រដ្ឋបាលខេត្តកំពង់ស្ពឺ បានប្រកាសបិទបញ្ចប់ការអនុវត្តវិធានការរដ្ឋបាល ដើម្បីប្រយុទ្ធនិងទប់ស្កាត់ការឆ្លងរាលដាលនៃជំងឺកូវីដ-១៩ នៅក្នុងភូមិសាស្ត្រខេត្តនេះ ចាប់ពីថ្ងៃទី២០ ខែតុលា ម្សិលមិញនេះ។
យោងតាមសេចក្ដីសម្រេចរបស់អភិបាលខេត្តកំពង់ស្ពឺ លោក វ៉ី សំណាង បានឱ្យដឹងថា រាល់សកម្មភាព មុខរបរ និងអាជីវកម្ម រមណីយដ្ឋាន សួនកម្សាន្ត សារមន្ទីរ ក្លឹបហាត់ប្រាណ អាចបើកដំណើរការឡើងវិញបាន ប៉ុន្តែត្រូវអនុវត្តវិធានការសុខាភិបាលចាំបាច់នានា និងវិធានការ «៣កុំ ៣ការពារ» ពាក់ម៉ាស់ និងរក្សាគម្លាតឱ្យបានត្រឹមត្រូវ។
បើតាមលោក វ៉ី សំណាង គិតត្រឹមថ្ងៃទី២០ ខែតុលា ខេត្តកំពង់ស្ពឺមានអ្នកឆ្លងជំងឺកូវីដ-១៩ សរុប៥ ០៣៣នាក់ ក្នុងនោះបានព្យាបាលជាសះស្បើយចំនួន៤ ៧៨៤នាក់ ស្លាប់១២៥នាក់ និងកំពុងសម្រាកព្យាបាលជំងឺចំនួន២១៣នាក់៕
