មន្ត្រីជាន់ខ្ពស់ក្រសួងការបរទេសកម្ពុជា អះអាងថា អាជ្ញាធរបានជួយអន្តរាគមន៍ជួយស្ត្រីខ្មែរដែលចាញ់បោកមេខ្យល់ទៅប្រទេសចិនជាង៣០០នាក់ នារយៈពេល៩ខែឆ្នាំ២០២១នេះ ហើយចំនួននេះកើនឡើងទ្វេដង បើប្រៀបធៀបទៅនឹងរយៈពេលពេញមួយឆ្នាំកាលពីឆ្នាំ២០២០។
អ្នកនាំពាក្យក្រសួងការបរទេសកម្ពុជា លោក កុយ គួង មានប្រសាសន៍ប្រាប់ វីអូឌី តាមតេឡេក្រាមនៅថ្ងៃទី១៨ ខែតុលាថា កន្លងមក ភាគច្រើនស្ត្រីរងគ្រោះចាញ់បោកមេខ្យល់តាមរបៀបផ្សេងៗគ្នា ដូចជា មេខ្យល់ប្រាប់ថាទៅរកការងារល្អនៅប្រទេសចិន តែតាមពិតយកទៅរៀបការជាមួយប្តីជនជាតិចិន ជាដើម។
លោកបន្តថា៖ «រយៈ៩ខែ ២០២១នេះ [អាជ្ញាធរបានជួយសង្គ្រោះស្រ្តីខ្មែររងគ្រោះ] មកពីប្រទេសចិន ចំនួនជាង៣០០នាក់។ ចំនួនមកពីប្រទេសផ្សេង ខ្ញុំមិនចាំទេ។ ក្នុងឆ្នាំ២០២០ទាំងមូល មានតែ៩០នាក់ប៉ុណ្ណោះមកពីចិន។ ក្រសួងមហាផ្ទៃកម្ពុជា និងស្ថាប័នពាក់ព័ន្ធចិន តែងទាក់ទងគ្នាជាប្រចាំក្នុងកិច្ចសហការបង្ក្រាបការរត់ពន្ធមនុស្ស ជាពិសេសតាមចាប់ខ្លួនមេខ្យល់ទាំងកម្ពុជា ទាំងចិន»។
តែយ៉ាងណា លោក កុយ គួង នៅមិនទាន់ដឹងទេថា មានពលរដ្ឋខ្មែរ រាប់ទាំងអ្នករៀបការជាមួយស្វាមីជាជនជាតិចិន និងពលករខ្មែរដែលទៅធ្វើការនៅប្រទេសចិន មានវត្តមាននៅប្រទេសមួយនេះចំនួនប៉ុន្មាននាក់ប្រាកដឡើយ នាពេលបច្ចុប្បន្ន។
លោក កុយ គួង ថា៖ «មិនដឹងច្បាស់ទេ ព្រោះទៅលួចលាក់ខុសច្បាប់»។
យ៉ាងណា ក្នុងអត្ថបទស៊ើបអង្កេតរបស់សារព័ត៌មាន វីអូឌី ក្រោមចំណងជើងថា «ជំនួញកូនក្រមុំទៅចិននៅតែមាន ខណៈសមត្ថកិច្ចថាក្រុមឧក្រិដ្ឋជនមានបណ្ដាញច្រើន» ដែលចេញផ្សាយកាលពីពាក់កណ្ដាលខែមេសា ឆ្នាំ២០២១នេះ បានស្រង់ប្រសាសន៍អនុប្រធានអចិន្ត្រៃយ៍គណៈកម្មាធិការជាតិប្រយុទ្ធប្រឆាំងការជួញដូរមនុស្ស លោកស្រី ជូ ប៊ុនអេង ដោយបញ្ជាក់ថា ក្នុងឆ្នាំ២០២០កន្លងទៅ រដ្ឋាភិបាលកម្ពុជាបានជួយសង្គ្រោះពលរដ្ឋដែលបានចាញ់បោកគេយកទៅលក់ធ្វើកូនក្រមុំនៅចិន មានជាង១០០នាក់ (១១៨នាក់)។
អត្ថបទស៊ើបអង្កេតដដែលនេះក៏បានសម្ភាសជាមួយក្មេងស្រីរងគ្រោះម្នាក់មានស្រុកកំណើតនៅខេត្តបន្ទាយមានជ័យ ដែលមានអាយុទើបតែ១៤ឆ្នាំប៉ុណ្ណោះ។ នាងត្រូវបានគេយកទៅលក់នៅប្រទេសចិន ធ្វើជាប្រពន្ធបុរសជនជាតិចិនម្នាក់ កាលពីចុងឆ្នាំ២០២០ ដែលជាពេលនៃការរឹតបន្តឹងព្រំដែនកំពុងកើតមានឡើង ដោយសារតែការរីករាលដាលនៃជំងឺកូវីដ-១៩។
ប្រភពដដែលបន្តថា អ្នកបញ្ចុះបញ្ចូលនាងទៅធ្វើការនៅប្រទេសចិន គឺប្រពន្ធរបស់បងធម៌នាង។ នាងបន្តថា នៅពេលដល់ប្រទេសចិន មេខ្យល់នៅទីនោះបានបង្ខំនាងឱ្យយកប្តី ហើយបើមិនព្រមយកគេវាយតែម្តង។ ដោយមិនអាចស៊ូទ្រាំនឹងការធ្វើបាបពីប្តីបាន ស្ត្រីរងគ្រោះរូបនេះក៏បានសម្រេចចិត្តទៅស្វែងរកជំនួសពីប៉ូលិសចិននៃខេត្តហឺណាន ស្របពេលនោះ នាងកំពុងពពោះកូនអាយុ៤ខែ ហើយនៅដើមឆ្នាំ២០២១ នាងក៏បានត្រលប់មកកម្ពុជាវិញផងដែរ។
នាយករងទទួលបន្ទុកកម្មវិធីឃ្លាំមើលនៃអង្គការលីកាដូ លោក អំ សំអាត ថ្លែងនៅថ្ងៃអង្គារនេះថា ដើមចមដែលនាំឱ្យមានករណីជួញដូរមនុស្សកើតឡើង អាចបណ្ដាលមកពីមូលហេតុ៣ចំណុច ដូចជា ការមិនបានទទួលព័ត៌មានគ្រប់គ្រាន់ពីផលវិបាកនៃអំពើជួញដូរដែលងាយនឹងត្រូវមេខ្យល់បោកប្រាស់ កត្តាជីវភាពក្រីក្រ ខ្វះការអប់រំទាក់ទងការរកការងារខាងក្រៅស្រុក និងកត្តាខ្វះវិធានការក្នុងការទប់ស្កាត់-បង្ការការជួញដូរមនុស្ស។
លោក អំ សំអាត មានប្រសាសន៍ថា៖ «បើសិនជាយើងគិតតែរឿងជួយសង្គ្រោះ តែយើងមិនបានគិតរកវិធីទប់ស្កាត់ឬបង្ក្រាបការជួញដូរមនុស្ស អាហ្នឹងអ្នកដែលរងគ្រោះនឹងនៅតែបន្តមានទៀត»។
របាយការណ៍ស្ដីពីការជួញដូរមនុស្សឆ្នាំ២០២០ របស់ក្រសួងការបរទេសអាមេរិក បានចាត់ថ្នាក់កម្ពុជាឱ្យជាប់ចំណាត់ថ្នាក់លេខ២ ដោយដាក់ឱ្យស្ថិតនៅក្រោមការតាមដាន ដោយសារតែសហរដ្ឋអាមេរិកមើលឃើញថា រដ្ឋាភិបាលកម្ពុជាមិនទាន់បានគោរពបានពេញលេញតាមបទដ្ឋានអប្បបរមា ក្នុងការលុបបំបាត់ការជួញដូរមនុស្សទេ។
ក្នុងរបាយការណ៍នោះលើកឡើងថា រដ្ឋាភិបាលកម្ពុជាមិនបានបង្ហាញការបង្កើនការខិតខំក្នុងការទប់ស្កាត់ការជួញដូរមនុស្សនោះទេ បើធៀបនឹងរបាយការណ៍មុន។ លើសពីនេះ របាយការណ៍នោះលើកឡើងថា អំពើពុករលួយបានរាំងស្ទះដល់ការងាររបស់សមត្ថកិច្ច ដំណើរការកាត់ក្ដីជនល្មើស និងការផ្ដល់សេវាដល់ជនរងគ្រោះ និងការខកខានរបស់រដ្ឋាភិបាលក្នុងការបង្កើតនិងអនុវត្តប្រព័ន្ធតាមដានផ្នែកយុត្តិធម៌ឱ្យបានគ្រប់គ្រាន់ ដែលធ្វើឱ្យជនសង្ស័យជាច្រើនគេចខ្លួនមុនសវនាការ ដែលនាំឱ្យមានការកាត់ទោសកំបាំងមុខជាច្រើន៕
