មេដឹកនាំរបបយោធាដែលបានគ្រប់គ្រងប្រទេសមីយ៉ាន់ម៉ាចាប់តាំងពីការធ្វើរដ្ឋប្រហាររបស់ខ្លួន នឹងមិនត្រូវបានអញ្ជើញឱ្យចូលរួមក្នុងកិច្ចប្រជុំកំពូលអាស៊ាននោះទេ ដែលករណីនេះត្រូវបានចាត់ទុកថាជារឿងដ៏កម្រមួយសម្រាប់មេដឹកនាំមកពីប្រទេសអាស៊ីអាគ្នេយ៍មួយនេះ។
ការសម្រេចនេះត្រូវបានធ្វើឡើងដោយសមាគមប្រជាជាតិអាស៊ីអាគ្នេយ៍ (អាស៊ាន) នៅក្នុងកិច្ចប្រជុំបន្ទាន់មួយដែលធ្វើឡើងកាលពីថ្ងៃសុក្រកន្លងទៅ ខណៈដែលវាត្រូវបានចាត់ទុកថាជារឿងដែលមិនធ្លាប់កើតឡើងកាលពីពេលកន្លងទៅ។
ទោះជាយ៉ាងណា អាស៊ានបានឱ្យដឹងថា ខ្លួននឹងអញ្ជើញតំណាងមីយ៉ាន់ម៉ាដែលមិនពាក់ព័ន្ធនយោបាយមួយរូប ដើម្បីចូលរួមក្នុងកិច្ចប្រជុំជំនួសវិញ។
ទាក់ទិននឹងករណីនេះ ក្រសួងការបរទេសសិង្ហបុរី ក៏បានឱ្យដឹងកាលពីថ្ងៃសៅរ៍ថា ការដែលផ្លាស់ប្តូរវត្តមានចូលរួមរបស់មេដឹកនាំរបបយោធាមីយ៉ាន់ម៉ានេះ គឺជាការសម្រេចចិត្តដ៏លំបាកមួយ ប៉ុន្តែចាំបាច់ដើម្បីរក្សាឱ្យបាននូវភាពជឿទុកចិត្តរបស់អាស៊ាន។
ជាមួយគ្នានេះ សេចក្ដីថ្លែងការណ៍របស់អាស៊ានក៏បានបន្តលើកឡើងពីកង្វះវឌ្ឍនភាពនៅក្នុងផែនទីបង្ហាញផ្លូវ ដើម្បីស្ដារសន្តិភាពនៅមីយ៉ាន់ម៉ា ដែលរបបយោធាបានយល់ព្រមជាមួយតំបន់កាលពីខែមេសាផងដែរ។
គួរបញ្ជាក់ថា អាស៊ានក៏បានប្រឈមនឹងសម្ពាធអន្តរជាតិកាន់តែខ្លាំងឡើង ក្នុងការប្រកាន់ជំហរតឹងរ៉ឹងជាងមុនប្រឆាំងនឹងមីយ៉ាន់ម៉ា ខណៈដែលខ្លួនត្រូវបានរងការរិះគន់កាលពីពេលកន្លទៅ ដែលថាគ្មានប្រសិទ្ធភាពក្នុងការដោះស្រាយជាមួយមេដឹកនាំដែលត្រូវបានចោទប្រកាន់ពីការរំលោភសិទ្ធិ ធ្វើឱ្យប្រជាធិបតេយ្យធ្លាក់ចុះ និងបំភិតបំភ័យគូប្រជែងនយោបាយ។
បើតាមអង្គការសហប្រជាជាតិ ជនស៊ីវិលជាង១ ០០០នាក់ត្រូវបានសម្លាប់ដោយកងកម្លាំងសន្តិសុខមីយ៉ាន់ម៉ា និងមនុស្សរាប់ពាន់នាក់ផ្សេងទៀតត្រូវបានចាប់ខ្លួនទាក់ទងទៅនឹងការបង្ក្រាបលើកូដកម្ម និងការតវ៉ានានានៅក្នុងប្រទេស ខណៈដែលតួលេខនេះត្រូវបានចាត់ទុកដោយរបបយោធាថាជាការបំផ្លើសការពិត៕