ក្រសួងកសិកម្ម ឱ្យដឹងថា តម្លៃជ្រូករស់បន្តធ្លាក់ថ្លៃនាពេលបច្ចុប្បន្ន ដោយសារតម្រូវការសាច់ជ្រូក ក្នុងអំឡុងវិបត្តិកូវីដ-១៩មានការប្រែប្រួល ម៉្យាងរដ្ឋាភិបាលបានសម្រេចផ្អាករៀបចំកម្មវិធីបុណ្យភ្ជុំបិណ្ឌ ដែលធ្វើឱ្យសត្វជ្រូកមានការកកស្ទះលក់មិនចេញនៅលើទីផ្សារ។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បានបង្ហោះសារជូនដំណឹងលើហ្វេសប៊ុករបស់ខ្លួន កាលពីថ្ងៃម្សិលមិញ ថាវិបត្តិកូវីដ-១៩បានធ្វើឱ្យតម្រូវការសាច់ជ្រូកមានការប្រែប្រួលមិនទៀងទាត់ ដោយសារមានការបិទខ្ទប់ ហើយកម្មវិធីបុណ្យទាន មង្គលការ ឬពិធីជប់លៀងផ្សេងៗ មិនអនុញ្ញាតឱ្យបើកដំណើរការ ដែលធ្វើឱ្យជ្រូករស់មានការកកស្ទះលក់បានតម្លៃទាបរហូតដល់ពេលបច្ចុប្បន្ន។
លោក វេង សាខុន បញ្ជាក់ថា៖ «វិបត្តិជំងឺកូវីដ-១៩ តម្រូវការសាច់ជ្រូកមានការប្រែប្រួលមិនទៀងទាត់ ដោយសារមានការបិទខ្ទប់ ពុំមានកម្មវិធីតាមបុណ្យទាន កម្មវិធីជួបជុំផ្សេងៗ ជាពិសេសពុំមានភ្ញៀវទេសចរធ្វើដំណើកម្សាន្តតាមតំបន់រមណីយដ្ឋាននានាក្នុងព្រះរាជាណាចក្រកម្ពុជា»។
រដ្ឋមន្ត្រីដដែលបញ្ជាក់ថា តម្លៃសាច់ជ្រូករស់នាពេលបច្ចុប្បន្នមានតម្លៃចន្លោះពីចំនួន៩ ៥០០រៀល ទៅចំនួន១០ ១០០រៀលក្នុងមួយគីឡូក្រាម ខណៈប្រទេសវៀតណាមលក់បានតម្លៃត្រឹមតែ៦ ៥០០រៀលក្នុងមួយគីឡូក្រាមប៉ុណ្ណោះ។
លោក វេង សាខុន បន្ថែមទៀតថា ស្ថិតិកសិដ្ឋានចិញ្ចឹមជ្រូកមានការកើនចំនួន៣៦កន្លែង ឬស្មើនឹងជាង៧ភាគរយ (៧,២%) ពោលគឺកើនពីចំនួន៥០៣កន្លែង នៅឆ្នាំ២០២០ ឡើងដល់ចំនួន៥៣៩កន្លែង ក្នុងឆមាសទី១ ឆ្នាំ២០២១។ បច្ចុប្បន្ននេះ ការនាំចូលជ្រូករស់ពីបរទេស នៅថ្ងៃខ្លះ មានត្រឹម៣០០ក្បាលក្នុងមួយថ្ងៃប៉ុណ្ណោះ។
ប្រធានសមាគមចិញ្ចឹមសត្វកម្ពុជា លោក ស្រ៊ុន ពៅ មានប្រសាសន៍ថា ដើមចមដែលជ្រូករស់ធ្លាក់ចុះតម្លៃ ដោយសាររដ្ឋាភិបាលសម្រេចផ្អាករៀបចំកម្មវិធីបុណ្យភ្ជុំបិណ្ឌ ចាប់ពីបិណ្ឌទី៤ ម៉្យាងជ្រូករស់នាំចូលពីវៀតណាមមកកម្ពុជា ធ្លាក់ថ្លៃត្រឹម៦ ៥០០រៀលក្នុងមួយគីឡូក្រាម។
លោក ស្រ៊ុន ពៅ សង្កេតឃើញដែរថា ទោះបីជាជ្រូករស់ធ្លាក់ចុះតម្លៃយ៉ាងនេះក្ដី ប៉ុន្តែបញ្ហាតម្លៃលក់សាច់ជ្រូកនៅលើទីផ្សារនៅតែថ្លៃ ចម្លោះពី២០ ០០០រៀល ដល់២៥ ០០០រៀលក្នុងមួយគីឡូក្រាមដដែល។
ករណីនេះ លោកស្នើទៅអាជ្ញាធរពាក់ព័ន្ធ ត្រូវចុះស្រាវជ្រាវដល់កន្លែងសត្តឃាត និងអាជីវករទាំងអស់ មិនត្រូវឱ្យពួកគេលក់សាច់ជ្រូកថ្លៃហួសហេតុនាអំឡុងពេលជួបវិបត្តិកូវីដ-១៩នេះ ដែលនាំឱ្យប៉ះពាល់ដល់ប្រជាពលរដ្ឋ ជាពិសេសអ្នកក្រីក្រ។
លោកថា៖ «ខ្ញុំអំពាវនាវថា បងប្អូនអាជីវករ ក៏ដូចជាសត្តឃាតដ្ឋានទាំងអស់នៅក្នុងព្រះរាជាណាចក្រកម្ពុជា ដែលទិញជ្រូកបានថោកហើយ គឺត្រូវតែលក់ថោកទៅតាមជ្រូកដែលទិញពីកសិករមក។ បើសិនណាគាត់ទិញថោកហើយ គាត់នៅតែលក់ថ្លៃ សុំឱ្យក្រសួងមានសមត្ថកិច្ចពាក់ព័ន្ធនឹងទីផ្សារនេះ គឺសុំឱ្យលោកធ្វើការទប់ស្កាត់ ធ្វើការស្រាវជ្រាវ រកមូលហេតុ ដូចថាជ្រូក១គីឡូ តែ១០ ០០០រៀល កុងស៊ីអ្នកឯងម៉េចលក់២០ ០០០រៀល ឬទីផ្សារលក់២៥ ០០០រៀល។ អាហ្នឹងហើយខុសក្រឹត្យក្រមតម្លៃនៃទីផ្សារ ងាប់តែកសិករ វារស់តែកុងស៊ីនិងអាជីវករអ្នកលក់»។
ជនពិការជើងទាំងគូ និងអតីតទាហានម្នាក់ នៅភូមិស្រែតាជ័យ ឃុំអភិវឌ្ឍ ស្រុកទឹកផុស ខេត្តកំពង់ឆ្នាំង លោក ឈឺន ខន អះអាងថា បច្ចុប្បន្ននេះ គាត់ចញ្ចឹមជ្រូក២០ក្បាល ដើម្បីទ្រទ្រង់សេដ្ឋកិច្ចគ្រួសារ។ ប៉ុន្តែលោកថា នៅភូមិរបស់គាត់នាពេលបច្ចុប្បន្ន តម្លៃជ្រូករស់មួយគីឡូលក់បានតម្លៃត្រឹមតែ៨ ០០០រៀលតែប៉ុណ្ណោះ។
ករណីនេះ លោកថា បើតម្លៃសាច់ជ្រូកបន្តធ្លាក់ក្រោមមួយម៉ឺនរៀល នោះរូបគាត់និងអ្នកភូមិផ្សេងទៀតនឹងនាំគ្នាឈប់ចិញ្ចឹមជ្រូក ព្រោះតម្លៃកូនជ្រូកទិញមកចិញ្ចឹម១ក្បាលមានតម្លៃជិត៤០ម៉ឺនរៀល។
លោក ឈឺន ខន ក៏បានស្នើទៅក្រសួងពាក់ព័ន្ធ ជាពិសេសក្រសួងកសិកម្ម ជួយរក្សាតម្លៃជ្រូករស់ឱ្យបានយ៉ាងតិច១០ ០០០ក្នុងមួយគីឡូក្រាម ដើម្បីឱ្យកសិករអាចបន្តមុខរបរនេះទៅមុខទៀត។
លោកថា៖ «ខ្ញុំយល់ថា បើធ្លាក់ចុះខ្លាំងណាស់ ឱ្យនៅសល់១គីឡូ [តម្លៃ]១០ ០០០រៀល គឺអាចនឹងទប់ទល់បាន។ ហើយខាងក្រសួងហ្នឹង ក៏លោកជួយកាត់បន្ថយផ្នែកដូចជាចំណីកន្ទក់បន្តិចទៅ យើងជួយម្នាក់បន្តិចទៅ គឺអាចនឹងរួច! តែបើក្រោមពីហ្នឹងឆ្ងាយ មិនអាចទៅរួច»។
រដ្ឋមន្ត្រីក្រសួងកសិកម្ម លោក វេង សាខុន ឱ្យដឹងទៀតថា ការនាំចូលកូនជ្រូកពូជក្នុងឆ្នាំ២០១៩ មានត្រឹមចំនួន២២ ០០០ក្បាល ហើយនៅឆ្នាំ២០២០ មានការកើនឡើងដល់ចំនួន២៧៥ ៩២៥ក្បាល។ ចំណែកឯជ្រូកពូជមេ-បា នាំចូលមានចំនួន៧ ៨៤០ក្បាល ក្នុងឆ្នាំ២០១៩ និងកើនដល់ចំនួន២៨ ១៤៣ក្បាល ក្នុងឆ្នាំ២០២០។ គិតត្រឹមថ្ងៃទី១៨ ខែតុលា ឆ្នាំ២០២១ ការនាំចូលជ្រូកពូជមេ-បា មានចំនួន២៤ ៨៦៥ក្បាល និងកូនជ្រូកពូជមានចំនួន១២៦ ១១៦ក្បាល។
យ៉ាងនេះក្ដី កាលពីថ្ងៃទី១៦ ខែកក្កដា ឆ្នាំ២០២០ ក្រសួងកសិកម្មបានចេញលិខិតមួយបញ្ជាក់ពីការកាត់បន្ថយការនាំជ្រូកចូលពីបរទេស ពីចំនួន២០ ៤០០ក្បាលក្នុងមួយថ្ងៃ នៅខែមករា ឆ្នាំ២០២០ មកនៅត្រឹម៦ ៧០០ក្បាលក្នុងមួយថ្ងៃ ត្រឹមថ្ងៃទី២៤ ខែកុម្ភៈ ឆ្នាំ២០២០។ ក្រសួងបញ្ជាក់ពេលនោះថា ការអនុញ្ញាតឱ្យនាំចូលតែជាង៦ ០០០ក្បាលនោះ ក្នុងន័យបង្កើនផលិតកម្មសត្វជ្រូកក្នុងស្រុក និងរកទីផ្សារជូនកសិករ ក្រុមហ៊ុនចិញ្ចឹមជ្រូក និងសមាគមអ្នកចិញ្ចឹមសត្វកម្ពុជា ដើម្បីបំពេញនូវកង្វះខាតប្រមាណ ១៨% ទៀតប៉ុណ្ណោះ៕
