មេធាវីការពារក្ដីឱ្យលោក កឹម សុខា ប្រធានអតីតគណបក្សសង្រ្គោះជាតិ បានជំរុញជាថ្មីទៀតឱ្យតុលាការពិចារណាក្នុងការចេញដីកាបញ្ឈប់ជាអចិន្រ្តៃយ៍នូវដំណើរការនីតិវិធីនៃការឃុំខ្លួនប្រឆាំងនឹងកូនក្ដីរបស់ខ្លួន និងផ្ដល់នីតិសម្បទាសម្រាប់អតីតមេបក្សប្រឆាំងរូបនេះឱ្យបានពេញលេញឡើងវិញ។
អ្នកស្រី ម៉េង សុភារី សហមេធាវីម្នាក់ដែលការពារក្ដីឱ្យលោក កឹម សុខា បានប្រាប់ វីអូឌី កាលពីថ្ងៃសៅរ៍ថា ជារឿងអយុត្តិធម៌មួយដែលតុលាការបន្តផ្អឹបសំណុំរឿងកូនក្ដីរបស់ខ្លួនទុកអស់រយៈពេលជាច្រើនខែ ក្រោមហេតុផលវិបត្តិជំងឺកូវីដ-១៩។ បើក្នុងករណីបញ្ហាកូវីដ-១៩ ជាមូលហេតុចម្បងដែលនាំឱ្យប៉ះពាល់ដល់ដំណើរការនីតិវិធីជំនុំជម្រះក្ដីនោះ អ្នកស្រីយល់ថា តុលាការគួរចេញដីកាបញ្ចប់នៃការឃុំខ្លួនជាស្ថាពរប្រឆាំងលោក កឹម សុខា តែម្ដងទៅ។
អ្នកស្រីបន្តថា៖ «បើសិនជាតុលាការមិនអាចបន្តសវនាការបានទេ ក្រុមប្រឹក្សាជំនុំជម្រះក៏គួរតែចេញដីកាបញ្ឈប់ជាអចិន្រ្តៃយ៍នូវដំណើរនីតិវិធីប្រឆាំងឯកឧត្ដម កឹម សុខា ហើយនិងផ្ដល់នីតិសម្បទាឱ្យគាត់មាននីតិសម្បទាពេញលេញឡើងវិញ»។
បើតាមអ្នកស្រី ម៉េង សុភារី នេះជាសំណុំរឿងដែលប្លែកខុសគេ ខណៈដំណើរការជំនុំជម្រះលើអង្គសេចក្ដីកំពុងតែបន្តនីតិវិធី ស្រាប់តែត្រូវពន្យារពេលដ៏យូរពុំធ្លាប់មាន ព្រោះតែសម្អាងហេតុវិបត្តិជំងឺកូវីដ-១៩ ខណៈសំណុំរឿងផ្សេងៗទៀតនៅបន្តជាប្រក្រតី។
លោក កឹម សុខា បានរងការចោទប្រកាន់ពីបទ «ឃុបឃិតជាមួយបរទេសចង់ផ្ដួលរំលំរដ្ឋាភិបាល»។ សំណុំរឿងក្ដីរបស់លោកត្រូវបានតុលាការក្រុងភ្នំពេញលើកមកជំនុំជម្រះកាលពីអំឡុងខែមករា ឆ្នាំ២០២០ ហើយសវនាការនេះក៏បានបន្តនីតិវិធីរហូតដល់ចុងខែមីនា ទើបសម្រេចផ្អាក ដោយសារមានបម្រាមនៃការជួបជុំមនុស្សច្រើនក្នុងអំឡុងវិបត្តិជំងឺកូវីដ-១៩ មកដល់បច្ចុប្បន្ន។
យ៉ាងនេះក្ដី កាលពីថ្ងៃទី១៤ ខែតុលា ថ្មីៗនេះ រដ្ឋបាលរាជធានីភ្នំពេញបានចេញគោលការណ៍ថ្មីមួយ ដោយបានបើកផ្លូវឱ្យមានការប្រមូលផ្តុំមនុស្សជាលក្ខណៈឯកជនក្រោម៥០នាក់បាន។ ប្រការ៣ នៃសេចក្ដីសម្រេចនេះ គឺអនុញ្ញាតបានតែសកម្មភាពចម្បងៗមួយចំនួនប៉ុណ្ណោះ ក្នុងនោះរួមទាំងដំណើរការនីតិវិធីសម្រាប់នៅក្នុងតុលាការផងដែរ។
យោងមាត្រា២០៨ នៃក្រមនីតិវិធីព្រហ្មទណ្ឌ ចែងថា ពេលវេលានៃការឃុំខ្លួនបណ្ដោះអាសន្នចំពោះបទឧក្រិដ្ឋទៅលើនីតិជនដែលរងការចោទប្រកាន់ពីបទឧក្រិដ្ឋ ការឃុំខ្លួនបណ្ដោះអាសន្នមិនអាចឱ្យលើសពី៦ខែបានទេ។ ប៉ុន្តែបើផុតថេរវេលានេះ ចៅក្រមស៊ើបសួរ អាចបន្តពន្យារពេលនៃការឃុំខ្លួនបណ្ដោះអាសន្នម្ដងបាន៦ខែទៀតបាន ដោយមានការសម្អាងហេតុត្រឹមត្រូវនិងច្បាស់លាស់។
វីអូឌី មិនអាចស្នើសុំការបញ្ជាក់ជុំវិញករណីនេះពីអ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ បានទេ នៅថ្ងៃចន្ទនេះ។
ទាក់ទិនករណីនេះ នាយករងអង្គការការពារសិទ្ធិមនុស្សលីកាដូ លោក អំ សំអាត យល់ឃើញថា ការសម្រេចចិត្តទម្លាក់ឬតម្កល់សំណុំរឿងក្ដីនេះ ជាឆន្ទានុសិទ្ធិរបស់តុលាការ។ ប៉ុន្តែលោកបញ្ជាក់ថា ដើម្បីឱ្យមានភាពស្មើគ្នាចំពោះមុខច្បាប់ និងគោរពគោលការណ៍សិទ្ធិមនុស្ស គឺអ្នកទទួលខុសត្រូវក្នុងរឿងក្ដីមួយនេះត្រូវថ្លឹងថ្លែងឱ្យម៉ត់ចត់ ដើម្បីចៀសវាងពីការរិះគន់និងអនុវត្តផ្ទុយពីបទដ្ឋានគតិយុត្ត។
លោកបន្តថា៖ «បើយើងនិយាយអំពីបទដ្ឋានសិទ្ធិមនុស្ស អំពីយុត្តិធម៌ និងភាពស្មើគ្នាចំពោះមុខច្បាប់ អាហ្នឹងត្រូវយកមកពិចារណាទាំងអស់ ទាំងផ្លូវច្បាប់ ទាំងបញ្ហាសិទ្ធិ និងបញ្ហាអីធ្វើម៉េច ដើម្បីឱ្យមានតម្លាភាពនិងយុត្តិធម៌»។
លោក កឹម សុខា ត្រូវបានសមត្ថកិច្ចរាជធានីភ្នំពេញចុះចាប់ខ្លួនទាំងពាក់កណ្ដាលអធ្រាត្រ កាលពីថ្ងៃទី៣ ខែកញ្ញា ឆ្នាំ២០១៧ នៅគេហដ្ឋានរបស់លោក ក្នុងខណ្ឌទួលគោក។ ២ខែក្រោយនៃការចាប់ខ្លួននេះ តុលាការកំពូលបានរំលាយអតីតបក្សប្រឆាំងនេះចេញពីឆាកនយោបាយ នៅចុងឆ្នាំ២០១៧៕