រដ្ឋបាលរាជធានីភ្នំពេញ ព្រមានចាត់វិធានការច្បាប់លើម្ចាស់គ្រឹះស្ថានសិក្សានិងម្ចាស់អាជីវកម្មទាំងអស់ដែលអនុញ្ញាតឱ្យពលរដ្ឋអាយុចាប់ពី១៨ឆ្នាំឡើង និងអាយុ៦ឆ្នាំដល់ក្រោម១៨ឆ្នាំ ចូលទីតាំងរបស់ខ្លួនដោយមិនបង្ហាញកាតចាក់វ៉ាក់សាំង ដើម្បីរួមគ្នាទប់ស្កាត់ការឆ្លងរាលដាលនៃជំងឺកូវីដ-១៩ បំប្លែងថ្មី។
ក្នុងសេចក្ដីណែនាំរបស់រដ្ឋបាលរាជធានីភ្នំពេញ បានឱ្យដឹងកាលពីថ្ងៃទី៥ ខែតុលានេះថា រដ្ឋាភិបាល បានអនុវត្តគោលនយោបាយជាតិចាក់វ៉ាក់សាំងបង្ការជំងឺកូវីដ-១៩ ក្នុងក្របខណ្ឌទូទាំងប្រទេស សម្រេចបានលទ្ធផលល្អប្រសើរ ដែលក្នុងនោះ រាជធានីភ្នំពេញត្រូវបានគេទទួលស្គាល់ថា ចាក់ជូនប្រជាពលរដ្ឋបានច្រើនជាងគេក្នុងពិភពលោក ហើយអត្រានេះស្ទើរតែ១០០% ទាំងចាក់ជូនប្រជាពលរដ្ឋអាយុចាប់ពី១៨ឆ្នាំឡើងទៅ និងកុមារ-យុវជនដែលមានអាយុចាប់ពី៦ឆ្នាំដល់ក្រោម១៨ឆ្នាំ។
ករណីនេះ រដ្ឋបាលរាជធានីភ្នំពេញ ប្រាប់ម្ចាស់គ្រឹះស្ថានសិក្សា គណៈកម្មការផ្សារ ម្ចាស់ផ្សារម៉ាត ម្ចាស់ភោជនីយដ្ឋាន ម្ចាស់អាជីវកម្មដ្ឋាន អាជីវករ វិស័យឯកជន និងសាធារណជនទាំងអស់ ត្រូវឱ្យអ្នកមានអាយុចាប់ពី១៨ឆ្នាំឡើង និងអាយុ៦ឆ្នាំដល់ក្រោម១៨ឆ្នាំ ដែលចូលទីតាំងរបស់ខ្លួន បង្ហាញកាតចាក់វ៉ាក់សាំងដែលចេញដោយក្រសួងសុខាភិបាល ឬកាតចេញដោយក្រសួងការពារជាតិ ឬលិខិតបញ្ជាក់ការចាក់វ៉ាក់សាំងបង្ការជំងឺកូវីដ-១៩ ដើម្បីរួមគ្នាទប់ស្កាត់ការឆ្លងរាលដាលនៃជំងឺកូវីដ-១៩បំប្លែងថ្មី។
ប៉ុន្តែបើសិនជាម្ចាស់គ្រឹះស្ថានសិក្សានិងម្ចាស់អាជីវកម្មទាំងអស់មិនអនុវត្តតាមការណែនាំរបស់រដ្ឋបាលរាជធានីភ្នំពេញទេ នឹងត្រូវប្រឈមចំពោះមុខច្បាប់ជាធរមាន។
សេចក្ដីណែនាំមានខ្លឹមសារដូច្នេះថា៖ «បើមិនអនុវត្តតាមគោលការណ៍ណែនាំខាងលើ ត្រូវប្រឈមមុខនឹងការដកហូតអាជ្ញាបណ្ណឬលិខិតអនុញ្ញាត និងអាចឈានទៅបិទទីតាំង ព្រមទាំងត្រូវចាត់វិធានការច្បាប់ ស្របតាមច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត និងលិខិតបទដ្ឋានគតិយុត្តដែលពាក់ព័ន្ធជាធរមាន»។
បន្ថែមពីនេះ រដ្ឋបាលរាជធានីភ្នំពេញ ក៏លើកទឹកចិត្តដល់ប្រជាពលរដ្ឋឬអ្នកដែលឃើញម្ចាស់គ្រឹះស្ថានសិក្សានិងម្ចាស់អាជីវកម្មទាំងអស់ណាដែលមិនអនុវត្តតាមវិធានការនេះ ត្រូវរាយការណ៍ទៅអាជ្ញាធរដែលនៅក្បែរនោះជាបន្ទាន់ ដើម្បីរួមគ្នាទប់ស្កាត់ការឆ្លងរាលដាលនៃជំងឺកូវីដ-១៩បានប្រសិទ្ធភាពខ្ពស់ផងដែរ។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង មានប្រសាសន៍ថា ការកំណត់ឱ្យម្ចាស់គ្រឹះស្ថានសិក្សានិងម្ចាស់អាជីវកម្មទាំងអស់អនុវត្តវិធានលើអ្នកមានអាយុចាប់ពី១៨ឆ្នាំឡើង និងអាយុ៦ឆ្នាំដល់ក្រោម១៨ឆ្នាំ ដែលចូលទីតាំងរបស់ខ្លួន បង្ហាញកាតចាក់វ៉ាក់សាំង ដើម្បីបញ្ចៀសការទទួលខុសត្រូវចំពោះមុខច្បាប់ មិនអាចរួមគ្នាទប់ស្កាត់ការឆ្លងរាលដាលនៃជំងឺកូវីដ-១៩បានទេ។
លោក គិមអេង ផ្តល់ជាអនុសាសន៍ថា ដើម្បីរួមគ្នាទប់ស្កាត់ការឆ្លងរាលដាលនៃជំងឺកូវីដ-១៩បាន លុះត្រាតែស្ថាប័នពាក់ព័ន្ធ ម្ចាស់គ្រឹះស្ថាន ម្ចាស់អាជីវកម្ម និងប្រជាពលរដ្ឋ ត្រូវរួមគ្នាអនុវត្តវិធានសុខាភិបាល «៣កុំ ៣ការពារ» ឱ្យបានខ្ជាប់ខ្ជួន។
លោកមានប្រសាសន៍ថា៖ «វិធានការសុខភិបាលក្នុងការទប់ស្កាត់ការចម្លងនៅកន្លែងដែលធ្វើអាជីវកម្មនីមួយៗ គឺជារឿងមួយដែលល្អបំផុត ហើយចំពោះកាតចាក់វ៉ាក់សាំង វាសំខាន់ហើយ! តែបើយើងយកកាតនោះជារឿងធំមែនទែន ដោយមិនពង្រឹងការអនុវត្តវិធានសុខាភិបាល ៣កុំ ៣ការពារ ឱ្យបានខ្ជាប់ខ្ជួនទេ បញ្ហាឆ្លងរាលដាលវានៅតែកើតមាន ព្រោះកន្លងមក អ្នកចាក់ហើយម្តងឬពីរដងនៅតែមានអ្នកឆ្លង អ៊ីចឹងគួរតែមានវិធានការលើសពីនេះទើបជាការប្រសើរ»។
បើតាមក្រសួងសុខាភិបាល គិតត្រឹមព្រឹកថ្ងៃអង្គារទី៥ ខែតុលា ម្សិលមិញ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន១១៣ ៧០៣នាក់ ក្នុងនោះ អ្នកជំងឺព្យាបាលជាសះស្បើយចំនួន១០៥ ៣៥០នាក់ អ្នកស្លាប់កើនដល់ចំនួន២ ៤១៨នាក់ និងករណីនាំចូលពីក្រៅប្រទេសចំនួន១៩ ១៣៦នាក់៕
