តុលាការកំពូល នៅថ្ងៃនេះ លើកពេលសវនាការជាលើកទី៣ លើសំណុំរឿងអតីតអភិបាលខេត្តតាកែវ លោក ឡាយ វណ្ណៈ និងបងប្រុសរបស់លោក ក្រោមបទចោទឃាតកម្មលើស្ត្រីមួយរូបកាលពីដើមឆ្នាំ២០១៨។
អនុប្រធានតុលាការកំពូល និងជាប្រធានក្រុមប្រឹក្សាជំនុំជម្រះ លោក និល ណុន នៅព្រឹកថ្ងៃពុធ ទី២៩ ខែកញ្ញានេះ បានសម្រេចលើកពេលសវនាការជំនុំជម្រះក្តីជាលើកទី៣ លើសំណុំរឿងអតីតអភិបាលខេត្តតាកែវ លោក ឡាយ វណ្ណៈ និងបងប្រុសរបស់លោក គឺលោក ឡាយ ណារិទ្ធ អតីតស្នងការរងនគរបាលខេត្តតាកែវ ពាក់ព័ន្ធនឹងករណីឃាតកម្មលើស្រីកំណាន់ អ្នកនាង ចេវ សុវឌ្ឍនា ដោយសារចៅក្រមកាន់របាយការណ៍ជាប់ធ្វើចត្តាឡីស័ក។
ទោះជាយ៉ាងណា ប្រធានក្រុមប្រឹក្សាជំនុំជំម្រះ លោក និល ណុន មិនបានបញ្ជាក់ពីពេលវេលាដែលត្រូវបន្តបើកសវនាការនៅពេលណានៅឡើយ។
ក្រោយពីប្រកាសលើកពេលសវនាការ អតីតអភិបាលខេត្តតាកែវ លោក ឡាយ វណ្ណៈ មានប្រសាសន៍ប្រាប់អ្នកសារព័ត៌មានថា ការលើកពេលសវនាការជាលើកទី៣ របស់ប្រធានក្រុមប្រឹក្សាជំនុំជម្រះ ជាឆន្ទានុសិទ្ធិរបស់ចៅក្រម។
នៅពេលសួរថា តើការលើកពេលសវនាការនេះអាចធ្វើឱ្យប៉ះពាល់ដល់សិទ្ធិក្នុងការជំនុំជម្រះដោយយុត្តិធម៌ដែរឬទេ? លោក ឡាយ វណ្ណៈ មានប្រសាសន៍យ៉ាងខ្លីថា៖ «ចង់ឱ្យលើកពេលឬមិនចង់ មិនមែននៅលើខ្ញុំទេ គឺនៅលើតុលាការ។ ខ្ញុំអត់មានយោបល់អ្វីទេ ជួនកាលដោយសារបញ្ហាកូវីដអី ខ្ញុំក៏មិនដឹងដែរ»។
លោកស្រី សេង វួចហ៊ុន ជាមេធាវីការពារក្តីលោក ឡាយ វណ្ណៈ និងមេធាវី ដានី ច័ន្រ្ទរស្មីឈូករ័ត្ន ជាមេធាវីការពារក្តីលោក ឡាយ ណារិទ្ធ សុំមិនធ្វើការបកស្រាយជុំវិញការលើកពេលសវនាការនេះឡើយ។
ប្រធានសមាគមសិទ្ធិមនុស្សអាដហុក លោក នី សុខា មានប្រសាសន៍ថា តុលាការគួរតែពន្លឿននីតិវិធីជំនុំជំម្រះក្ដីលើសំណុំរឿងលោក ឡាយ វណ្ណៈ និងបងប្រុសរបស់លោក ជាជាងលើកពេលម្តងហើយម្តងទៀតដែលធ្វើឱ្យប៉ះពាល់សិទ្ធិរបស់ជនជាប់ឃុំ។
លោកមានប្រសាសន៍ថា៖ «បើសិនជាយើងអូសបន្លាយពេលវេលា វាធ្វើឱ្យប៉ះពាល់ដល់សិទ្ធិរបស់ជនជាប់ចោទ ពីព្រោះសិទ្ធិជនជាប់ចោទកំពុងតែនៅក្នុងពន្ធនាគារ។ ដូច្នេះ បើសិនជាមានការអូសបន្លាយពេលវេលា វាធ្វើឱ្យការជាប់ពន្ធនាគាររបស់ជនជាប់ចោទ វាអាចថាគាត់មិនទាន់ច្បាស់លាស់ពីទោសកំហុសគាត់កម្រិតប៉ុណ្ណា ហើយគាត់ត្រូវជាប់ចោទពីបទល្មើសអ្វីឱ្យពិតប្រាកដ»។
លោក ឡាយ វណ្ណៈ និងលោក ឡាយ ណារិទ្ធ រួមទាំងមនុស្ស២នាក់ទៀត ត្រូវបានចាប់ខ្លួនពាក់ព័ន្ធសុំណុំរឿងឃាតកម្មលើអ្នកស្រី ចេវ សុវឌ្ឍនា កាលឆ្នាំ២០១៨។
ប៉ុន្តែកាលពីថ្ងៃទី២២ ខែសីហា ឆ្នាំ២០១៩ លោក ឡាយ វណ្ណៈ បន្តអះអាងថា លោកមិនបានសម្លាប់អ្នកស្រី ចេវ សុវឌ្ឍនា ដូចការចោទប្រកាន់ឡើយ។
អ្នកនាំពាក្យសាលាដំបូងរាជធានីភ្នំពេញ លោក សួស វិទ្យារ៉ាន់ឌី ធ្លាប់ប្រាប់ វីអូឌី ថាប្រធានក្រុមប្រឹក្សាជំនុំជម្រះនៃសាលាដំបូងរាជធានីភ្នំពេញ លោក ហម ម៉េងសែ បានប្រកាសសាលក្រមដោយសម្រេចឱ្យលោក ឡាយ វណ្ណៈ ជាប់ពន្ធនាគារ១៣ឆ្នាំ ខណៈលោក ឡាយ ណារិទ្ធ ត្រូវបានតុលាការសម្រេចកាត់ទោសឱ្យជាប់ពន្ធនាគារ១០ឆ្នាំ។
ចំណែកបុរសឈ្មោះ ម៉ែន សាម៉ៃ ដែលជាអ្នកបើកបររថយន្តឱ្យលោក ឡាយ វណ្ណៈ និងបុរសឈ្មោះ ជឹម វុធ ដែលជាប្ដីរបស់ស្ត្រីអ្នកបម្រើនៅផ្ទះរបស់អ្នកស្រី ចេវ សុវឌ្ឍនា ក៏ត្រូវបានតុលាការកាត់ទោសឱ្យជាប់ពន្ធនាគារម្នាក់ៗ២ឆ្នាំផងដែរ ក្រោមបទចោទថាបានលាក់កំបាំងតម្រុយ៕