កម្ពុជាបានទទួលវ៉ាក់សាំងស៊ីណូវ៉ាក់ (Sinovac) ចំនួន២លានដូសបន្ថែម ដែលជាជំនួយរបស់រដ្ឋាភិបាលនិងប្រជាជនចិន នៅព្រឹកថ្ងៃទី១៤ ខែតុលា ឆ្នាំ២០២១នេះ។
រដ្ឋលេខាធិការ និងជាអ្នកនាំពាក្យក្រសួងសុខាភិបាល លោកស្រី យក់ សម្បត្តិ ថ្លែងប្រាប់អ្នកសារព័ត៌មាននៅអាកាសយានដ្ឋានអន្តរជាតិភ្នំពេញ ថាកម្ពុជាបានទទួលវ៉ាក់សាំង២លានដូសបន្ថែមទៀតដែលជាជំនួយពីរដ្ឋាភិបាលចិន។ ហើយបើរាប់ទាំងជំនួយនិងការបញ្ជាទិញផងនោះ គិតមកដល់ពេលនេះ កម្ពុជាទទួលបានវ៉ាក់សាំងសរុបចំនួនជាង៣៦លានដូស។
លោកស្រី យក់ សម្បត្តិ បញ្ជាក់ថា៖ «វ៉ាក់សាំងយើងៗមានគ្រប់គ្រាន់ អត់ខ្វះទេ! វ៉ាក់សាំងក្នុងឃ្លាំងមាន៤លានកន្លះហើយ។ ឥលូវយើងបានទទួល២លានដូសទៀត អ៊ីចឹងឡើង៦លានកន្លះហើយក្នុងដៃយើង។ ហើយវ៉ាក់សាំងមួយចំនួន គឺមាននៅតាមស្តុកនៅគ្រប់ខេត្តទាំងអស់»។
បើតាមលោកស្រី យក់ សម្បត្តិ រហូតមកដល់ពេលនេះ ជំនួយវ៉ាក់សាំងរបស់ប្រទេសចិនចំពោះកម្ពុជា មានសរុប៧,៥លានដូស ក្នុងនោះ វ៉ាក់សាំងស៊ីណូហ្វាមពាក់កណ្ដាល និងស៊ីណូវ៉ាក់ពាក់កណ្ដាល។ លោកស្រីថា កម្ពុជានឹងបន្តប្រើវ៉ាក់សាំងស៊ីណូវ៉ាក់ដែលទទួលបានពីចិនពេលនេះ សម្រាប់ចាក់ជាដូសជំរុញ ឬដូសទី៣ផងដែរ។
ក្នុងដំណើរបំពេញទស្សនកិច្ចនៅកម្ពុជា កាលពីថ្ងៃ១២ ខែកញ្ញា កន្លងទៅ លោក វ៉ាង យី ទីប្រឹក្សារដ្ឋ និងជារដ្ឋមន្ត្រីការបរទេសចិន បានប្រកាសផ្ដល់ជំនួយវ៉ាក់សាំងស៊ីណូហ្វាមចំនួន៣លានដូសបន្ថែមទៀតដល់កម្ពុជា ដើម្បីចូលរួមប្រយុទ្ធប្រឆាំងនឹងជំងឺកូវីដ-១៩។
ចិនគឺជាប្រទេសដំបូងគេដែលបានផ្ដល់ជំនួយវ៉ាក់សាំងបង្ការជំងឺកូវីដ-១៩មកកម្ពុជា កាលពីខែកុម្ភៈ ឆ្នាំ២០២១។
គិតត្រឹមថ្ងៃទី១៣ ខែតុលា កម្ពុជាចាក់វ៉ាក់សាំងជូនប្រជាពលរដ្ឋអាយុចាប់ពី៦ឆ្នាំឡើង បានចំនួនជាង១៣លាននាក់ហើយ ឬស្មើជាង៨៤ភាគរយ (៨៤,៦៦%) ធៀបនឹងចំនួនប្រជាពលរដ្ឋសរុបប្រមាណ១៦លាននាក់ ក្នុងនោះ អ្នកចាក់បានទាំងពីរដូសមានចំនួនជាង១២លាននាក់ ហើយអ្នកចាក់ដូសទី៣ ឬដូសជំរុញ បានជាង១លាននាក់៕
