ក្រុមគ្រួសាររបស់អតីតចៅសង្កាត់ប៉ោយប៉ែតមកពីបក្សសង្រ្គោះជាតិ លោក ចៅ វាសនា ស្នើខាងពន្ធនាគារត្រពាំងផ្លុង ខេត្តត្បូងឃ្មុំ ផ្ទេរអតីតមន្ត្រីបក្សប្រឆាំងរូបនេះមកពន្ធនាគារខេត្តបន្ទាយមានជ័យ ជាកន្លែងគ្រួសារកំពុងរស់នៅបច្ចុប្បន្នវិញ ខណៈគាត់កំពុងធ្លាក់ខ្លួនឈឺ។
កូនស្រីរបស់លោក ចៅ វាសនា គឺអ្នកស្រី ចៅ រតនៈ ថ្លែងប្រាប់ វីអូឌី នៅថ្ងៃចន្ទថា ឪពុករបស់គាត់ត្រូវបានអាជ្ញាធរបញ្ជូនទៅឃុំខ្លួននៅពន្ធនាគារត្រពាំងផ្លុង សិ្ថតនៅជាប់ព្រំដែនកម្ពុជា-វៀតណាម ហើយបច្ចុប្បន្ននេះ គាត់មានបញ្ហាសុខភាព ដែលទាមទារឱ្យមានជាថ្នាំសង្កូវ និងមានការយកចិត្តទុកដាក់ផ្នែកស្មារតីផងដែរ។
អ្នកស្រីបញ្ជាក់ថា ដោយសារបញ្ហាជីវភាពនិងត្រូវចំណាយលុយច្រើនសម្រាប់ធ្វើដំណើរទៅសួរសុខទុក្ខឪពុកនៅជាប់ព្រំដែនវៀតណាមបែបនេះ អ្នកស្រីនៅតែស្នើទៅអាជ្ញាធរជួយផ្ទេរឪពុកពីពន្ធនាគារត្រពាំងផ្លុង មកឃុំខ្លួននៅពន្ធនាគារខេត្តបន្ទាយមានជ័យជាកន្លែងដែលខ្លួនរស់នៅវិញ ដើម្បីងាយស្រួលទៅសួរសុខទុក្ខ និងតាមដានសុខភាពរបស់ឪពុកឱ្យបានទាន់ពេលវេលា។
អ្នកស្រីមានប្រសាសន៍ថា៖ «បើប្តូរមក [ប្តូរពីពន្ធនាគារត្រពាំងផ្លុង មកពន្ធនាគារបន្ទាយមានជ័យ] វាស្រួលត្រង់ថា គាត់ [ឪពុកខ្ញុំ] នៅត្រឹមពន្ធនាគារខេត្ត ឯខ្ញុំនៅខាងប៉ោយប៉ែត។ អ៊ីចឹងខ្ញុំអាចប្រកបមុខរបររកស៊ីបន្តិចបន្តួចផង និងឆ្លៀតពេលបានទៅលេងគាត់ផង។ បើគាត់នៅបន្ទាយមានជ័យ មួយសប្តាហ៍ខ្ញុំអាចទៅសួរសុខទុក្ខគាត់បាន២ដង។ ធម្មតា ជួបគាត់ផ្ទាល់ យើងមើលឃើញរូបរាងគាត់ យើងដឹងពីសុខភាពគាត់ច្បាស់ជាងពេលគាត់និយាយទូរសព្ទ។ បើគាត់ឈឺ យើងអាចរកទិញ[ឱសថ]ពីខាងក្រៅជូនគាត់បាន»។
អ្នកស្រី ចៅ រតនៈ បន្តថា៖ «[ផ្ទុយទៅវិញ នៅឆ្ងាយដូចបច្ចុប្បន្ន] ថ្នាំ! […] ជំងឺខ្លះក៏អត់មានថ្នាំអ៊ីចឹងមែន។ ខាងមន្ត្រីពន្ធនាគារគាត់ក៏ប្រាប់អ៊ីចឹងដែរ [ថាប្រភេទថ្នាំខ្លះមិនមាននៅទីនោះទេ]។ យើងទទួលស្គាល់ទាំងអស់គ្នាថា មិនអាចផ្តល់ថ្នាំគ្រប់គ្រាន់។ ឧទាហរណ៍ថាគាត់ឈឺ ទម្រាំយើងធ្វើដំណើរពីប៉ោយប៉ែតដល់ត្រពាំងផ្លុង វាយូរណាស់ ចំណាយក៏ច្រើន [ជិត៥០០គីឡូម៉ែត្រ និងចំណាយសោហ៊ុយទៅ-មក មិនក្រោម២០០ដុល្លារអាមេរិក]»។
អ្នកស្រី រតនៈ ថាបើមិនអាចផ្ទេរបាន នោះគាត់មានការសោកស្តាយ ខណៈអ្នកស្រីអះអាងថា ធ្លាប់ស្នើសុំផ្ទេរកន្លែងឃុំខ្លួនឬពន្ធនាគារជាច្រើនដងមកហើយ ប៉ុន្តែត្រូវបានខាងពន្ធនាគារបដិសេធ។
អ្នកនាំពាក្យអគ្គនាយកនៃអគ្គនាយកដ្ឋានពន្ធនាគារ ក្រសួងមហាផ្ទៃ លោក នុត សវនា ប្រាប់ វីអូឌី នៅថ្ងៃទី៤ ខែតុលា ថាការអនុញ្ញាតឱ្យផ្ទេរពីពន្ធនាគារមួយទៅមួយ លុះត្រាតែឆ្លងកាត់ការពិនិត្យពីក្រសួងមហាផ្ទៃជាមុនសិន ដោយថា មន្ត្រីថ្នាក់ក្រោមមិនអាចសម្រេចបានទេ។ លោកបន្ថែមថា លោកបានឱ្យមន្ត្រីពន្ធនាគារត្រួតពិនិត្យពីស្ថានភាពលោក ចៅ វាសនា រួចហើយ គឺគាត់មានសុខភាពធម្មតា មិនដូចអ្វីដែលកូនស្រីគាត់លើកឡើងឡើយ។
លោក នុត សវនា ថ្លែងថា៖ «គាត់ស្នើទៅអាជ្ញាធរខាងណា? បើគាត់ស្នើទៅប្រធានពន្ធនាគារៗអត់មានសិទ្ធិសម្រេចទេ។ ឱ្យគាត់ស្នើមកក្រសួងមហាផ្ទៃ គេពិនិត្យសម្រេចទៅតាមហ្នឹង ព្រោះអ្នកមានសិទ្ធិអនុញ្ញាតឱ្យផ្ទេរហ្នឹង ទាល់តែទៅតាមចំនួន។ បើម្នាក់ពីរនាក់អីហ្នឹង អាហ្នឹងសម្រេចត្រឹមអគ្គនាយក [អគ្គនាយកដ្ឋានពន្ធនាគារ]។ បើផ្ទេរចាប់ពី៥០នាក់ឡើង ទាល់សុំដល់សម្ដេចក្រឡាហោម [ស ខេង]។ ហើយមួយទៀត សុខភាពគាត់ល្អធម្មតាទេ ខ្ញុំឱ្យខាងមណ្ឌលគេឆែកមើលសុខភាពគាត់ហើយ គាត់លេងកីឡាអីធម្មតាហ្នឹង។ អត់មានបញ្ហាសុខភាពអីដូចការបំភ្លៃការពិតហ្នឹងទេ»។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត មានប្រសាសន៍ថា ពន្ធនាគារត្រពាំងផ្លុង ជាកន្លែងដែលដាក់ឃុំអ្នកដែលជាទណ្ឌិត ពោលគឺមានសាលក្រមជាស្ថាពររួច។ លោកបន្តថា ពីខេត្តបន្ទាយមានជ័យទៅពន្ធនាគារត្រពាំងផ្លុង មានចម្ងាយឆ្ងាយ ដែលបង្កឱ្យមានផលវិបាកសម្រាប់គ្រួសារជនជាប់ឃុំ ជាពិសេសបើគ្រួសារនោះមិនសូវមានថវិកា។
លោក អំ សំអាត បន្តថា៖ «នៅពេលដែលពន្ធនាគារនៅឆ្ងាយពេក លទ្ធភាពទៅមិនដល់ វាធ្វើឱ្យប៉ះពាល់អារម្មណ៍ ហើយមានភាពឯកោដល់ជនដែលជាប់ឃុំ។ បើសិនជាជនដែលជាទណ្ឌិតជាប់ពន្ធនាគារនៅក្នុងខេត្តដែលខ្លួនរស់នៅ អាចនឹងមានភាពងាយស្រួលសម្រាប់គ្រួសារទៅសួរសុខទុក្ខ អាហ្នឹងជារឿងល្អប្រសើរ។ វាទាក់ទងនឹងបញ្ហាផ្លូវចិត្ត អ្នកដែលឈឺល្មមៗ បើសិនមានគ្រួសារទៅសួរសុខទុក្ខអ៊ីចឹង ជាការលើកទឹកចិត្ត។ អាហ្នឹងវាជួយបំបាត់ភាពតប់ប្រមល់ អារម្មណ៍ធុញថប់ វាជួយសុខភាពមួយដែរ។ ប៉ុន្តែបើសិនជានៅដាច់ឆ្ងាយ ហើយមិនមានគ្រួសារបានទៅសួរសុខទុក្ខ អ៊ីចឹងវាបង្កអាភាពថប់បារម្ភផង ក៏អាចមានជំងឺដែរ»។
លោកបន្ថែមថា ករណីលោក ចៅ វាសនា ធ្លាប់មានបញ្ហាសុខភាពពីមុនមកជាប្រចាំដែរ។ ទោះមានភាពល្អប្រសើរឬអត់ ក៏ចៀសមិនផុតពីគ្រួសារមានការបារម្ភដែរ ដោយសារលោកធ្លាប់មានជំងឺប្រចាំកាយរួចទៅហើយ។ លោកថា បើសិនអគ្គនាយកដ្ឋានពន្ធនាគារអាចជួយសម្រួលផ្ទេរលោក វាសនា ឱ្យមកជាប់ឃុំនៅខេត្តបន្ទាយមានជ័យវិញ គឺជារឿងដ៏ប្រសើរ។
លោក ចៅ វាសនា ដែលជាអតីតចៅសង្កាត់ប៉ោយប៉ែត ខេត្តបន្ទាយមានជ័យ ជាប់ឆ្នោតមកពីគណបក្សសង្រ្គោះជាតិ ខណៈពេលនោះ លោកកំពុងជាប់ឃុំនៅក្នុងពន្ធនាគារនៅឡើយ។ លោក ត្រូវបានតុលាការសម្រេចឃុំខ្លួននៅពន្ធនាគារកាលពីខែកុម្ភៈ ឆ្នាំ២០១៧ ហើយនៅចុងឆ្នាំ២០២០ លោកត្រូវបានផ្ទេរទៅឃុំខ្លួនបន្តនៅពន្ធនាគារត្រពាំងផ្លុង។
កាលពីថ្ងៃទី១៦ ខែកុម្ភៈ ឆ្នាំ២០១៧ លោក ចៅ វាសនា ត្រូវសាលាដំបូងខេត្តបន្ទាយមានជ័យ សម្រេចឃុំខ្លួនដោយចោទប្រកាន់ចំនួន៣បទល្មើស ក្នុងនោះមាន បទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» បទ «សមគំនិតចូលរួមបំផ្លិចបំផ្លាញទ្រព្យសម្បត្តិសាធារណៈ» និងបទ «បំផ្លិចបំផ្លាញទ្រព្យសម្បត្តិសាធារណៈ» នៅក្នុងសំណុំរឿងបាតុកម្មហិង្សានៅមុខទីស្នាក់ការគយនិងរដ្ឋាករក្រុងប៉ោយប៉ែត កាលពីខែឧសភា ឆ្នាំ២០១៥ ក្នុងហេតុការណ៍កម្មករអូសរទេះតវ៉ា ហើយប៉ះទង្គិចជាមួយសមត្ថកិច្ច។
ចៅសង្កាត់មកពីបក្សប្រឆាំងដែលមានដើមកំណើតជាខ្មែរក្រោមរូបនេះ ត្រូវបានតុលាការផ្តន្ទាទោសដាក់ពន្ធនាគារចំនួន៥ឆ្នាំ ហើយបើគិតត្រឹមដើមខែតុលា ឆ្នាំ២០២១នេះ នៅសល់តែជាង៤ខែទៀត គឺដល់ពេលកំណត់នៃការអនុវត្តទោសចប់សព្វគ្រប់របស់លោកហើយ៕