អ្នកជំនាញសិទ្ធិមនុស្សរបស់អង្គការសហប្រជាតិ (UN) បន្តស្វែងយល់ពីជំហររដ្ឋាភិបាលកម្ពុជាក្នុងការប្តេជ្ញាចិត្តគោរពគោលការណ៍សិទ្ធិមនុស្ស ខណៈក្រុមអង្គការសង្គមស៊ីវិលក្នុងស្រុកបន្តចេញលិខិតជំហររួមគ្នាបារម្ភពីការគំរាមកំហែងសេរីភាពបញ្ចេញមតិដែលរាលដាលដល់អ្នកវិភាគបញ្ហាសង្គម។
កាលពីថ្ងៃអង្គារម្សិលមិញនេះ អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា លោក វិទិត មុនតាប៊ន (Vitit Muntarbhorn) បានជួបពិភាក្សាជាមួយនាយករដ្ឋមន្ត្រីកម្ពុជា លោក ហ៊ុន សែន តាមប្រព័ន្ធបណ្តាញសង្គម។
ក្រោយជំនួបនោះ លោកនាយករដ្ឋមន្ត្រី ហ៊ុន សែន បានសរសេរខ្លឹមសារមួយចំនួននៅលើហ្វេសប៊ុករបស់លោកថា ក្នុងជំនួបនោះ អ្នកជំនាញសិទ្ធិមនុស្សអន្តរជាតិបានលើកឡើងដោយផ្តោតលើបញ្ហាចំនួន៤ចំណុច រួមទាំងបញ្ហាសិទ្ធិមនុស្ស សិទ្ធិអ្នកកំពុងជាប់ពន្ធនាគារ លំហសេរីភាពសង្គមស៊ីវិល និងសិទ្ធិនយោបាយ។
ជាការឆ្លើយតប លោកនាយករដ្ឋមន្ត្រី ហ៊ុន សែន បានថ្លែងថា ជាអាទិភាពកម្ពុជា តាំងពីដើមរហូតមក គឺសិទ្ធិរស់រានមានជីវិតរបស់កម្ពុជា ស្របតាមរដ្ឋធម្មនុញ្ញផង និងស្របតាមអនុសញ្ញាអន្តរជាតិផង។
លោកគូសបញ្ជាក់ថា ដើម្បីរក្សានូវសិទ្ធិរស់រានមានជីវិតនេះ កម្ពុជាត្រូវដាច់ខាតរក្សាឱ្យបាននូវសុខសន្តិភាពនិងស្ថិរភាពសង្គម រួមជាមួយការចាក់វ៉ាក់សាំងដល់ប្រជាជនកម្ពុជាផងដែរ។ បន្ថែមពីនេះ លោកថា កម្ពុជាបានយកចិត្តទុកដាក់ខ្ពស់ចំពោះអ្នកជាប់ទោសស្រាលជាស្ត្រី និងអ្នកដែលមានកូនជាដើម តាមរយៈការរៀបចំកន្លែងថ្មី ដើម្បីបង្ការជំងឺកូវីដ-១៩។
លើសពីនេះ មេដឹកនាំកម្ពុជាបានគូសបញ្ជាក់ថា កម្ពុជាចង់មានបរិស្ថាន សង្គមកិច្ច សេដ្ឋកិច្ច និងនយោបាយល្អ ជាមួយនឹងលំហលទ្ធិប្រជាធិបតេយ្យ ហើយអ្វីដៃលកម្ពុជាចង់បានកិច្ចសហប្រតិបត្តិការជាមួយអ្នកជំនាញសិទ្ធិមនុស្សអន្តរជាតិ គឺការបង្កើតបរិយាកាសដែលមានជំនឿជឿជាក់លើគ្នាទៅវិញទៅមក ប្រកបដោយការស្ថាបនាឈានឆ្ពោះទៅមុខលើបញ្ហាសិទ្ធិមនុស្ស និងមិនទម្លាក់កំហុសឱ្យគ្នាទៅវិញទៅមក។
ជំនួបកំពូលជាមួយមេដឹកនាំកម្ពុជានេះ បានធ្វើឡើង៣ថ្ងៃ បន្ទាប់ពីក្រុមអង្គការសង្គមស៊ីវិលចំនួន២៨ បានចេញលិខិតចំហរួមគ្នា អំពាវនាវឱ្យរដ្ឋាភិបាលកម្ពុជាបញ្ឈប់ការគំរាមកំហែងទៅលើអ្នកវិភាគ ក្រោយពីលោកនាយករដ្ឋមន្ត្រី ហ៊ុន សែន បានថ្លែងជាសាធារណៈ នាពេលថ្មីៗនេះ ដោយចាត់ទុកថា សារនោះជាការគំរាមកំហែងទៅលើអ្នកវិភាគ និងជាការគំរាមកំហែងសេរីភាពខាងការបញ្ចេញមតិនៅកម្ពុជា។
ក្រុមអង្គការទាំងនោះក៏បានអំពាវនាវដល់រដ្ឋាភិបាលកម្ពុជា បញ្ឈប់ការបំភិតបំភ័យលើអ្នកវិភាគបញ្ហាសង្គមនៅកម្ពុជានិងសំឡេងរិះគន់ផ្សេងទៀត ដោយគ្រាន់តែអ្នកទាំងនោះបញ្ចេញទស្សនៈនិងការយល់ឃើញសម្រាប់ផលប្រយោជន៍សាធារណៈនៅកម្ពុជា។
ក្រុមអង្គការសង្គមស៊ីវិលទាំងនោះក៏ជំរុញផងដែរ ឱ្យរដ្ឋាភិបាលគោរពសិទ្ធិសេរីភាពក្នុងការបញ្ចេញមតិនៅកម្ពុជា តបតាមរដ្ឋធម្មនុញ្ញនិងច្បាប់អន្តរជាតិមួយចំនួនស្តីពីសិទ្ធិពលរដ្ឋនិងសិទ្ធិនយោបាយដែលកម្ពុជាបានទទួលស្គាល់។
នាយកវិទ្យាស្ថានប្រជាធិបតេយ្យកម្ពុជា លោកបណ្ឌិត ប៉ា ចន្ទរឿន មានប្រសាសន៍នៅថ្ងៃព្រហស្បតិ៍នេះថា ជំនួបនេះជាសញ្ញាវិជ្ជមានមួយ ព្រោះជាឱកាសឱ្យប្រមុខរដ្ឋាភិបាលកម្ពុជា និងអ្នករាយការណ៍ពិសេសរបស់អង្គការសហប្រជាជាតិ បានស្វែងយល់ពីគ្នាទៅវិញទៅមក ទាំងការរំពឹងទុកនិងរបៀបធ្វើការពាក់ព័ន្ធដំណើរការសិទ្ធិមនុស្សនិងប្រជាធិបតេយ្យនៅកម្ពុជា ដែលលោកសង្កេតឃើញថា កន្លងទៅ របៀបធ្វើការហាក់មានគម្លាតពីគ្នា។
លោក ប៉ា ចន្ទរឿន យល់ថា តាមរយៈជំនួបនេះ នឹងបង្កលក្ខណៈឱ្យភាគីទាំង២យល់គ្នាមួយកម្រិតថែមទៀត ក្នុងការឈានទៅរកការដោះស្រាយបញ្ហាសិទ្ធិមនុស្សនិងប្រជាធិបតេយ្យនៅកម្ពុជា បើភាគីទាំងពីរមានភាពស្មោះត្រង់ឈរលើគោលការណ៍ច្បាប់។
លោកថា៖ «ខ្ញុំជឿថា បើគ្រប់ភាគីពាក់ព័ន្ធមានឱកាសជួបមុខគ្នាសន្ទនាដោយបើកចំហដោយផ្តោតទៅលើបញ្ហា ជាជាងទាញយករឿងអស់ហ្នឹងមកដាក់ជាប្រយោជន៍ផ្ទាល់ខ្លួន ខ្ញុំជឿថា យើងអាចរកដំណោះស្រាយបាន»។
នាយកប្រតិបត្តិអង្គការអភិវឌ្ឍន៍ផ្នត់គំនិត លោកបណ្ឌិត សេក សុជាតិ កត់សម្គាល់ថា ការដែលអ្នករាយការណ៍ពិសេស បន្តឈ្វេងយល់ពីរដ្ឋាភិបាលលើបញ្ហាសិទ្ធិមនុស្ស ទំនងជាកម្ពុជាអនុវត្តមិនទាន់ត្រូវតាមស្តង់ដារអន្តរជាតិដែលទទួលស្គាល់ដោយរដ្ឋធម្មនុញ្ញនិងច្បាប់អន្តរជាតិមួយចំនួនទៀត ដែលកម្ពុជាប្រកាសទទួលស្គាល់ ដើម្បីធានាយន្តការប្រជាធិបតេយ្យសេរីពហុបក្សនៅកម្ពុជា។
លោកថា៖ «បញ្ហារបស់អង្គការសហប្រជាជាតិ គឺគាត់មានលក្ខខណ្ឌរបស់គាត់រួចស្រេចទៅហើយ។ នៅក្នុងប្រទេសមួយដែលទទួលយកលក្ខខណ្ឌរបស់គាត់ អ៊ីចឹងប្រទេសហ្នឹងគឺត្រូវតែអនុវត្តទៅតាមការសន្យាឬកិច្ចព្រមព្រៀងជា ពិសេសយើងកម្ពុជាបានទទួលយកលក្ខខណ្ឌទាំងអស់នោះជាមួយអង្គការសហប្រជាជាតិ តាមរយៈកិច្ចព្រមព្រៀងសន្តិភាពទីក្រុងប៉ារីស ២៣តុលា ១៩៩១»។
លោក សុជាតិ មើលឃើញថា ប៉ុន្មានឆ្នាំចុងក្រោយនេះ របត់នយោបាយដែលឈានទៅរំលាយអតីតគណបក្សប្រឆាំងចេញពីឆាកនយោបាយ អំឡុងឆ្នាំ២០១៧ សិទ្ធិពលរដ្ឋនិងសិទ្ធិនយោបាយ ដែលធានាដោយច្បាប់ជាតិនិងអន្តរជាតិ ត្រូវបានរឹតត្បិតនិងជំរុញឱ្យមានការបកស្រាយផ្សេងគ្នារវាងអ្នកជំនាញសិទ្ធិមនុស្សអង្គការសហប្រជាជាតិនិងមន្ត្រីរដ្ឋាភិបាល។
មាត្រា៣១ នៃរដ្ឋធម្មនុញ្ញចែងថា៖ «ព្រះរាជាណាចក្រកម្ពុជាទទួលស្គាល់និងគោរពសិទ្ធិមនុស្ស ដូចមានចែងក្នុងរដ្ឋធម្មនុញ្ញនៃអង្គការសហប្រជាជាតិ សេចក្តីប្រកាសជាសកលស្តីពីសិទ្ធិមនុស្សនិងកតិកាសញ្ញា ព្រមទាំងអនុសញ្ញាទាំងឡាយទាក់ទងទៅនឹងសិទ្ធិមនុស្ស សិទ្ធិនារី និងសិទ្ធិកុមារ»៕
