រដ្ឋាភិបាលបានសម្រេចបន្តឧបត្ថម្ភសាច់ប្រាក់ដល់គ្រួសារក្រីក្រនិងងាយរងគ្រោះដោយសារវិបត្តិជំងឺកូវីដ-១៩ រយៈពេល៣ខែបន្តទៀត ចាប់ពីខែតុលានេះតទៅ។
យោងតាមសេចក្ដីសម្រេចរបស់ក្រសួងសេដ្ឋកិច្ច និងហិរញ្ញវត្ថុ ស្តីពី «អនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងជំងឺកូវីដ-១៩ សម្រាប់ជុំទី៧» នៅថ្ងៃនេះ បានឱ្យដឹងថា កម្មវិធីឧបត្ថម្ភសាច់ប្រាក់ដល់គ្រួសារក្រីក្រនិងងាយរងគ្រោះនេះ គឺអនុវត្តចាប់ពីខែតុលា ខែវិច្ឆិកា និងខែធ្នូ ឆ្នាំ២០២១។ ការបើកផ្ដល់ប្រាក់ឧបត្ថម្ភ គឺត្រូវធ្វើឡើងនៅក្នុងសប្ដាហ៍ទី៤នៃខែនីមួយៗ។
គិតត្រឹមថ្ងៃទី២៤ ខែកញ្ញា ឆ្នាំ២០២១ រដ្ឋាភិបាលបានចំណាយថវិកាចំនួនជាង១ ៧៦៣ ពាន់លានរៀល (១ ៧៦៣ ២៤៧ ០៤៦ ០០០រៀល) ដើម្បីផ្ដល់ជូនដល់គ្រួសារក្រីក្រនិងងាយរងគ្រោះ ក្នុងអំឡុងពេលប្រយុទ្ធនឹងជំងឺកូវីដ-១៩ ចំនួនជាង៦៧ម៉ឺនគ្រួសារ (៦៧៣ ៤៨៧គ្រួសារ) ឬស្មើនឹងប្រជាជនក្រីក្រចំនួនជាង២លាននាក់ (២ ៦៦០ ៧២៦នាក់) នៅក្នុងរយៈពេល១៥ខែកន្លងទៅនេះ៕