មេធាវីការពារក្តីឱ្យលោក ឆន ផល្លា ដែលជាសកម្មជនបរិស្ថាន និងដីធ្លីម្នាក់នៅខេត្តរតនគិរីបានឱ្យដឹងថា តុលាការបានចោទប្រកាន់កូនក្តីលោក ពាក់ព័ន្ធនឹងសំណុំរឿង «កាប់គាស់ រុករាន ឆ្ការដុត និងឈូសឆាយដីព្រៃយកធ្វើជាកម្មសិទ្ធិ» ខណៈសំណុំរឿងនេះនឹងប្រកាសសាលក្រមនៅចុងខែតុលានេះ។
លោក សំ ទិត្យសីហា មេធាវីការពារក្តីឱ្យលោក ឆន ផល្លា ប្រាប់វីអូឌីថា អំឡុងពេលសវនាការសួរដេញដោលលោក ឆន ផល្លា គឺប្រធានក្រុមប្រឹក្សាជំនុំជម្រះ និងតំណាងអយ្យការបានលើកឡើងថាកូនក្តីរបស់លោកបានប្រព្រឹត្តបទល្មើស «កាប់គាស់ រុករាន ឆ្ការដុត និងឈូសឆាយដីព្រៃយកធ្វើជាកម្មសិទ្ធិ» កាលពីឆ្នាំ២០១៩ និង២០២០ ស្ថិតនៅភូមិសាមុតក្រោម ឃុំសេដា ស្រុកលំផាត់ ខេត្តរតនគិរី ។
នៅក្នុងអង្គសវនាការនោះ លោក សំ ទិត្យសីហា ដែលជាមេធាវីការពារក្តីឱ្យលោក ឆន ផល្លា មានលើកឡើងថា តុលាការចោទប្រកាន់កូនក្តីរបស់លោកធ្វើឡើងដោយខុសច្បាប់ ព្រោះសំណុំរឿងនេះត្រូវបានសាលាឧទ្ធរណ៍ខេត្តត្បូងឃ្មុំសម្រេចបដិសេធចោលម្តងរួចមកហើយ។
ទោះជាបែបនេះ លោកមេធាវីបញ្ជាក់ថា ចៅក្រមបែរជាលើកឡើងថា សំណុំរឿងដែលសាលាឧទ្ធរណ៍ខេត្តត្បូងឃ្មុំសម្រេចបដិសេធច្រានចោលនោះជាបទល្មើស ញុះញង់ឱ្យប្រព្រឹត្តបទឧក្រិដ្ឋជាអាទិ៍ទៅវិញ ។
ករណីនេះ មេធាវី សំ ទិត្យសីហា ចាត់ទុកការចោទប្រកាន់របស់តុលាការមកលើកូនក្តីទាំងអយុត្តិធម៌ ហើយលោកស្នើទៅតុលាការទម្លាក់ការចោទប្រកាន់លើកូនក្តី ដើម្បីឱ្យគាត់មានសេរីភាពវិញ ។
លោកស្នើដូចនេះថា៖ «តុលាការចោទប្រកាន់មកលើលោក ឆន ផល្លា មិនមានភស្តុតាងគ្រប់គ្រាន់ដើម្បីដាក់បន្ទុកមកលើគាត់នោះទេ ព្រោះការចោទប្រកាន់នេះ វាជារឿងអយុត្តិធម៌វាអាចធ្វើឱ្យប៉ះពាល់ទៅដល់អ្នកការពារធនធានធម្មជាតិ ដែលគាត់មានចេតនាជួយដល់រដ្ឋាភិបាលក្នុងការទប់ស្កាត់បទល្មើសព្រៃឈើពីឈ្មួញជាដើម។ ខ្ញុំស្នើទៅតុលាការពិចារណាទម្លាក់ចោលការចោទប្រកាន់នេះ »។
មេធាវីរូបនោះបញ្ជាក់ថា សំណុំរឿងលោក ឆន ផល្លា តុលាការនឹងប្រកាសសាលក្រមនៅថ្ងៃទី២៧ ខែតុលា ឆ្នាំ២០២១ ។
វីអូឌី មិនអាចរកការបំភ្លឺពីព្រះរាជអាជ្ញារង និងជាអ្នកនាំពាក្យសាលាដំបូងខេត្តរតនគិរី លោក កែវ ភក្ដី បានទេនៅថ្ងៃនេះ។
លោក ឆន ផល្លា ត្រូវបានសមត្ថកិច្ចចាប់ខ្លួន កាលពីថ្ងៃចន្ទទី២០ ខែកញ្ញា ឆ្នាំ២០២១ ដោយថាសកម្មជនរូបនោះមិនព្រមចូលទៅបំភ្លឺតាមដីកាកោះរបស់ចៅក្រមស៊ើបសួរ ឈ្មោះ នៅ យ៉ារ័ត្ន ចុះថ្ងៃទី៩ ខែកុម្ភៈ ឆ្នាំ២០២១ ពាក់ព័ន្ធនឹងសំណុំរឿង «កាប់គាស់ រុករាន ឆ្ការដុត និងឈូសឆាយដីព្រៃយកធ្វើជាកម្មសិទ្ធិ»។
មន្ត្រីស៊ើបអង្កេតជាន់ខ្ពស់នៅសមាគមអាដហុក លោក សឹង សែនករុណា ដែលអះអាងថា បានតាមដានសំណុំរឿងលោក ឆន ផល្លា ផ្ទាល់មានប្រសាសន៍ថា នៅថ្ងៃជំនុំជម្រះក្នុងអង្គសវនាការកាលពីចុងខែកញ្ញា ឆ្នាំ២០២១ តំណាអយ្យការ និងចៅក្រមសួរដេញដោលលោក ឆន ផល្លា រួមទាំងការបង្ហាញនូវភស្តុតាង ដូចជា មិនមានភស្តុតាងណាមួយសម្រាប់ដាក់បន្ទុកលើសកម្មជនដីធ្លីរូបនោះទេ ។
មន្ត្រីសិទ្ធិមនុស្សរូបនោះ យល់ថា ប្រសិនបើតុលាការសម្រេចដាក់ទោសលើសកម្មជនដីធ្លីរូបនោះ នឹងធ្វើឱ្យប្រជាលពរដ្ឋ និងសហគមន៍អន្តរជាតិអស់ជំនឿលើប្រព័ន្ធយុត្តិធម៌នៅកម្ពុជាផងដែរ ។
លោកមានប្រសាសន៍ថា៖ «យើងឃើញអំពើរបស់លោក ឆន ផល្លា គឺជាអំពើដែលត្រូវតែមានការលើកទឹកចិត្ត បើសិនជាអំពើនិងសកម្មភាពដែលជាឆន្ទៈ ហើយនឹងអ្នកស្ម័គ្រចិត្តធ្វើការងារផលប្រយោជន៍រួមរបស់សង្គមជាតិ តែត្រូវបានយកមកចាត់វិធានការផ្លូវច្បាប់ទាំងអស់នេះ គឺជាការធ្វើឱ្យបំបាក់នូវទឹកចិត្តរបស់លោកផល្លាផ្ទាល់ ក៏ដូចជាសហគមន៍ផ្សេងទៀត ដែលគេមើលឃើញថាអំពើទាំងអស់ហ្នឹងជាអំពើត្រឹមត្រូវ បែរជាត្រូវបានចាត់វិធានការ ធ្វើទុក្ខបុកម្នេញទៅលើអ្នកទាំងអស់ហ្នឹងទៅវិញ»។
លោកមានប្រសាសន៍បន្ថែមថា ៖«មួយទៀតក៏បង្ហាញពីការអនុវត្តច្បាប់នៅក្នុងប្រទេសកម្ពុជាយើងដែលកំពុងរងការរិះគន់អំពីប្រព័ន្ធយុត្តិធម៌ ហើយបែរជាមកអនុវត្តទៅលើសកម្មជនដែលជាជនស្លូតត្រង់ការពារផលប្រយោជន៍របស់សង្គមជាតិទៅទៀត។ នោះកាន់តែបង្ហាញថាប្រព័ន្ធយុត្តិធម៌នៅកម្ពុជារបស់យើងកាន់តែធ្វើឱ្យបាត់បង់នូវជំនឿពីសាធារណៈជន ក៏ដូចជាសហគមន៍អន្តរជាតិជាដើម»។
លោក ឆន ផល្លា ដែលមានវ័យ៤២ឆ្នាំ ធ្លាប់បានប្រាប់ វីអូឌី នាពេលកន្លងមកថា រូបលោកបានចូលរួមការពារព្រៃឈើតាំងពីឆ្នាំ២០១៦ ប៉ុន្តែចាប់តាំងពីឆ្នាំ២០១៧មក លោកធ្លាប់បានដាក់ពាក្យប្តឹងចំនួន៨ករណីទៅតុលាការប្រឆាំងនឹងមន្ត្រីមូលដ្ឋាននិងពលរដ្ឋមួយចំនួនទៀត ពាក់ព័ន្ធនឹងបទល្មើសព្រៃឈើនិងការទន្រ្ទានដីសហគមន៍ ប៉ុន្តែលោកថា ប្រមាណ៤ឆ្នាំមកនេះគ្មានបណ្ដឹងណាមួយរបស់លោកត្រូវបានចាត់ការនោះឡើយ។
មិនតែប៉ុណ្ណោះ លោកថា កាលពីខែកក្កដា ឆ្នាំ២០២០ លោកធ្លាប់ត្រូវបានមនុស្សមួយក្រុមព្រួតគ្នាវាយដំយ៉ាងធ្ងន់ធ្ងរនៅចំពោះមុខអាជ្ញាធរមូលដ្ឋានក្នុងវេទិកាសាធារណៈមួយ នៅពេលដែលលោកបានចោទសួរទៅកាន់អាជ្ញាធរពាក់ព័ន្ធការបណ្តែតបណ្តោយឱ្យមានបទល្មើសព្រៃឈើកើតឡើងនៅក្នុងតំបន់គ្រប់គ្រងរបស់ខ្លួន៕
