ក្រសួងការងារ និងបណ្ដុះបណ្ដាលវិជ្ជាជីវៈ បានសម្រេចឱ្យគ្រឹះស្ថានអប់រំបណ្ដុះបណ្ដាលបច្ចេកទេសនិងវិជ្ជាជីវៈដែលស្ថិតនៅក្រោមឱវាទក្រសួងទាំងអស់ អាចបើកដំណើរការឡើងវិញបាន បន្ទាប់ពីស្ថានភាពនៃការរីករាលដាលជំងឺកូវីដ-១៩ មានការថមថយមួយកម្រិតនាពេលបច្ចុប្បន្ន។
សេចក្ដីណែនាំរបស់ក្រសួងការងារ នៅថ្ងៃទី១២ ខែតុលា ឆ្នាំ២០២១នេះ បានបញ្ជាក់ថា គ្រប់គ្រឹះស្ថានអប់រំបណ្ដុះបណ្ដាលបច្ចេកទេសនិងវិជ្ជាជីវៈ ឬហៅកាត់ថា អ.ប.វ ស្ថិតនៅក្រោមឱវាទរបស់ខ្លួន អាចបើកដំណើរការឡើងវិញ ប៉ុន្តែត្រូវអនុវត្តតាមលក្ខខណ្ឌមួយចំនួន។ លក្ខខណ្ឌទាំងនោះ រួមមាន ដាក់ពាក្យស្នើសុំបើកដំណើរការឡើងវិញមកគណៈកម្មការគ្រប់គ្រង ដើម្បីវាយតម្លៃក្នុងការបើកគ្រឹះស្ថានឡើងវិញ។
បន្ថែមពីនេះ ក្រសួងក៏បានតម្រូវឱ្យមានការចុះកិច្ចសន្យាជាមួយក្រសួង ដោយធានាថា នឹងអនុវត្តឱ្យបាននូវគោលការណ៍ប្រតិបត្តិស្ដង់ដារ (SOP) សម្រាប់ដំណើរការគ្រឹះស្ថាន អ.ប.វ ឡើងវិញ ក្នុងបរិបទនៃជំងឺកូវីដ-១៩ ចុះនៅថ្ងៃទី៨ ខែតុលា ឆ្នាំ២០២១ របស់ក្រសួងការងារ ព្រមទាំងបង្កើតក្រុមការងារបង្ការនិងទប់ស្កាត់ការរីករាលដាលជំងឺកូវីដ-១៩ ប្រចាំគ្រឹះស្ថាន អ.ប.វ។ ជាងនេះទៀត ត្រូវចាត់តាំងជនបង្គោលចំនួន២នាក់ទទួលបន្ទុកទទួលខុសត្រូវលើការងារទំនាក់ទំនងនិងផ្ដល់ព័ត៌មាន ព្រមទាំងចាត់តាំងបុគ្គលិកទទួលបន្ទុកត្រួតពិនិត្យការពាក់ម៉ាស វាស់កម្ដៅ បាញ់ទឹកអាល់កុល ឬជែលអាល់កុល។
ជាមួយគ្នានេះ ត្រូវធ្វើតេស្តរហ័សរកអង់ទីហ្សែនកូវីដ-១៩ ចំពោះបុគ្គលិក មន្ត្រីរាជការ សាស្រ្តាចារ្យ គ្រូបច្ចេកទេសនិងសិក្ខាកាម សិស្ស-និស្សិត ដែលមានរោគសញ្ញាសង្ស័យ មុនបើកដំណើរការគ្រឹះស្ថាន អ.ប.វ ឡើងវិញ រួមទាំងអនុវត្តវិធានការ «៣ការពារ និង ៣កុំ» និងវិធានការសំខាន់ៗរបស់ក្រសួងសុខាភិបាលមួយចំនួនទៀត។
កាលពីថ្ងៃទី២០ ខែមីនា ឆ្នាំ២០២១ ក្រសួងការងារ និងបណ្ដុះបណ្ដាលវិជ្ជាជីវៈ បានចេញសេចក្ដីជូនដំណឹងស្តីពីការផ្អាកដំណើរការនៅតាមគ្រឹះស្ថានអប់រំបណ្ដុះបណ្ដាលបច្ចេកទេសនិងវិជ្ជាជីវៈទាំងអស់នៅទូទាំងប្រទេសជាបណ្ដោះអាសន្ន។ ការសម្រេចផ្អាកនេះធ្វើឡើងដើម្បីឆ្លើយតបទៅនឹងការរីករាលដាលនៃការឆ្លងមេរោគកូវីដ-១៩ នៅក្នុងសហគមន៍ ប៉ុន្តែក្រសួងបញ្ជាក់ថា គ្រឹះស្ថានបណ្តុះបណ្តាលទាំងនោះអាចបន្តដំណើរការឡើងវិញបាន គឺតាមរយៈការរៀនពីចម្ងាយឬអនឡាញតែប៉ុណ្ណោះ៕
