អាជ្ញាធរបានឱ្យដឹងថា ជំនន់ទឹកភ្លៀងក្នុងខេត្តបាត់ដំបងចំនួន៣ថ្ងៃជាប់ៗគ្នាមកនេះ បណ្ដាលឱ្យប៉ះពាល់ស្រុក-ក្រុងចំនួន១៤ ក្នុងនោះបានប៉ះពាល់ដល់ផ្ទះសម្បែងប្រជាពលរដ្ឋជាង២ ៤០០ខ្នង ដំណាំស្រូវនិងដំណាំផ្សេងទៀតមានចំនួនជាង១ ៥០០ហិកតា រួមទាំងហេដ្ឋារចនាសម្ព័ន្ធមួយចំនួនទៀត។
អ្នកនាំពាក្យរដ្ឋបាលខេត្តបាត់ដំបង លោក សៀម ប៊ុនរិទ្ធ បានប្រាប់ វីអូឌី តាមតេឡេក្រាមនៅថ្ងៃទី១៨ ខែតុលានេះថា ចាប់ពីថ្ងៃទី១៥ ដល់ថ្ងៃ១៧ ខែតុលានេះ នៅតាមបណ្ដាស្រុកប៉ែកខាងលើ និងប៉ែកខាងក្រោមជាប់តាមដងស្ទឹងសង្កែ មានជំនន់ទឹកភ្លៀងបណ្ដាលមកពីមានភ្លៀងធ្លាក់នៅប្រភពភ្នំក្បាលឡាន ចាក់ចូលស្ទឹងបរឡាង និងស្ទឹងក្រញូង ធ្លាក់ចូលមកស្ទឹងសង្កែ បានធ្វើឱ្យស្រុក-ក្រុងសរុបចំនួន១៤ រងផលប៉ះពាល់។ លោកបន្តថា ស្រុក-ក្រុងទាំងនោះ រួមមាន ស្រុកសំឡូត ស្រុករតនមណ្ឌល ស្រុកបាណន់ ស្រុកឯកភ្នំ ស្រុកសង្កែ និងក្រុងបាត់ដំបង ជាដើម។
ចំណែកផ្ទះប្រជាជនដែលរងផលប៉ះពាល់វិញ លោកថា មានចំនួនសរុប២ ៤៦០ខ្នងផ្ទះ ដំណាំឧស្សាហកម្ម ដំណាំបន្លែឆ្លងកាត់ ដំណាំរួមផ្សំ សរុបចំនួនជាង២៣១ហិកតា។ ដោយឡែក ស្រូវស្រែចំនួន១ ៣០០ហិកតា ក្នុងនោះមានស្រូវកំពុងច្រូតកាត់ចំនួន១៣ហិកតាក៏រងផលប៉ះពាល់ដែរ។ បន្ថែមពីនេះ ជំនន់ទឹកភ្លៀងបណ្ដាលឱ្យលិចលង់ផ្លូវលំប្រវែង១៦ ១០០ម៉ែត្រ និងផ្លូវកៅស៊ូ ប្រវែង១១ ២០០ម៉ែត្រ ផងដែរ។
លោក ប៊ុនរិទ្ធ បញ្ជាក់ថា ស្ថានភាពកម្ពស់ទឹកស្ទឹងសង្កែនៅចំណុចស្ពាន សម្ដេចតេជោ ហ៊ុន សែន ក្នុងក្រុងបាត់ដំបង បានហក់ឡើងខ្ពស់បំផុត១៤ម៉ែត្រ ខណៈកម្រិតប្រកាសអាសន្ននៅកម្ពស់១៤ម៉ែត្រកន្លះ (១៤,៥០) ប៉ុន្តែទឹកបានស្រកទៅវិញ នៅត្រឹមកម្រិតកម្ពស់ជាង១២ម៉ែត្រ (១២,១០) គិតត្រឹមម៉ោង៦កន្លះល្ងាច ថ្ងៃទី១៧ ខែតុលានេះ។ យ៉ាងណា លោកថា ជំនន់ទឹកភ្លៀងពេលនេះមិនបណ្ដាលឱ្យប៉ះពាល់ធ្ងន់ធ្ងរដល់ពលរដ្ឋ ជាពិសេសអ្នករស់នៅតាមដងស្ទឹងនោះឡើយ៕
