាលក្រមផ្ដន្ទាទោសអតីតអនុរដ្ឋលេខាធិការក្រសួងយុត្តិធម៌ លោក សេង សុវណ្ណារ៉ា ឱ្យជាប់ពន្ធនាគារ ២ឆ្នាំ៦ខែ ដោយចោទប្រកាន់៤បទល្មើស ក្នុងនោះរួមមាន បទ«ឆបោកមានស្ថានទម្ងន់ទោស» «កាន់កាប់អាវុធគ្មានលិខិតអនុញ្ញាត» «សម្លុតកុំឱ្យមានការប្តឹងផ្តល់» និង «រំលោភទ្រព្យសម្បត្តិសាធារណៈ»។
ក្រៅពីលោក សេង សុវណ្ណារ៉ា ក៏មានមនុស្ស៣នាក់ត្រូវបានតុលាការកាត់ទោសឱ្យជាប់ពន្ធនាគារម្នាក់ៗចំនួន២ឆ្នាំផងដែរ។
លោកថា៖ «គាត់សម្រេចផ្ដន្ទាទោសលោក សេង សុវណ្ណារ៉ា ២ឆ្នាំកន្លះ [ហើយ] ឈ្មោះ ស៊ីន ប៉ូ និង វ៉ាន់ សុធា និងលោក ប៉ូ ចយ ត្រូវបានផ្ដន្ទាទោស២ឆ្នាំដែរ»។
មនុស្សទាំង៣នាក់នេះត្រូវបានតុលាការចោទប្រកាន់ពីបទ «សមគំនិតក្នុងអំពើប៉ះពាល់កម្មសិទ្ធិនៃទ្រព្យសម្បត្តិសាធារណៈ» និងបទ «សម្លុតគំរាមកុំឱ្យដាក់ពាក្យបណ្តឹង» ដែលប្រព្រឹត្តនៅភូមិអន្ត្រេះ ឃុំអរបួនលើ ស្រុកកោះញែក ខេត្តមណ្ឌលគីរី កាលពីអំឡុងឆ្នាំ២០១៨ ដល់ឆ្នាំ២០២០។
អ្នកសម្របសម្រួលផ្នែកសិទ្ធិមនុស្ស ដីធ្លី និងព្រៃឈើ នៃបណ្ដាញសហគមន៍ជនជាតិដើមភាគតិចខេត្តមណ្ឌលគិរី លោក គ្រើង តុលា ចាត់ទុកការកាត់ទោសលោក សេង សុវណ្ណារ៉ា និងមនុស្ស៣នាក់ទៀតថាជាការព្រមានទៅអ្នកផ្សេងទៀត។ ប៉ុន្តែសម្រាប់យុត្តិធម៌វិញ លោកថា នៅមិនទាន់មាននៅឡើយ។ លោកបន្តថា អ្នកដែលទិញនិងរំលោភយកដីរដ្ឋ មិនមែនមានតែលោក សេង សុវណ្ណារ៉ា ម្នាក់នោះទេ ដោយថា បច្ចុប្បន្នមានអ្នកមានអំណាចធំៗនិងឧកញ៉ាជាច្រើនទៀតផងដែរ។
លោកថា៖ «គិតជាការរំលោភដីធ្លី វាមិនថយចុះទេ គឺកើតឡើង! ប៉ុន្តែមានការលាក់បាំង ទាំងឧកញ៉ា អ្នកធំ ទាំងអ្នកមានអីហ្នឹង គឺនៅតែមានការរំលោភដីធ្លី ប៉ុន្តែគ្រាន់តែថា ភាគច្រើនគេប្រើដៃឈ្មួញឬដៃប្រជាពលរដ្ឋហ្នឹងជាលេស ដើម្បីយកដីរបស់រដ្ឋនិងដីសហគមន៍ជាដើម»។
លោក គ្រើង តុលា ស្នើទៅរដ្ឋាភិបាលនិងស្ថាប័នពាក់ព័ន្ធត្រូវដកហូតដីទាំងនោះមកទុកជាសម្បត្តិរដ្ឋវិញ និងប្រើប្រាស់ដីដែលដកហូតបាននោះឱ្យមានប្រសិទ្ធភាព ដោយសារកន្លងមក លោកសង្កេតឃើញថា ដីដែលរដ្ឋាភិបាលផ្ដល់សម្បទានសង្គមកិច្ចមិនបានដល់ប្រជាពលរដ្ឋក្រីក្រឡើយ។
លោកថា៖ «ប្រើប្រាស់ដីឱ្យចំគោលដៅ អភិវឌ្ឍន៍ឱ្យប្រាកដអភិវឌ្ឍន៍ វិនិយោគឱ្យប្រាកដវិនិយោគ ផ្ដល់ដីសម្បទានសង្គមកិច្ចឱ្យប្រាកដសម្បទានសង្គមកិច្ច កុំឱ្យសម្បទានសង្គមបានទៅលើអ្នកមានទាំងអស់ ហើយអភិវឌ្ឍន៍បានទៅលើឧកញ៉ា ចែកគ្នាលក់១០ទៅ២០ហិកតា អាហ្នឹងយើងទទួលយកអត់បានទេ»។
មន្រ្តីកម្មវិធីពង្រឹងសិទ្ធិអំណាចសហគមន៍នៃសមាគមការពារសិទ្ធិមនុស្សអាដហុក លោក ប៉ែន ប៊ុណ្ណារ៍ សាទរចំពោះវិធានការច្បាប់ទៅអតីតអនុរដ្ឋលេខាធិការក្រសួងយុត្តិធម៌នេះ ប៉ុន្តែលោកជំរុញឱ្យរដ្ឋាភិបាលនិងស្ថាប័នជំនាញត្រូវស្វែងរកអ្នកពាក់ព័ន្ធផ្សេងទៀតដែលបានគប់គិតចុះហត្ថលេខាលក់ដីរដ្ឋនៅក្នុងខេត្តមណ្ឌលគិរី។
លោកថា៖ «អ៊ីចឹងយើងទាមទារឱ្យមានការស្រាវជ្រាវបន្ថែមទៀតលើករណីហ្នឹង ពីព្រោះដីរបស់គាត់ហ្នឹងមិនមែនគាត់មានអំណាចទៅយកបានដោយអំណាចគាត់ទេ។ តាមពិត មានអំណាចមេភូមិ មេឃុំ ចៅហ្វាយស្រុក រហូតដល់ចៅហ្វាយខេត្តទៀត ដែលចេញលិខិតហ្នឹង។ អ៊ីចឹង អ្នកពាក់ព័ន្ធហ្នឹង យើងឃើញអ្នកកាន់កាប់ហ្នឹងមួយផ្នែក វាជាគំរូហើយ តែគ្រាន់តែថា វានៅមានវិសមភាពនៅក្រោយទៀត»។
លោកបន្ថែមថា៖ «យើងចង់ឱ្យមានការស្រាវជ្រាវបន្ថែមទៀតទៅលើករណីហ្នឹង។ ហើយឥលូវហ្នឹងក៏មានករណីជាច្រើនទៀតដែលពាក់ព័ន្ធអ្នកមានអំណាចធំៗកំពុងកាប់រានដីដល់រាប់ពាន់ហិកតា ទោះបីជាមានប្រកាសពីរដ្ឋមន្ត្រីក្រសួងបរិស្ថានក៏ដោយ។ អ៊ីចឹងវាជាគំរូមួយដែលនាំមុខហើយ! អ៊ីចឹងដីផ្សេងៗទៀត ខ្ញុំគិតថា មិនពិបាកទេ ព្រោះសុទ្ធតែដីព្រៃ ដីអី»។
កាលពីថ្ងៃទី២ ខែមករា ឆ្នាំ២០១៩ អភិបាលខេត្តមណ្ឌលគិរី លោក ស្វាយ សំអ៊ាង បានចេញលិខិតឱ្យអនុរដ្ឋលេខាធិការក្រសួងយុត្តិធម៌ លោក សេង សុវណ្ណារ៉ា កាន់កាប់ដីធ្លីទំហំ១ ០០០ហិកតា ស្ថិតនៅភូមិអន្ត្រេះ ឃុំអរបួនលើ នៅស្រុកកោះញែក ប៉ុន្តែអភិបាលខេត្តរូបនេះបានលុបចោលការទទួលសិទ្ធិកាន់កាប់ដីធ្លីនេះវិញ បន្ទាប់ពីរកឃើញថា ដីនោះស្ថិតនៅក្នុងដែនអភិរក្សគ្រប់គ្រងដោយក្រសួងបរិស្ថាន។
លោក សេង សុវណ្ណារ៉ា ត្រូវបានដកហូតតំណែងអនុរដ្ឋលេខាធិការក្រសួងយុត្តិធម៌ កាលពីថ្ងៃទី២៤ ខែសីហា ឆ្នាំមុន តែ១០ថ្ងៃប៉ុណ្ណោះក្រោយពីត្រូវបានរដ្ឋមន្ត្រីក្រសួងមហាផ្ទៃ លោក ស ខេង សម្រេចដកចេញពីសមាជិកក្រុមការងារថ្នាក់ជាតិចុះមូលដ្ឋាននៅខេត្តមណ្ឌលគិរី ដោយដាក់លោក មាស ប្រុស ប្រធានរដ្ឋបាលសាលាដំបូងខេត្តមណ្ឌលគិរី ជំនួសវិញ៕