អាជ្ញាធរខេត្តកំពង់ឆ្នាំងនឹងស្នើដល់ក្រសួងមហាផ្ទៃឱ្យជួយដោះស្រាយវិវាទដីធ្លីរបស់ប្រជាពលរដ្ឋជាង៥០០គ្រួសារនៅខេត្តកំពង់ឆ្នាំងដែលជាប់ព្រំប្រទល់ជាមួយខេត្តពោធិ៍សាត់ ក្រោយប្រជាពលរដ្ឋនាំគ្នាតវ៉ាបិទកំណាត់ផ្លូវជាតិលេខ៥។
កាលពីថ្ងៃទី១៩ ខែកញ្ញា ឆ្នាំ២០២១ ប្រជាពលរដ្ឋជាង២០០នាក់ នៅស្រុកបរិបូណ៌ ខេត្តកំពង់ឆ្នាំង ជាប់ព្រំប្រទល់ស្រុកក្រគរ ខេត្តពោធិ៍សាត់ បាននាំគ្នាឈរលើកបដា និងតវ៉ាបិទកំណាត់ផ្លូវជាតិលេខ៥ ក្បែរព្រំប្រទល់នៃខេត្តទាំង២នេះ ជាង២ម៉ោង ដើម្បីជំរុញឱ្យអាជ្ញាធរពាក់ព័ន្ធជួយដោះស្រាយវិវាទដីធ្លីរវាងពលរដ្ឋនៅខេត្តកំពង់ឆ្នាំងនិងអាជ្ញាធរខេត្តពោធិ៍សាត់ដែលគ្រោងយកដីនោះទៅចែកឱ្យពលរដ្ឋខ្លួន។
អភិបាលខេត្តកំពង់ឆ្នាំង លោក ស៊ុន សុវណ្ណារិទ្ធ ប្រាប់ វីអូឌី នៅថ្ងៃចន្ទនេះថា ក្រោយពលរដ្ឋបិទកំណាត់ផ្លូវជាតិលេខ៥ លោកបានឱ្យមន្ត្រីក្រោមឱវាទទៅសម្របសម្រួលជាមួយពលរដ្ឋ ដើម្បីបើកផ្លូវវិញ។ លោកថា ព្រឹកមិញនេះ តំណាងពលរដ្ឋ៥នាក់បានមកជួបលោក ដើម្បីសុំឱ្យជួយដោះស្រាយរឿងវិវាទដីធ្លីរបស់ពួកគេ។
អភិបាលខេត្តរូបនេះអះអាងថា ជុំវិញជម្លោះដីធ្លីរវាងប្រជាពលរដ្ឋនៅខេត្តកំពង់ឆ្នាំងនិងអាជ្ញាធរខេត្តពោធិ៍សាត់នេះ លោកនឹងព្យាយាមសម្របសម្រួលជាមួយអាជ្ញាធរខេត្តពោធិ៍សាត់ រួមទាំងស្នើដល់ក្រសួងមហាផ្ទៃឱ្យជួយដោះស្រាយបញ្ហាព្រំប្រទល់រវាងខេត្តទាំង២ និងដោះស្រាយបញ្ចប់វិវាទដីធ្លីជូនពលរដ្ឋរស់នៅតំបន់ព្រំប្រទល់នោះផងដែរ។
លោកបន្ថែមថា៖ «ទី១ ខ្ញុំប្រាប់ពលរដ្ឋឱ្យឈប់ធ្វើសកម្មភាពបិទផ្លូវ ព្រោះវាខុសច្បាប់។ ទី២ ខ្ញុំឱ្យក្រុមការងារថ្នាក់ខេត្តធ្វើជាមួយអាជ្ញាធរខេត្តពោធិ៍សាត់ ដើម្បីដោះស្រាយរឿងនេះ និងមួយទៀត ក្រុមការងារថ្នាក់ស្រុកនិងខេត្តធ្វើការងាររួមគ្នា ដើម្បីធ្វើជំរឿនប្រជាជនដែលអាស្រ័យផលនិងកំពុងមានជម្លោះហ្នឹងឱ្យច្បាស់លាស់ ដើម្បីយើងយកទៅចរចារកដំណោះស្រាយជាមួយអាជ្ញាធរខេត្តពោធិ៍សាត់។ ហើយបញ្ហាពាក់ព័ន្ធជាមួយព្រំប្រទល់ជាមួយ យើងនឹងធ្វើស្នើទៅក្រសួងមហាផ្ទៃឱ្យគាត់ជួយដោះស្រាយដែរ ជួយពិនិត្យមើលទាំង២ រឿងជម្លោះដីធ្លីផង និងរឿងព្រំប្រទល់ហ្នឹងផង»។
ពលរដ្ឋម្នាក់រស់នៅឃុំត្រពាំងចាន់ ស្រុកបរិបូណ៌ ខេត្តកំពង់ឆ្នាំង ដែលជាប់ព្រំប្រទល់ខេត្តពោធិ៍សាត់ លោក ខែម នី ប្រាប់ វីអូឌី ថាគ្រួសារលោកមានដីស្រែទំហំជាង២ហិកតា ស្ថិតនៅក្នុងឃុំអន្សាចំបក់ ស្រុកក្រគរ ខេត្តពោធិ៍សាត់ ដោយបានអាស្រ័យផលបន្តពីឪពុកម្តាយ តាំងពីក្រោយសម័យប៉ុលពត រហូតមកដល់បច្ចុប្បន្ននេះ។
ពលរដ្ឋបន្តថា កាលឆ្នាំ២០២០ រូបលោកនិងពលរដ្ឋនៅកំពង់ឆ្នាំងរាប់រយគ្រួសារទៀតដែលមានដីធ្លីនៅខេត្តពោធិ៍សាត់ ត្រូវបានបាត់បង់ដីធ្លីដោយសារអាជ្ញាធរខេត្តពោធិ៍សាត់ដកហូតយកបែងចែកឱ្យពលរដ្ឋផ្សេងទៀតយ៉ាងអយុត្តិធម៌។
លោកបន្ថែមថា៖ «ចំពោះគ្រួសារខ្ញុំផ្ទាល់ ប្រសិនបើមានការរឹបអូសយកដីខ្ញុំទាំងអស់ហ្នឹងមែន គ្រួសារខ្ញុំនឹងជួបបញ្ហាជីវភាពជាខ្លាំងមិនខាន ពីព្រោះខ្ញុំប្រកបមុខរបរធ្វើកសិកម្មអាស្រ័យផលនៅលើដី ចុះបើគេដកយកដីអស់ តើគ្រួសារខ្ញុំបានអីធ្វើកសិកម្ម បានអីបង្កបង្កើនផលចិញ្ចឹមកូនចិញ្ចឹមគ្រួសារ»។
ពលរដ្ឋម្នាក់ទៀតនៅឃុំត្រពាំងចាន់ដែលសុំមិនបញ្ចេញឈ្មោះដោយបារម្ភពីការចាប់ខ្លួន បាននិយាយថា គ្រួសារអ្នកស្រីមានដីជាប់ព្រំប្រទល់ក្នុងខេត្តពោធិ៍សាត់ជាង២ហិកតាសម្រាប់បង្កបង្កើនផលធ្វើស្រែចិញ្ចឹមជីវិតនោះ ក៏ត្រូវបានអាជ្ញាធរខេត្តពោធិ៍សាត់ដកហូតយកទៅបែងចែកឱ្យពលរដ្ឋផ្សេងដែរ។
អ្នកស្រីបន្តថា អាជ្ញាធរខេត្តពោធិ៍សាត់បានចោទពលរដ្ឋនៅខេត្តកំពង់ឆ្នាំងថាបានចូលទន្ទ្រានយកដីក្នុងខេត្តពោធិ៍សាត់ដោយខុសច្បាប់ ខណៈដីនោះគ្រួសារអ្នកស្រីបានចូលទៅអាស្រ័យផលបន្តពីឪពុកម្តាយតាំងពីឆ្នាំ១៨៨១មកម៉្លេះ។ អ្នកស្រីបន្ថែមថា ការលើកឡើងរបស់អាជ្ញាធរខេត្តពោធិ៍សាត់នេះហាក់មានការរើសអើងពលរដ្ឋនៅខេត្តផ្សេង។
អ្នកស្រីបន្ថែមថា៖ «គេចោទថា ដូនតាយើងហ្នឹងមកលួចធ្វើស្រែលើដីនៅខេត្តគេ ដីខេត្តឯងមិនធ្វើ មកធ្វើនៅខេត្តគេ! ប៉ុន្តែពលរដ្ឋពួកខ្ញុំបានទៅគាស់ទៅហែកធ្វើនឹងដៃនៅតំបន់ហ្នឹងតាំងពីសម័យខ្មែរក្រហមនៅម៉្លេះ។ ខ្ញុំយល់ថា អាជ្ញាធរខេត្តពោធិ៍សាត់ធ្វើដូចជាមានការបែងចែក ដូចជាមានការរើសអើងប្រជាជនខេត្តនេះខេត្តនោះ។ អ៊ីចឹងខ្ញុំសំណូមពរដល់សម្តេចឱ្យជួយដោះស្រាយដីហ្នឹង និងចេញបណ្ណកម្មសិទ្ធិជូនពលរដ្ឋផ្សេង»។
ពលរដ្ឋរូបនេះបន្តថា ទាំងអ្នកស្រីនិងពលរដ្ឋផ្សេងទៀតកំពុងមានការព្រួយបារម្ភពីការបាត់បង់ដីធ្លីនិងការចាប់ខ្លួនផងដែរ ខណៈកន្លងមកមានអ្នកភូមិ២នាក់ហើយដែលសកម្មក្នុងការតវ៉ារឿងដីធ្លីនេះ ត្រូវអាជ្ញាធរខេត្តពោធិ៍សាត់ចាប់ខ្លួន បើទោះជាក្រោយមកមានការដោះលែងវិញ។ អ្នកស្រីថា អាជ្ញាធរតែងតែគំរាមកំហែងពីការចាប់ខ្លួនចំពោះពលរដ្ឋណាដែលសកម្មចេញមុខតវ៉ា។
អភិបាលរងខេត្តពោធិ៍សាត់ លោក ចេង ឡៃ សុំមិនអធិប្បាយលើរឿងនេះទេ ដោយលោកបង្វែរឱ្យទៅសួរអភិបាលខេត្ត លោក ម៉ៅ ធនិន វិញ ប៉ុន្តែ វីអូឌី មិនអាចសុំការឆ្លើយតបពីលោក ម៉ៅ ធនិន បានទេនៅថ្ងៃនេះ។
ក្នុងលិខិតមួយចុះថ្ងៃទី១២ ខែឧសភា ឆ្នាំ២០២១ របស់លោកចៅហ្វាវាំង និងជាអ្នកតំណាងរាស្ត្រខេត្តកំពង់ឆ្នាំង លោក គង់ សំអុល ដែលផ្ញើទៅរដ្ឋមន្ត្រីក្រសួងមហាផ្ទៃ លោក ស ខេង បានឱ្យដឹងថា ប្រជាពលរដ្ឋ៥៧២គ្រួសារនៅស្រុកបរិបូណ៌ ខេត្តកំពង់ឆ្នាំង បានចូលអាស្រ័យផលលើដីក្នុងភូមិសាស្ត្រខេត្តពោធិ៍សាត់តាំងមុនសម័យសង្គ្រាម និងក្រោយសម័យសង្គ្រោមរហូតមកដល់បច្ចុប្បន្ននេះ ដោយអភិបាលខេត្តពោធិ៍សាត់ លោក ម៉ៅ ធនិន បានដឹងឮនិងអនុញ្ញាតឱ្យបង្កបង្កើនផល ព្រមទាំងសន្យាថានឹងកាត់ឆ្វៀលដីនោះជូនពលរដ្ឋនៅកំពង់ឆ្នាំងទៀត។
លិខិតដដែលនេះបញ្ជាក់ថា នៅដើមរដូវវស្សាឆ្នាំ២០២១នេះ ពលរដ្ឋនៅខេត្តកំពង់ឆ្នាំងបានទៅភ្ជួររាស់ដើម្បីបង្កបង្កើនផល ប៉ុន្តែត្រូវអាជ្ញាធរមូលដ្ឋាននៅខេត្តពោធិ៍សាត់រារាំងមិនឱ្យចូលអាស្រ័យផលឡើយ ដែលធ្វើពលរដ្ឋផ្ទុះការតវ៉ាជាបន្តបន្ទាប់រហូតមានការបិទកំណាត់ផ្លូវជាតិលេខ៥។
ក្នុងលិខិតនេះ លោក គង់ សំអុល បានស្នើដល់រដ្ឋមន្ត្រីក្រសួងមហាផ្ទៃ លោក ស ខេង ជួយដោះស្រាយផងដែរ។
បើតាមញត្តិរបស់ពលរដ្ឋបញ្ជាក់ថា ពលរដ្ឋចំនួន៥៧២គ្រួសារនេះមកពីឃុំចំនួន៥ នៃស្រុកបរិបូណ៌ ខេត្តកំពង់ឆ្នាំង និងមានផ្ទៃដីសរុបទំហំ១ ៦៦១ហិកតា ដែលបានរងផលប៉ះពាល់ដោយអាជ្ញាធរខេត្តពោធិ៍សាត់បានដកហូតយកទៅបែងចែកឱ្យពលរដ្ឋរបស់ខ្លួន៕