មេដឹកនាំរបបយោធាមីយ៉ាន់ម៉ា បានសម្រេចដោះលែងអ្នកទោសនយោបាយរាប់រយនាក់ក្នុងរយៈពេលប៉ុន្មានថ្ងៃចុងក្រោយនេះ ដែលរួមមានទាំងអ្នកនាំពាក្យគណបក្សរបស់លោកស្រី អ៊ុងសាន ស៊ូជី និងតារាកំប្លែងដ៏ល្បីមួយរូបផងដែរ។
ទូរទស្សន៍រដ្ឋបានប្រកាសកាលពីល្ងាចថ្ងៃចន្ទថា មនុស្សជាង៥ ៦០០នាក់ដែលត្រូវចាប់ខ្លួនឬកំពុងតាមចាប់ខ្លួន ជុំវិញការតវ៉ាប្រឆាំងរដ្ឋប្រហារ នឹងត្រូវបានលើកលែងទោសបន្ទាប់ពីសុន្ទរកថាមួយរបស់ប្រមុខរបបយោធាមីយ៉ាន់ម៉ាដែលលើកឡើងថា រដ្ឋាភិបាលរបស់លោកប្តេជ្ញាចិត្តដើម្បីសន្តិភាពនិងលទ្ធិប្រជាធិបតេយ្យ។
ទោះជាយ៉ាងណា សកម្មជនមួយចំនួនបានចាត់ទុកការដោះលែងនេះថាជាល្បិចកលរបស់របបយោធាដែលកំពុងព្យាយាមកសាងកេរ្តិ៍ឈ្មោះជាអន្តរជាតិរបស់ខ្លួនឡើងវិញ បន្ទាប់ពីសមាគមប្រជាជាតិអាស៊ីអាគ្នេយ៍ (អាស៊ាន) កាលពីពេលថ្មីៗនេះ បានសម្រេចដកវត្តមានមេដឹកនាំយោធាមីយ៉ាន់ម៉ា មិនឱ្យចូលរួមក្នុងកិច្ចប្រជុំកំពូលអាស៊ាន។
គួរបញ្ជាក់ថា ប្រទេសមីយ៉ាន់ម៉ាបានធ្លាក់ចូលក្នុងភាពច្របូកច្របល់ គិតចាប់តាំងពីក្រុមយោធាបានដណ្ដើមយកអំណាចមកគ្រប់គ្រង កាលពីថ្ងៃទី១ ខែកុម្ភៈ និងបានផ្ដួលរំលំរដ្ឋាភិបាលជាប់ឆ្នោតរបស់លោកស្រី អ៊ុងសាន ស៊ូជី ដែលបង្កឱ្យមានជាបាតុកម្មកើតឡើងជាញឹកញាប់នៅក្នុងប្រទេស។
យោងតាមអង្គការសហប្រជាជាតិ បានឱ្យដឹងថា ជនស៊ីវិលជាង១ ០០០នាក់ត្រូវបានសម្លាប់ដោយកងកម្លាំងសន្តិសុខមីយ៉ាន់ម៉ា និងមនុស្សរាប់ពាន់នាក់ផ្សេងទៀតត្រូវបានចាប់ខ្លួនទាក់ទងទៅនឹងការបង្ក្រាបលើកូដកម្មនិងការតវ៉ានានានៅក្នុងប្រទេស ខណៈដែលតួលេខនេះត្រូវបានចាត់ទុកដោយរបបយោធាថាជាការបំផ្លើសការពិត៕
