សហជីពមួយចំនួនបានអះអាងថា ខ្លួនបានរកឃើញថាមានរោងចក្រសហគ្រាសខ្នាតតូចនិងមធ្យមមួយចំនួនបានបិទបាំងតួលេខកម្មកររបស់ខ្លួន ដើម្បីគេចវេះពីការបង់ប្រាក់ធានារ៉ាប់រងសុខភាពនៅបេឡាជាតិរបបសន្តិសុខសង្គម (ប.ស.ស) ខណៈអ្នកនាំពាក្យក្រសួងការងារអះអាងថា នឹងបញ្ជូនមន្ត្រីឱ្យចុះពិនិត្យមើលនៅដើមសប្ដាហ៍ក្រោយនេះ។
ប្រធានសម្ព័ន្ធសហជីពជាតិ លោក ហ្វា សាលី ប្រាប់ វីអូឌី នៅថ្ងៃនេះថា មានរោងចក្រសហគ្រាស ខ្នាតតូចនិងមធ្យមមួយចំនួនបាននិងកំពុងបិទបាំងតួលេខកម្មករនេះ ដើម្បីគេចវេះពីការបង់ប្រាក់ធានារ៉ាប់រងសុខភាពកម្មករនិយោជិតទៅឱ្យ ប.ស.ស។
បើតាមលោក ហ្វា សាលី រោងចក្រខ្នាតធំ ខ្នាតតូច និងខ្នាតមធ្យមទាំងនោះមួយចំនួនស្ថិតនៅរាជធានីភ្នំពេញ និងខេត្តកណ្ដាល។ លោកបន្តថា ការដែលម្ចាស់រោងចក្រមិនព្រមទិញបណ្ណបេឡាជាតិរបបសន្តិសុខសង្គមឱ្យកម្មករ គឺជាការគេចវេះពីការបង់ប្រាក់ធានារ៉ាប់រងសុខភាពជូនកម្មករ ដែលករណីនេះបានធ្វើឱ្យកម្មករបាត់បង់អត្ថប្រយោជន៍ផ្សេងៗ។
លោកថា៖ «អ៊ីចឹងបើសិនជាគាត់មិនមានបណ្ណ ប.ស.ស ទេ នៅពេលដែលគាត់មានគ្រោះថ្នាក់ការងារឬបញ្ហាផ្សេងៗ ដូចបច្ចុប្បន្នពាក់ព័ន្ធនឹងបញ្ហាកូវីដ-១៩ វាជាបន្ទុករបស់គាត់តែម្ដង។ អ៊ីចឹងក្រុមហ៊ុនក៏រួចកាតព្វកិច្ច ហើយក្រសួងនិងមន្ទីរសុខាភិបាលផ្សេងៗ សុទ្ធតែរួចកាតព្វកិច្ចទាំងអស់។ អ៊ីចឹងអ្នកដែលបញ្ហាធំចម្បងជាងគេ គឺបងប្អូនកម្មករនិយោជិតហ្នឹងឯង ដែលពួកគាត់បាត់បង់សិទ្ធិនិងអត្ថប្រយោជន៍ ដូចជា ប្រសិនជាគាត់កើតឬឆ្លងកូវីដ គាត់ទទួលបានប្រាក់ ៧០% ពី ប.ស.ស ហើយ ៥០% ទទួលបាន៧ថ្ងៃពីម្ចាស់រោងចក្រសហគ្រាស»។
លោក ហ្វា សាលី បន្តថា បើសិនម្ចាស់រោងចក្រមិនទិញបណ្ណបេឡាជាតិរបបសន្តិសុខសង្គមមិនមែនខាតប្រយោជន៍តែកម្មករនោះទេ វាក៏ធ្វើឱ្យបាត់បង់ចំណូលចូលជាតិផងដែរ។ លោកស្នើទៅក្រុមអធិការកិច្ចក្រសួងការងារ និងភាគីពាក់ព័ន្ធ ចុះត្រួតពិនិត្យយ៉ាងល្អិតល្អន់ចំពោះម្ចាស់រោងចក្រសហគ្រាសទាំងនោះ រួមទាំងធ្វើការផាកពិន័យ ដើម្បីកុំឱ្យម្ចាស់រោងចក្រគេចវេះបន្តទៀត។
លោកថា៖ «រោងចក្រខ្លះមានកម្មករ៤០០នាក់, ៥០០នាក់ ទៅ៦០០នាក់។ អ៊ីចឹងគាត់ទិញ ប.ស.ស តែ១០០ទៅ២០០នាក់ទេ ក្រៅពីហ្នឹងគាត់អត់ទិញទេ។ អ៊ីចឹងវាបាត់តួលេខខ្លះ អ៊ីចឹងវាបាត់បង់សិទ្ធិរបស់បងប្អូនកម្មករយើងច្រើន។ ការមិនទិញ ដោយសារត្រូវបង់វាអស់ច្រើន អ៊ីចឹងគាត់ត្រូវកេងបញ្ហាទាំងអស់ហ្នឹង។ ហើយគាត់សុខចិត្តបើ[ថា]កម្មករឈឺឬគ្រោះថ្នាក់អីផ្សេងៗ គាត់ចេញលុយឱ្យក្រៅប្រព័ន្ធតិចតួចទៅ។ អ៊ីចឹងបើបញ្ហាធំ ធ្វើឱ្យបងប្អូនកម្មករមានហានិភ័យខ្ពស់។ អ៊ីចឹងយើងមានតែធ្វើការដាស់តឿនដល់ក្រសួងទាំងអស់និងអធិការកិច្ចការងារ ឱ្យគាត់[ក្នុងនាម]ក្រសួងពិនិត្យបញ្ហាហ្នឹងឱ្យបានច្បាស់»។
ប្រធានសហភាពចលនាកម្មករ លោក ប៉ាវ ស៊ីណា បានលើកឡើងដែរថា រោងចក្រដែលមិនបានទិញ ប.ស.ស ជូនកម្មករភាគច្រើន ជារោងចក្រម៉ៅការបន្តពីរោងចក្រដែលនាំចេញ។ លោកបន្តថា ចំពោះរោងចក្រដែលមិនបានចុះបញ្ជីត្រឹមត្រូវនេះ បានធ្វើឱ្យកម្មករបាត់បង់អត្ថប្រយោជន៍ផ្សេងៗពីក្រុមហ៊ុន។
លោកថា៖ «ចំណុចនេះ បើយើងពិនិត្យមើលឱ្យដល់ទៅ សំខាន់មន្ត្រីអធិការកិច្ចឬមន្ត្រីពាក់ព័ន្ធទាំងអស់ ត្រូវពិនិត្យមើលប្រភេទរោងចក្រដែលទទួលម៉ៅការបន្ត ថាតើនៅក្នុងមូលដ្ឋានរបស់ខ្លួនបានអនុវត្តស្របទៅតាមច្បាប់នៅ? អ៊ីចឹងទាំងអស់នេះ ដើម្បីទប់ស្កាត់ការបាត់បង់ផលប្រយោជន៍ឬដើម្បីឱ្យកម្មករក្លាយជាកម្មករសិ្ថតនៅក្នុងប្រព័ន្ធគ្រប់គ្រង ទាល់តែមន្ត្រីនៅក្នុងក្រសួងពាក់ព័ន្ធទាំងអស់ហ្នឹងត្រូតពិនិត្យមើលប្រភេទរោងចក្រម៉ៅការបន្តហ្នឹង ឱ្យគាត់ចុះបញ្ជីត្រឹមត្រូវ មិនត្រឹមតែចុះបញ្ជីស្របច្បាប់ទេ ត្រូវចុះបញ្ជីកម្មករនៅក្នុងប្រព័ន្ធគ្រប់គ្រងទៀត ដើម្បីឱ្យកម្មករទទួលបានផលប្រយោជន៍ដូចគ្នាទៅនឹងផលប្រយោជន៍នៃច្បាប់គេឱ្យ»។
ឆ្លើយតបនឹងការអំពាវនាវនេះ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ ប្រាប់ វីអូឌី តាមប្រព័ន្ធតេឡេក្រាមនៅថ្ងៃនេះថា ក្រសួងនឹងចាត់ឱ្យមន្ត្រីចុះទៅតាមរោងចក្រទាំងនោះនៅថ្ងៃទី១៨ ខែតុលា ខាងមុខនេះ។
លោកថា៖ «ក្រសួងស្នើសុំឈ្មោះនិងអាសយដ្ឋានរបស់សហគ្រាស។ អរគុណ! ខាងមន្ត្រីនឹងចុះពិនិត្យនៅថ្ងៃចន្ទ»។
អ្នកនាំពាក្យបេឡាជាតិរបបសន្តិសុខសង្គម លោក ហេង សុផាន់ណារិទ្ធិ មានប្រសាសន៍ថា បើសិនក្រុមអធិការកិច្ចក្រសួងរកឃើញថៅកែរោងចក្រលាក់បាំងចំនួនកម្មករនោះ នោះក្រសួងនឹងធ្វើការផាកពិន័យទៅថៅកែ។
លោកថា៖ «បើសិនជាយើងដឹងថាគាត់លាក់កម្មករ យើងនឹងចុះទៅអធិការកិច្ចដល់កន្លែងរបស់គាត់។ ហើយបើសិនជាយើងរកឃើញគាត់លាក់កម្មករ យើងនឹងធ្វើការពិន័យដល់ថៅកែរបស់គាត់»។
លោក ហេង សុផាន់ណារិទ្ធិ បន្តថា បច្ចុប្បន្នមានរោងចក្រសហគ្រាសជាង១ម៉ឺននៅទូទាំងរាជធានី-ខេត្ត បានចុះបញ្ជីនៅបេឡាជាតិរបបសន្តិសុខសង្គម ដែលមានចំនួនកម្មករជិត២លាននាក់បាននិងកំពុងប្រើប្រាស់បណ្ណ ប.ស.ស នេះ៕
