តុលាការខេត្តកំពង់ឆ្នាំង បានសាកសួរសកម្មជនដីធ្លីភូមិឡពាងចំនួន៤នាក់ ពាក់ព័ន្ធនឹងការចោទប្រកាន់ពីបទប៉ុនប៉ងឃាតកម្ម និងបំផ្លិចបំផ្លាញដោយចេតនា ដោយចោទថា សកម្មជនដីធ្លីទាំងនោះបានប្រើប្រាស់កាំបិត ដើម្បីបំផ្លាញសំណាញ់របស់អ្នកនេសាទខុសច្បាប់ ក្នុងឃុំតាជេស ស្រុកកំពង់ត្រឡាច។
ការសាកសួរនេះ ធ្វើឡើងកាលពីថ្ងៃទី១៥ ខែកញ្ញា បន្ទាប់ពីតុលាការខេត្តកំពង់ឆ្នាំងបានចេញដីកាកោះហៅមួយចុះហត្ថលេខាដោយព្រះរាជអាជ្ញារង លោក ឡុង ស៊ីថា ដែលតម្រូវឱ្យសកម្មជនដីធ្លីទាំង៤នាក់ រួមមានឈ្មោះ ស្ងួន ញឿន, ឈ្មោះ ស្ងួន ញ៉ាន, ឈ្មោះ អ៊ុំ សុភី និងឈ្មោះ អ៊ុន ម៉ុន ត្រូវបង្ហាញខ្លួននៅថ្ងៃទី១៥ ខែកញ្ញា ពាក់ព័ន្ធនឹងពាក្យបណ្តឹងរបស់ឈ្មោះ ប៉ក់ សុទន ដែលបានប្តឹងកាលពីថ្ងៃទី២០ ខែមេសា ឆ្នាំ២០២១។
លោក ស្ងួន ញឿន ដែលជាស្វាមីរបស់អ្នកស្រី អ៊ុំ សុភី ស្ថិតនៅក្នុងការសាកសួរនោះដែរ បានថ្លែងថា ព្រះរាជអាជ្ញារង លោក ឡុង ស៊ីថា បានសាកសួរពួកគាត់ថា តើសកម្មជនទាំង៤នាក់បានធ្វើសកម្មភាពដេញវាយនិងដេញកាប់ក្រុមរងគ្រោះឈ្មោះ ប៉ក់ សុទន ដែរឬទេ?
លោកបានថ្លែងថា ៖«ព្រឹកមិញ ព្រះរាជអាជ្ញាហៅយើងទៅសួរពីបញ្ហានៅក្នុងរឿងបឹងអភិរក្សហ្នឹង។ គាត់សួរថាយើងបានការពារបឹងហ្នឹងប៉ុន្មានឆ្នាំហើយ! យើងប្រាប់ យើងបានការពារ២០ឆ្នាំ។ [សំណួដែលព្រះរាជអាជ្ញារងបានសាកសួរ] តើក្នុង២០ឆ្នាំហ្នឹងតើអាជ្ញាធរទទួលស្គាល់ទេ? យើងថាអាជ្ញាធរអត់ទទួល ទោះបីយើងដើរធ្វើលិខិតគ្រប់កន្លែងក៏ដោយ ប៉ុន្តែអាជ្ញាធរអត់ទទួលស្គាល់ទេ»។
លោកបានបន្ថែមថា ព្រះរាជអាជ្ញារង លោក ឡុង ស៊ីថា ក៏បានសួរថា តើក្រុមសកម្មជនបានកាត់សំណាញ់និងប៉ុនប៉ងសម្លាប់គេទេ? ហើយបានទាមទារឱ្យសកម្មជនសហគមន៍សងការខូចខាត តែក្រុមសកម្មជនបានអះអាងថា អាជ្ញាធរមូលដ្ឋានទុកជាអសារបង់ ដោយសារការនេសាទនៅបឹងនោះជាកន្លែងអភិរក្ស។
លោកបានថ្លែងបញ្ជាក់ទៅកាន់ព្រះរាជអាជ្ញាទៀតថា លោកពុំបានដឹងរឿងកាត់សំណាញ់នោះទេ ដោយសារតែលោកនិងភរិយារបស់លោកបាននិងកំពុងតែធ្វើការសំណង់។ ហើយលោកបានទទួលព័ត៌មានថា មានគេចូលបង់សំណាញ់ក្នុងតំបន់អភិរក្ស តែប្អូនរបស់លោកបានទៅមុន ហើយបានកាត់សំណាញ់នោះ ហើយមុនពេលកាត់គឺគាត់បានរាយការណ៍ទៅប៉ូលិសផងដែរ។
លោកបានបញ្ជាក់ថា៖ «ខ្ញុំប្រាប់ថា ខ្ញុំអត់បានទៅកាត់សំណាញ់គេទេ ហើយអត់ដឹងរឿងអ្វីទេ! ខ្ញុំការពារដើម្បីប្រយោជន៍រួម។ ជនល្មើសដែលមកបង់សំណាញ់ គឺយើងបានហាមឃាត់ជាច្រើនលើកច្រើនសារហើយ មិនស្តាប់ទេ»។
លោកបានបន្ថែមថា៖ «ពួកខ្ញុំមិនបានដេញកាប់ពួកគាត់ទេ មានតែពួកគាត់ទេដែលដេញវាយនិងរកកាប់ពួកខ្ញុំ។ រឿងនេះសុទ្ធតែជារឿងប្រតិដ្ឋទាំងអស់ ថាយើងដេញសម្លាប់គេ តែយើងអត់បានធ្វើទេ ហើយយើងមិនដឹងផង»។
លោកបានថ្លែងថា៖ «យើងសំណូមពរថាយើងមិនទទួលយកបណ្តឹងរបស់គាត់ទេ ដោយសារតែយើងអត់បានធ្វើ ហើយទម្លាក់ការចោទប្រកាន់ចោល»។
លោក ស្ងួន ញ៉ាន ដែលជាប្អូនប្រុសរស់លោក ស្ងួន ញឿន បានថ្លែងថា លោកពិតជាបានកាត់សំណាញ់របស់ឈ្មោះ ប៉ក់ សុទន តែលោកពុំបានប៉ុនប៉ងសម្លាប់ពួកគេទេ។
លោកបានបញ្ជាក់ថា៖ «ព្រះរាជអាជ្ញាបានសួរថា តើហេតុអ្វីបានជាខ្ញុំទៅកាត់សំណាញ់និងបានទៅភ្ជង់គេដោយប្រើកាំបិទមែនដែរឬទេ? ខ្ញុំមិនបានយកកាំបិតទៅភ្ជង់គេទេ ខ្ញុំបានហាមឃាត់គាត់ជាលើកទី១ ទី២ និងទី៣ ប៉ុន្តែគាត់អត់ព្រម ខ្ញុំក៏បានយកកាំបិតទៅកាត់សំណាញ់ និងឧបករណ៍ដែលគាត់ធ្វើសកម្មភាពនៅកន្លែងខ្ញុំអភិរក្ស»។
លោកបានបន្ថែមថា ព្រះរាជ្ញាបានទាមទារឱ្យលោកផ្តល់សំណងដល់ឈ្មោះ ប៉ក់ សុទន តែលោកបដិសេធដោយសារលោកការពារនិងអភិរក្សបឹងពោធិ៍សម្រាប់សហគមន៍ ខណៈអ្នកភូមិព្រួយបារម្ភខ្លាចបាត់បង់ពូជត្រីក្នុងសហគមន៍។
លោកបានបញ្ជាក់ថា៖ «ខ្ញុំមិនអាចសងទេ ដោយសារតែកន្លែងនេះ ខ្ញុំការពារ។ ហើយអ្វីដែលខ្ញុំធ្វើ គឺជាអំពើត្រឹមត្រូវ ហើយការពារដើម្បីផលប្រយោជន៍ប្រជាជន ហើយបើមានកំហុស ហើយជាប់គុក ក៏ខ្ញុំស្វាគមន៍ដែរ»។
លោក ហ៊ី សុខចាន់ មេប៉ុស្តិ៍ឃុំតាជេស បានថ្លែងថា លោកទទួលស្គាល់សកម្មជនទាំងនោះពិតជាបានជួយការពារតំបន់អភិរក្ស បើទោះជាអាជ្ញាធរមិនទាន់ទទួលស្គាល់ក្តី។
លោកបានបញ្ជាក់ថា៖ «ខាងអាជ្ញាធរមិនទាន់ទទួលស្គាល់ទេ។ គាត់ការពារហ្នឹង វាល្អដែរ! មានអ្នកខ្លះមួយចំនួនមិនសប្បាយចិត្ត ដោយសារតែគាត់អីនៅក្នុងហ្នឹង ដូច្នេះហើយវាមានទំនាស់»។
លោកបានបន្ថែមថា នៅតំបន់បឹងអភិរក្សមានបទល្មើសនេសាទតិចតួចតែប៉ុណ្ណោះ ដោយសារតែអាជ្ញាធរធ្វើការបង្ក្រាប មិនដូចការលើកឡើងរបស់ប្រជាជននោះទេ។
លោក ស្ងួន ញ៉ាន បានបន្ថែមថា កាលពីខែមករា ពួកលោកបានរឹបអូសសំណាញ់របស់លោក ប៉ក់ សុទន និងមួយខែក្រោយមក លោក ប៉ក់ សុទន បានធ្វើការបំផ្លាញនិងដុតរោងនៅកន្លែងការពារតំបន់អភិរក្សត្រីរបស់សហគមន៍។ បញ្ហានេះ ពួកគាត់បានដាក់ពាក្យបណ្តឹងកាលពីថ្ងៃ២២ ខែកុម្ភៈ ចំពោះការបំផ្លាញនិងដុតរោងកន្លែងការពារតំបន់អភិរក្សត្រីរបស់សហគមន៍ ប៉ុន្តែមិនមានសមត្ថកិច្ចណាម្នាក់ចាត់ការលើបណ្តឹងនេះទេ៕
