លោកនាយករដ្ឋមន្ត្រី ហ៊ុន សែន ចេញវិធានទប់ស្កាត់រលកចម្លងជំងឺកូវីដ-១៩ ក្នុងពិធីបុណ្យភ្ជុំបិណ្ឌប្រពៃណីជាតិឆ្នាំនេះ ខណៈកម្ពុជាមិនទាន់អាចកាត់ផ្តាច់ខ្សែចម្លងក្នុងសហគមន៍បាននៅឡើយក្នុងរយៈពេលជាង៨ខែមកនេះ។
វិធានរបស់ប្រមុខរដ្ឋាភិបាលនេះធ្វើឡើងក្នុងសារាចរណែនាំមួយចុះថ្ងៃទី៣ ខែតុលា ឆ្នាំ២០២១។
តាមសារាចរណែនាំនោះ លោកនាយករដ្ឋមន្ត្រី ហ៊ុន សែន បានលើកឡើងថា អំឡុងពេលឈប់សម្រាកខាងមុខនេះ ប្រជាពលរដ្ឋជាច្រើនអាចនឹងធ្វើដំណើរចល័តពីកន្លែងមួយទៅកន្លែងមួយ ដើម្បីទៅជួបជុំក្រុមគ្រួសារនិងធ្វើដំណើរកម្សាន្តនៅតាមរមណីយដ្ឋាននានានៅទូទាំប្រទេស។ លោកថា ការនេះនឹងអាចធ្វើឱ្យកម្ពុជាប្រឈមនឹងហានិភ័យនៃការឆ្លងរាលដាលទ្រង់ទ្រាយធំនៃជំងឺកូវីដ-១៩ ពិសេសមេរោគបំប្លែងថ្មីប្រភេទ ដែលតា (Delta) ដែលមេរោគប្រភេទថ្មីនេះចម្លងក្នុងល្បឿនលឿន។
លោកនាយករដ្ឋមន្ត្រី ហ៊ុន សែន គូសបញ្ជាក់ថា ដើម្បីការពារអាយុជីវិតនិងសុខភាពប្រជាពលរដ្ឋ និងស្របពេលដែលកម្ពុជាកំពុងបោះជំហានទៅរកការបើកដំណើរការទេសចរណ៍ពេញលេញឡើងវិញផងនោះ រដ្ឋាភិបាលត្រូវដាក់ចេញវិធានមួយចំនួន ដើម្បីការពារនិងបង្ការទប់ស្កាត់រលកចម្លងនេះ។
បើតាមសារាចរនោះ ក្រសួងនិងសមត្ថកិច្ច រួមទាំងជំនាញពាក់ព័ន្ធ ត្រូវពង្រឹងវិធានសុខាភិបាលទប់ស្កាត់ការធ្វើដំណើររួមគ្នា ការជួបជុំឬការប្រមូលផ្តុំ ដែលអាចបង្កហានិភ័យខ្ពស់នៃការចម្លងមេរោគកូវីដ-១៩។
បន្ថែមពីនេះ ក្រោយចប់ពិធីបុណ្យ ទាំងវិស័យរដ្ឋនិងឯកជន រួមទាំងវិស័យកាត់ដេរ ត្រូវលើកទឹកចិត្តឱ្យធ្វើតេស្តរហ័ស ចំពោះមន្ត្រី កម្មករ និយោជិត និងបុគ្គលិក ដើម្បីទប់ស្កាត់រលកចម្លងពេលចូលបម្រើការងារវិញ។
ពិធីបុណ្យភ្ជុំបិណ្ឌប្រពៃណីខ្មែរឆ្នាំនេះ នឹងប្រព្រឹត្តទៅ៣ថ្ងៃ ចាប់ពីថ្ងៃទី៥ ដល់ថ្ងៃទី៧ តែតុលា ឆ្នាំ២០២១។
កម្ពុជាបានផ្ទុះរលកទី៣ នៃការឆ្លងរាលដាលជំងឺកូវីដ-១៩ ចាប់ពីថ្ងៃទី២០ ខែកុម្ភៈ ដែលមកដល់ពេលនេះ «ព្រឹត្តិការណ៍២០កុម្ភៈ» មានរយៈពេលជាង៨ខែហើយ តែក្រសួងសុខាភិបាលនៅមិនទាន់អាចកាត់ផ្តាច់ខ្សែចម្លងក្នុងសហគមន៍ទាំងស្រុងបាននៅឡើយទេ។ ព្រឹត្តិការណ៍នេះបានសម្លាប់មនុស្សអស់២ ៣៨៣នាក់ គិតត្រឹមថ្ងៃទី២ ខែតុលា ឆ្នាំ២០២១នេះ៕
