សាលាដំបូងខេត្តកំពង់ធំ បានសម្រេចផ្តន្ទាទោសសកម្មជនព្រៃឡង់ម្នាក់ឱ្យជាប់ពន្ធនាគារ២ឆ្នាំ ក្រោមបទចោទ «ហិង្សាដោយចេតនាមានស្ថានទម្ងន់ទោស» ប៉ុន្តែទោសនោះត្រូវបានព្យួរទាំងអស់។
មេធាវីការពារក្ដីឱ្យសមាជិកបណ្ដាញសហគមន៍ព្រៃឡង់ លោក សំ សុគង់ ប្រាប់ វីអូឌី នៅថ្ងៃអង្គារនេះថា ចៅក្រមសាលាដំបូងខេត្តកំពង់ធំបានសម្រេចប្ដូរបទចោទពីបទ «ប៉ុនប៉ងមនុស្សឃាត» មកបទ «ហិង្សាដោយចេតនាមានស្ថានទម្ងន់ទោស» ទៅលើកូនក្តីរបស់លោកឈ្មោះ ចាន់ ធឿន ដែលជាសមាជិកបណ្ដាញសហគមន៍ព្រៃឡង់ ហើយបានផ្តន្ទាទោសកូនក្ដីរបស់លោកដាក់ពន្ធនាគារចំនួន២ឆ្នាំ ប៉ុន្តែទោសនេះត្រូវបានព្យួរ។
លោក សំ សុគង់ បន្តថា ទោះបីជាតុលាការសម្រេចព្យួរទោសដល់កូនក្ដីរបស់លោកក៏ដោយ ប៉ុន្តែលោកចាត់ទុកការសម្រេចរបស់តុលាការថាជារឿងអយុត្តិធម៌ ដោយថា ក្នុងសំណុំរឿងនេះ កូនក្ដីរបស់លោកជាជនរងគ្រោះ ប៉ុន្តែបែរជាត្រូវរងគ្រោះនៅប្រព័ន្ធតុលាការបន្ថែមទៀតទៅវិញ។
លោកថា៖ «ហើយការដូរបទចោទពីបទ “ប៉ុនប៉ងមនុស្សឃាត” មក “ហិង្សាដោយចេតនាដោយស្ថានទម្ងន់” យើងមើលឃើញថា នៅតែមិនទាន់បានផ្ដល់នូវភាពយុតិ្តធម៌ចំពោះកូនក្ដីនៅឡើយទេ»។
សមាជិកបណ្ដាញព្រៃឡង់នៅខេត្តកំពង់ធំ លោក ចាន់ ធឿន បានឱ្យដឹងថា កាលពីខែកក្កដា ឆ្នាំ២០២០ រូបលោកនិងពលរដ្ឋផ្សេងទៀតបានចុះទប់ស្កាត់បទល្មើសព្រៃឈើនៅក្នុងសហគមន៍មួយស្ថិតនៅភូមិត្រពាំងត្រឡាច ឃុំមានរិទ្ធ ស្រុកសណ្ដាន់ ដោយប្រទះឃើញបុគ្គលឈ្មោះ ប៉ាក យ៉ាងគួ បានដឹកឈើតាមគោយន្តចេញពីព្រៃសហគមន៍។
សកម្មជនព្រៃឈើរូបនេះបន្តថា រូបលោកបានយកទូរសព្ទថតគោយន្តដឹកឈើនោះ ហើយឈ្មោះ ប៉ាក យ៉ាងគួ បានស្ទុះប្រទាញប្រទង់ដណ្ដើមទូរសព្ទ និងឆក់យកកាំបិតស្នៀតភ្ជង់រូបលោក រួចប្តឹងលោកទៅតុលាការថែមទៀត ក្រោមបទចោទ «ប៉ុនប៉ងមនុស្សឃាត» និងទាមទារសំណង២ ០០០ដុល្លារ ថែមទៀតផង។
លោក ចាន់ ធឿន បានលើកឡើងថា ទោះបីជាទោស២ឆ្នាំត្រូវព្យួរក្ដី ប៉ុន្តែលោកថា ការសម្រេចរបស់សាលាដំបូងខេត្តកំពង់ធំ ជារឿងអយុត្តិធម៌សម្រាប់រូបលោក។
លោកថា៖ «ខ្ញុំមើលទៅសំណុំរឿងហ្នឹង វាអយុត្តិធម៌សម្រាប់ខ្ញុំ! បទល្មើសរកស៊ីឈើប៉ុនណាណីមិនប្ដឹង មកប្ដឹងខ្ញុំ ហើយមកចោទខ្ញុំប៉ុណ្ណេះហើយ វាអយុត្តិធម៌ទៀត! ខ្ញុំអត់សុខចិត្តទេ ព្រោះខ្ញុំអត់មានប្រព្រឹត្តអីខុសផង មកឆក់ទូរសព្ទខ្ញុំ ហើយមកប្ដឹងខ្ញុំទៀត។ ខ្ញុំសុំប្ដឹងជំទាស់ទៅតុលាការឧទ្ធរណ៍ សាលក្រមហ្នឹងមិនអាចទទួលបានទេ ខ្ញុំនៅតែជាជនរងគ្រោះ»។
នាយិកាប្រតិបត្តិនៃមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព មានប្រសាសន៍ថា កន្លកមក សមាជិកបណ្ដាញព្រៃឡង់រូបនេះតែងតែប្រឈមនឹងការយាយីគ្រប់ទម្រង់ រួមទាំងការគំរាមកំហែងផ្នែករាងកាយ និងតាមផ្លូវច្បាប់ ជាដើម។
លោកស្រីបន្តថា ការគំរាមកំហែងនិងការដាក់ទោសទណ្ឌទៅលើសមាជិកបណ្ដាញព្រៃឡង់និងសកម្មជនបរិស្ថានដទៃទៀត មិនគួរកើតឡើងសម្រាប់ប្រទេសដែលប្រកាន់យកលទ្ធិប្រជាធិបតេយ្យនោះទេ។
លោកស្រី ចក់ សុភាព បន្តថា រដ្ឋាភិបាលគួរតែស្វាគមន៍និងលើកទឹកចិត្តដល់សហគមន៍មូលដ្ឋាន សកម្មជនការពារបរិស្ថាន ដែលបានជួយការពារធនធានធម្មជាតិដែលជាសម្បត្តិរបស់ប្រទេសជាតិ ជាជាងធ្វើទុក្ខបុកម្នេញពួកគាត់បែបនេះ។
លោកស្រីថា៖ «ខ្ញុំសង្ឃឹមថា រដ្ឋាភិបាលលោកគួរតែពិនិត្យមើលឡើងវិញនូវការប្ដេជ្ញាររបស់ខ្លួននូវការការពារដល់ធនធានធម្មជាតិ។ ហើយការប្ដេជ្ញានេះអាចសម្រេចទៅបានទាល់តែមានការចូលរួមពីសហគមន៍មូលដ្ឋាន ហើយដរាបណាសហគមន៍មូលដ្ឋាន សកម្មជនការពារបរិស្ថានអីជាដើម នៅតែរងនូវការគំរាមកំហែងហ្នឹង វាហាក់បីដូចជាប្រាសចាកអំពីឆន្ទៈរបស់រដ្ឋាភិបាលដែលធ្លាប់អះអាងហ្នឹង»៕