ក្រសួងធម្មការ និងសាសនា បញ្ជាក់ថា ពិធីបុណ្យកឋិនទានសម្រាប់ឆ្នាំ២០២១នេះ នឹងប្រព្រឹត្តទៅតាមទំនៀមទម្លាប់ប្រពៃណីព្រះពុទ្ធសាសនា ប៉ុន្តែអាជ្ញាធរហាមឃាត់នូវការផ្សព្វផ្សាយកម្មវិធីបុណ្យ ដង្ហែតាមដងផ្លូវឬជុំវិញព្រះវិហារ ពោលគឺគ្រាន់តែវេរប្រគេនត្រៃចីវរជាកិច្ចសម្រេចបុណ្យ។
ក្រសួងធម្មការ និងសាសនា នៅថ្ងៃទី១៤ ខែតុលានេះ បានចេញសេចក្ដីណែនាំបន្ថែមស្តីពីការប្រារព្ធពិធីបុណ្យកឋិនទាន ចាប់ពីថ្ងៃទី២២ ខែតុលា ដល់ថ្ងៃទី១៩ ខែវិច្ឆិកា ឆ្នាំ២០២១។
សេចក្ដីណែនាំបន្តថា ដើម្បីរៀបចំបុណ្យកឋិនទានឱ្យដំណើរការនិងប្រព្រឹត្តទៅស្របតាមទំនៀមទម្លាប់ប្រពៃណីព្រះពុទ្ធសាសនា ក្រសួងសុខាភិបាល និងអាជ្ញាធរដែនដី នឹងអនុវត្តវិធានការចាំបាច់នានាតាមសភាពជាក់ស្ដែងនៃទីកន្លែងនីមួយៗ។
ក្រសួងថា ការធ្វើដូច្នេះសំដៅកាត់ផ្តាច់និងទប់ស្កាត់ការឆ្លងរីករាលដាលនៃជំងឺកូដៃ-១៩នៅទូទាំងប្រទេស ជាពិសេសមេរោគបំប្លែងខ្លួនថ្មី ប្រភេទ ដែលតា (Delta) ដែលមានកម្រិតនៃការឆ្លងរាលដាលឆាប់រហ័ស។
ក្រសួងធម្មការ និងសាសនា សរសេរថា៖ «១- ត្រូវអនុវត្តឱ្យបានយ៉ាងម៉ឺងម៉ាត់នូវវិធានការការពារនានារបស់ក្រសួងសុខាភិបាល […] ២- ហាមឃាត់ផ្សព្វផ្សាយកម្មវិធីបុណ្យ ដង្ហែតាមដងផ្លូវឬជុំវិញព្រះវិហារ ដោយគ្រាន់តែវេរប្រគេនត្រៃចីវរជាកិច្ចសម្រេចបុណ្យ»។
បើតាមក្រសួងធម្មការ និងសាសនា បុណ្យកឋិនទាន ជាទានមួយដ៏ថ្លៃថ្លាក្នុងព្រះពុទ្ធសាសនាមាន ផលានិសង្សខ្ពស់ ទាំងទាយក ទាយិកា និងបដិគ្គាហក ជាទីជ្រះថ្លារបស់ពុទ្ធបរិស័ទខ្មែរ តែងតែប្រារព្ធធ្វើឡើងរៀងរាល់ឆ្នាំ មានរយៈពេលកំណត់តែ២៩ថ្ងៃ ដោយវត្តនីមួយៗទទួលអង្គកឋិនបានតែមួយលើកប៉ុណ្ណោះ៕
