បុគ្គលិកកាស៊ីណូណាហ្គាវើលដ៍ដែលកំពុងធ្វើកូដកម្ម ប្រមាណជិត១០០នាក់ បានបន្តប្រមូលផ្ដុំគ្នាតវ៉ានៅមុខក្រុមហ៊ុនជាថ្មីទៀត នៅថ្ងៃសុក្រនេះ ទាមទារឱ្យមានដំណោះស្រាយវិវាទការងារដែលអូសបន្លាយជាង១ឆ្នាំ។
ជាការកត់សម្គាល់ ក្នុងការប្រមូលផ្តុំតវ៉ានៅថ្ងៃទី១៣ ខែមករានេះ ក្រុមកូដករបានវាយស្គរ មេក្រូ កាន់បដាក្រណាត់ពណ៌ក្រហម ខៀវ និងខ្មៅ ជាដើម ដោយមានសារប្រយោគទាមទារដំណោះស្រាយការងារ និងការដោះលែងប្រធានសហជីព កញ្ញា ឈឹម ស៊ីថរ នៅលើនោះ។
កូដករ និងជាសមាជិកសហជីពបុគ្គលិកកម្មករខ្មែរ នៃក្រុមហ៊ុនណាហ្គាវើលដ៍ អ្នកស្រី សុខ រតនា ប្រាប់ VOD នៅទីតាំងកូដកម្មនោះថា ការដែលពួកគាត់បន្តការតវ៉ានេះ ដោយសារតែការចរចាមិនមានលទ្ធផល ខណៈថៅកែណាហ្គាវើលដ៍អាងអំណាចទឹកលុយ បានរំលោភលើច្បាប់ការងារកម្ពុជា ដោយបញ្ឈប់បុគ្គលិក-កម្មករខ្មែររាប់រយនាក់ ហើយគ្រាន់តែហៅពួកគេឱ្យទៅទទួលសំណងតិចតួចដើម្បីបញ្ចប់រឿង។
តែយ៉ាងណា អ្នកស្រីថា ក្រុមកូដករមិនមានការគុំកួនលើថៅកែឬអាជ្ញាធរឡើយ ពោលគឺពួកគេចេញតវ៉ាដើម្បីទាមទារនូវដំណោះស្រាយដែលអាចទទួលយកបាន និងឱ្យមានការដោះលែងប្រធានសហជីពរបស់ពួកគេ គឺកញ្ញា ឈឹម ស៊ីថរ។
កូដករណាហ្គារូបនេះទទូចឱ្យរដ្ឋាភិបាលបំពេញតួនាទីជាអ្នកបម្រើរាស្ត្រ ដោះស្រាយវិវាទការងារដោយយុត្តិធម៌ និងដាក់សម្ពាធឱ្យក្រុមហ៊ុនល្បែងណាហ្គាវើលដ៍គោរពច្បាប់ស្តីពីសហជីព ដោយថា ការព្រងើយកន្តើយរបស់អាជ្ញាធររដ្ឋ ជាការមើលរំលងនូវទុក្ខលំបាករបស់ពលរដ្ឋ។
អ្នកស្រី សុខ រតនា និយាយថា៖ «បើគេកំពុងតែជាន់យើង កំពុងតែបំបិទសិទ្ធិការងាររបស់យើង អត់ឱ្យយើងមានសិទ្ធិតវ៉ា ហើយយើងទៅដើរចេញ ធ្វើការកន្លែងផ្សេង សួរថាកន្លែងផ្សេងហ្នឹងអត់អាចរំលោភសិទ្ធិយើង? អ៊ីចឹងយើងត្រូវតែងើប យើងដួលកន្លែងក្រុមហ៊ុនណាហ្គា យើងងើបកន្លែងណាហ្គា ហើយទាមទារសិទ្ធិយើងមកវិញ។ ទោះក្រុមហ៊ុនហ្នឹងអាក្រក់ តែយើងចង់ឱ្យកែប្រែទៅជាក្រុមហ៊ុនមួយដែលថា កុំឱ្យថៅកែ និងបុគ្គលិកមើលមកគ្នាថាអាក្រក់។ ចង់ឱ្យថៅកែមើលមកបុគ្គលិកល្អផង អត់ចង់ឱ្យថៅកែហ្នឹងគិតថាចង់បញ្ឈប់បុគ្គលិកពេលណាក៏បានដែរ ទោះអត់ខុសអីក៏បញ្ឈប់បានដែរ។ ខ្ញុំអត់ចង់ឃើញទិដ្ឋភាពហ្នឹងសម្រាប់កូនខ្មែរយើងជំនាន់ក្រោយទៀតទេ បានយើងខំប្រឹងទាមទារចូលធ្វើការវិញ ឱ្យមានវត្តមានសហជីពហ្នឹង»។
ក្នុងពេលប្រមូលផ្តុំតវ៉ានេះដែរ កូដករណាហ្គាមួយរូបទៀត កញ្ញា ម៉ៅ សុភា អះអាងថា ការដែលគាត់បន្តចេញតវ៉ានេះ គឺក្រោមហេតុផលទាមទារការគោរពសិទ្ធិសហជីពនៅកន្លែងការងារ និងជំរុញឱ្យមានដំណោះស្រាយបញ្ចប់វិវាទឱ្យបានឆាប់។
កញ្ញាបញ្ជាក់ថា ពួកគាត់នឹងមិនឈប់ធ្វើកូដកម្មទេ បើគ្មានដំណោះស្រាយតាមច្បាប់ការងារនោះ បើទោះអះអាងថារងនូវការគំរាមកំហែងបំភិតបំភ័យក៏ដោយ។
បើតាមក្រុមកូដករ បច្ចុប្បន្ននៅសល់បុគ្គលិកជាង១០០នាក់ប៉ុណ្ណោះដែលទាមទារចូលធ្វើការវិញតាមច្បាប់ និងកិច្ចសន្យាការងារ ខណៈបុគ្គលិកដែលគ្មានឈ្មោះកាត់ចំនួនជាង៣០០នាក់ទៀតនៅបន្តស្ម័គ្រចិត្តដោះដូរឈ្មោះឱ្យពួកគេដដែល។
វីអូឌី មិនទាន់អាចសុំការបញ្ជាក់ពីតំណាងក្រុមហ៊ុនណាហ្គាវើលដ៍ ជុំវិញការតវ៉ារបស់កូដករនេះបានទេ នៅថ្ងៃសុក្រនេះ។
ចំណែកអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ ធ្លាប់មានប្រសាសន៍ប្រាប់វីអូឌីតាមសារតេឡេក្រាមកាលពីចុងខែធ្នូ ឆ្នាំ២០២២ ថា ក្រសួងការងារបន្តអនុវត្តច្បាប់ និងសុំឱ្យគ្រប់ភាគីគោរពច្បាប់និងយន្តការនានាដែលនៅជាធរមាននៅកម្ពុជា។
ប្រធានសម្ព័ន្ធសហជីពកម្ពុជា អ្នកស្រី យ៉ាង សុភ័ណ្ឌ ធ្លាប់លើកឡើងថា វិវាទការងារនៅក្រុមហ៊ុនណាហ្គាវើលដ៍នេះ នៅមានផ្លូវនិងយន្តការដោះស្រាយបញ្ចប់ដោយយុត្តិធម៌។ អ្នកស្រីថា ទាំងកម្មករ និងក្រុមហ៊ុន សុទ្ធតែមានជម្រើស ជាក់ស្តែងកម្មករដែលគ្មានឈ្មោះកាត់ជាច្រើននាក់ សុខចិត្តដោះដូរជាមួយកម្មករដែលត្រូវក្រុមហ៊ុនបញ្ឈប់ត្រឹមចំនួនតិចជាង ខណៈក្រុមហ៊ុនទាមទារបញ្ឈប់បុគ្គលិកនូវចំនួនកំណត់មួយ។
វិវាទការងារក្រុមហ៊ុនណាហ្គាវើលដ៍បានកើតឡើងជាង១ឆ្នាំមកហើយ ក្រោយពេលក្រុមហ៊ុននេះបានបញ្ឈប់បុគ្គលិកចំនួន១ ៣២៩នាក់ ក្នុងចំណោមបុគ្គលិកសរុបជាង៨ ០០០នាក់ ពីការងារ ក្រោមហេតុផលថា ជួបវិបត្តិហិរញ្ញវត្ថុដោយសារតែបញ្ហាជំងឺកូវីដ-១៩។ យ៉ាងណា បុគ្គលិកដែលចេញធ្វើកូដកម្មជាង១២ខែមកនេះ អះអាងថា ការបញ្ឈប់នោះដោយសារថៅកែមានចេតនារំលាយសហជីពការពារសិទ្ធិកម្មករឱ្យអស់ពីក្រុមហ៊ុនមួយនេះ។
កាលពីថ្ងៃទី២៦ ខែវិច្ឆិកា ឆ្នាំ២០២២ ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ ត្រូវបានសមត្ថកិច្ចចាប់ខ្លួននិងបញ្ជូនទៅឃុំខ្លួននៅពន្ធនាគារព្រៃស រាជធានីភ្នំពេញ ពាក់ព័ន្ធបទល្មើសបម្រាម ឬគេចវេះពីការត្រួតពិនិត្យរបស់តុលាការ ក្រោយពេលកញ្ញាបានធ្វើដំណើរត្រលប់មកពីប្រជុំនៅប្រទេសអូស្ត្រាលីវិញ។
ក្រៅពីនោះ កូដករណាហ្គាវើលដ៍ជិត១០រូប ក៏ត្រូវបានសាលាដំបូងរាជធានីភ្នំពេញកោះហៅឱ្យចូលបំភ្លឺជាបន្តបន្ទាប់នាពេលថ្មីៗនេះ ក្រោមបណ្តឹងចំនួន៣របស់ក្រុមហ៊ុន រួមមាន បទរំលោភលើលំនៅឋាន, ធ្វើឱ្យខូចខាតដោយចេតនាស្ថានទម្ងន់ទោស និងចាប់ឃុំឃាំងនិងបង្ខាំងដោយខុសច្បាប់ ដែលក្រុមហ៊ុនបានប្តឹងពួកគេ៕
