ក្រសួងសុខាភិបាលបើកយុទ្ធនាការចាក់វ៉ាក់សាំងកូវីដ-១៩ (ស៊ីណូវ៉ាក់) ដូសទី១ និងដូសទី២ ក្នុងក្របខណ្ឌទូទាំងប្រទេស ជូនដល់កុមារដែលមានអាយុចាប់ពី៦ឆ្នាំដល់អាយុក្រោម១២ឆ្នាំ ចាប់ពីថ្ងៃទី១៧ ខែកញ្ញា ស្អែកនេះ។
ក្នុងសេចក្តីប្រកាសព័ត៌មានរបស់ក្រសួងសុខាភិបាល បានឱ្យដឹងនៅថ្ងៃទី១៦ ខែកញ្ញានេះថា គណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស នឹងផ្តល់ការចាក់វ៉ាក់សាំង ដូសទី១ និងដូសទី២ ដោយប្រើប្រាស់វ៉ាក់សាំងស៊ីណូវ៉ាក់ ជូនដល់កុមារដែលមានអាយុចាប់ពី៦ឆ្នាំ ដល់អាយុក្រោម១២ឆ្នាំ នៅរាជធានីភ្នំពេញ ខេត្តកណ្តាល ខេត្តព្រះសីហនុ និងខេត្តកោះកុង ដែលនឹងចាប់ផ្តើមយុទ្ធនាការចាក់ពីថ្ងៃទី១៧ ខែកញ្ញា ឆ្នាំ២០២១ ខណៈ២១ខេត្តទៀតនឹងត្រូវចាប់ផ្តើមយុទ្ធនាការចាក់នៅថ្ងៃទី១៨ ខែកញ្ញា ឆ្នាំ២០២១។
សេចក្តីប្រកាសព័ត៌មានដដែលបញ្ជាក់ថា ចំពោះកូនចៅរបស់មន្ត្រីរាជការនិងមន្ត្រីជាប់កិច្ចសន្យាដែលកំពុងបម្រើការងារថ្នាក់ជាតិ អាចឱ្យពួកគេទៅចាក់នៅថ្ងៃស្អែកនេះ តាមមន្ទីរពេទ្យជាតិ រួមមាន មន្ទីរពេទ្យកាល់ម៉ែត និងមន្ទីរពេទ្យអង្គឌួង, មន្ទីរពេទ្យកុមារជាតិ, មជ្ឈមណ្ឌលជាតិគាំពារមាតា និងទារក, មន្ទីរពេទ្យមិត្តភាពខ្មែរ-សូវៀត និងមន្ទីរពេទ្យគន្ធបុប្ឆា ជាដើម។
ចំណែកកូនចៅរបស់មន្ត្រីអង្គការសហប្រជាជាតិ មន្ត្រី-បុគ្គលិកស្ថានទូត ស្ថានកុងស៊ុល ស្ថាប័នហិរញ្ញវត្ថុអន្តរជាតិនានា មន្ត្រីបុគ្គលិកអង្គការជាតិ អន្តរជាតិ និងដៃគូផ្សេងៗទៀត កូនចៅអ្នកឧកញ៉ា លោកឧកញ៉ា អាចនាំកូនចៅទៅចាក់វ៉ាក់សាំងនៅមន្ទីរពេទ្យកាលម៉ែត ចាប់ពីថ្ងៃទី៥ ដល់ថ្ងៃទី១៣ ខែតុលា ឆ្នាំ២០២១ ផងដែរ ។
លោកនាយករដ្ឋមន្ត្រី ហ៊ុន សែន បានថ្លែងតាមរយៈសារជាសំឡេងនៅថ្ងៃទី១៥ ខែកញ្ញា ឆ្នាំ២០២១នេះថា គិតមកដល់ពេលនេះ រដ្ឋាភិបាលបានចាក់វ៉ាក់សាំងដល់កុមារនិងយុវវ័យចាប់ពីអាយុ១២ឆ្នាំដល់១៨ឆ្នាំ បានប្រមាណ១លាន៧សែននាក់រួចហើយ។ លោកបន្តថា ជំហានបន្ទាប់ រដ្ឋាភិបាលបានសម្រេចបើកយុទ្ធនាការចាក់វ៉ាក់សាំងការពារជំងឺកូវីដ-១៩ ដល់កុមារអាយុចាប់ពី៦ឆ្នាំដល់១២ឆ្នាំបន្ថែមទៀត ចាប់ពីថ្ងៃសុក្រ ទី១៧ ខែកញ្ញា ឆ្នាំ២០២១នេះទៅ ដើម្បីឈានទៅបើកសាលាបឋមសិក្សាឡើងវិញ។
បើតាមលោកនាយករដ្ឋមន្ត្រី ហ៊ុន សែន កុមារដែលមានអាយុចន្លោះពី៦ឆ្នាំទៅ១២ឆ្នាំ មានចំនួនប្រមាណជាង១លាន ៨សែននាក់។
លោកនាយករដ្ឋមន្ត្រី ហ៊ុន សែន ក៏បានបង្ហើបឱ្យដឹងដែរថា រដ្ឋាភិបាលក៏កំពុងពិចារណាជំហានបន្ទាន់ក្នុងការចាក់វ៉ាក់សាំងការពារជំងឺកូវីដ-១៩នេះ ដល់កុមារអាយុចន្លោះពី៣ឆ្នាំដល់៦ឆ្នាំ ស្ថិតក្នុងកម្រិតមត្តេយ្យសិក្សា ក្រោយពីអនុវត្តយុទ្ធនាការចាក់វ៉ាក់សាំងដល់កុមារអាយុ៦ឆ្នាំដល់១២ឆ្នាំរួច៕