មន្ត្រីក្រសួងពាណិជ្ជកម្មបានលើកឡើងថា តម្លៃប្រេងឥន្ធនៈនៅកម្ពុជាបានហក់ឡើងខ្ពស់ក្នុងរយៈពេលប៉ុន្មានថ្ងៃកន្លងមកនេះ ដោយសារតែការប្រែប្រួលតម្លៃប្រេងនៅលើទីផ្សារអន្តរជាតិ។
ការលើកឡើងរបស់មន្ត្រីរដ្ឋាភិបាលបានធ្វើឡើងក្រោយពីប្រជាពលរដ្ឋបានត្អូញត្អែរពីតម្លៃប្រេងឡើងថ្លៃ ដែលធ្វើឱ្យពួកគាត់ជួបការលំបាកក្នុងជីវភាព ជាពិសេសក្នុងអំឡុងវិបត្តិជំងឺកូវីដ-១៩។
អ្នកនាំពាក្យក្រសួងពាណិជ្ជកម្ម លោក ស៊ាង ថៃ មានប្រសាសន៍កាលពីថ្ងៃទី២០ ខែតុលា ថាតម្លៃប្រេងឥន្ធនៈនៅកម្ពុជាហក់ឡើង ដោយសារតែថ្លៃប្រេងនៅលើទីផ្សារអន្តរជាតិមានការប្រែប្រួល ខណៈប្រេងឥន្ធនៈដែលប្រើប្រាស់នៅកម្ពុជាបច្ចុប្បន្នបាននាំចូលពីបរទេស។
លោកបន្តថា៖ «ដូចនៅលើសេចក្ដីជូនដំណឹងដែលក្រសួងពាណិជ្ជកម្មបានចេញជារៀងរាល់១៥ថ្ងៃម្ដង ការគណនាថ្លៃលក់រាយប្រេងនៅកម្ពុជា គឺយកថ្លៃប្រេងនៅទីផ្សារសិង្ហបុរី បូកប្រាក់ពន្ធដែលត្រូវបង់ជូនរដ្ឋ បូកចំណាយប្រតិបត្តិការរបស់ក្រុមហ៊ុន និងប្រាក់ចំណេញសមរម្យ បន្ទាប់មកគុណនឹងអត្រាប្ដូរប្រាក់ដែលចេញដោយធនាគារជាតិនៃកម្ពុជា នឹងបានថ្លៃលក់រាយក្នុងមួយលីត្រ»។
អ្នកនាំពាក្យរូបនេះអះអាងថា ក្នុងសេចក្ដីជូនដំណឹង ថ្លៃដែលប្រែប្រួលក្នុងរយៈពេល១៥ថ្ងៃម្ដង គឺមានតែថ្លៃប្រេងនៅលើទីផ្សារអន្តរជាតិតែប៉ុណ្ណោះ ក្រៅពីនោះគឺនៅដដែល។
ស្រដៀងគ្នានេះដែរ នាយកមជ្ឈមណ្ឌលនវានុវត្តន៍ និងប្រជាធិបតេយ្យ នៃវិទ្យាស្ថានចក្ខុវិស័យអាស៊ី លោកបណ្ឌិត ឆេង គឹមឡុង មានប្រសាសន៍នៅថ្ងៃពុធម្សិលមិញថា ការពិត ប្រទេសកម្ពុជាជាប្រទេសនាំចូលស្ទើរតែទាំងស្រុងនូវប្រេងឥន្ធនៈគ្រប់ប្រភេទពីខាងក្រៅ។
លោកបន្តថា តម្លៃប្រេងសាំងនៅកម្ពុជាពឹងអាស្រ័យទៅលើប្រេងសាំងនៅទីផ្សារអន្តរជាតិ ហើយកត្តាដែលធ្វើឱ្យតម្លៃប្រេងហក់ឡើងខ្ពស់ អាចបណ្ដាលមកពីមានតម្រូវការកើនឡើងប្រេងឥន្ធនៈជាសកល និងប្រហែលដោយសារបញ្ហាប្រឈមមួយចំនួននៃក្រុមបណ្ដាប្រទេសដែលផលិតប្រេងសាំង ដែលធ្វើឱ្យប៉ះពាល់ទៅដល់ការផលិត និងការដឹកជញ្ជូនចែកចាយ ព្រមទាំងការផ្គត់ផ្គង់មិនបានពេញលេញ។
លោកបណ្ឌិតបន្ត៖ «ខ្ញុំមិនអាចព្យាករបានទាំងស្រុងពីតម្លៃនៃការកើនឡើងប្រេងសាំងទេ។ បើយើងមើលទៅទិន្នន័យនៃប្រវត្តិសាស្រ្ត កន្លងមក ឃើញថា ថ្លៃប្រេងសាំងឡើងថ្លៃមិនជារៀងរហូតទេ ដល់ពេលដំណាក់កាលមួយក្នុងរយៈពេលណាសមស្រប ថ្ងៃខាងមុខនេះអាចនឹងចុះថ្លៃវិញ។ ជាសកល គេមិនអាចទុកឱ្យប្រេងសាំងឡើងថ្លៃ ហើយប៉ះពាល់ដល់ខ្សែសង្វាក់ផលិតកម្មបានទេ ជាពិសេសប៉ះពាល់ទៅដល់សុខុមាលភាពសង្គមសេដ្ឋកិច្ចបានទេ»។
បណ្ឌិតរូបនេះនិយាយទៀតថា បច្ចុប្បន្នជាពេលវេលាដែលពលរដ្ឋទទួលរងផលប៉ះពាល់ទាំងអស់គ្នា ប៉ះពាល់ដោយជំងឺកូវីដ-១៩ផង និងតម្លៃទំនិញឡើងថ្លៃជាសកលផង ព្រមទាំងប៉ះពាល់ដោយសារតម្លៃប្រេងសាំងហក់ឡើងខ្ពស់ថែមទៀតផង។
យ៉ាងណា លោកសង្ឃឹមថា ពេលខាងមុខ ទាំងរដ្ឋាភិបាលកម្ពុជា រដ្ឋាភិបាលប្រទេសក្នុងតំបន់ និងសកលលោក នឹងអាចដោះស្រាយបញ្ហានេះបាន ដើម្បីធ្វើយ៉ាងណារក្សាតម្លៃប្រេងឥន្ធនៈឱ្យមានស្ថិរភាពឡើងវិញ។
មានមុខរបរជាអ្នកបោះដុំបន្លែនៅផ្សារដើមគរ លោក សុខ ភក្ដី មានវ័យ៣៨ឆ្នាំ បង្ហាញការព្រួយបារម្ភជាខ្លាំងចំពោះការឡើងថ្លៃប្រេងសាំងក្នុងរយៈពេលប៉ុន្មានសប្ដាហ៍មកនេះ។ លោកថា សម្រាប់លោកមានបញ្ហាខ្លាំងចំពោះការចំណាយទៅលើការចាក់សាំង ត្បិតលោកត្រូវធ្វើដំណើរពីកន្លែងដឹកបន្លែទៅកន្លែងបោះឱ្យម៉ូយនៅតាមផ្សារដទៃទៀតនិងតាមបណ្ដាខេត្ត។
លោកថា៖ «ពិបាកគឺពិបាក ក្មួយ! ដោយសារអី? ការត្រូវចំណាយការធ្វើដំណើរ មិនថាគេ មិនថាយើងទេ ពិសេសដូចពូអ៊ីចឹង! ពូរាល់ថ្ងៃត្រូវធ្វើដំណើរច្រើន ចំណាយលើការចាក់សាំងច្រើន ព្រោះពូត្រូវបោះដុំ ដឹកជញ្ជូនបន្លែទៅឱ្យម៉ូយនៅតាមកន្លែងនិងតាមខេត្តនានា។ សួរថាក្នុងសម័យកូវីដនេះ យើងមិនសូវជារកប្រាក់ចំណេញបានច្រើនទេ ហើយរបស់របរផ្សេងចេះតែឡើងថ្លៃ ពិសេសសាំងហ្នឹងតែម្ដង។ ពីមុនកូវីដ យើងអាចថាយើងរកបានគួរសមដែរ ហើយរបស់របរអីវាសមតម្លៃដែរក្នុងការចំណាយ។ យ៉ាប់ណាស់តែប៉ុន្មានឆ្នាំចុងក្រោយ សម័យកូវីដហ្នឹងឯង»។
បញ្ហានេះ លោកបានអំពាវនាវដល់រដ្ឋាភិបាលជួយអន្តរាគមន៍បញ្ចុះតម្លៃប្រេងសាំងនៅកម្ពុជាក្នុងបរិបទកូវីដ-១៩នេះ ដើម្បីសម្រួលដល់ជីវភាពប្រជាជនដែលកំពុងជួបការលំបាកក្នុងការរកប្រាក់ចំណូល។
លោកបន្ថែមថា៖ «មិនបានអ្វីច្រើនពេកទេ សុំតែឱ្យរដ្ឋាភិបាលជួយព្យាយាម ដើម្បីជួយសម្រួលដល់ប្រជាជនយើងតែប៉ុណ្ណឹង។ ហើយយើងសង្ឃឹមថា នឹងឆ្លងកាត់បញ្ហានេះបានឆាប់ៗ ព្រោះអីយើងចង់បានស្ថានភាពពីឆ្នាំមុនៗមកវិញ»។
អ្នកស្រី ឆោម សុផានិត អាយុ៣០ឆ្នាំ សព្វថ្ងៃជាអ្នកដឹកជញ្ជូនអាហារឱ្យភ្ញៀវរបស់ក្រុមហ៊ុន Food Penda ក៏បានលើកឡើងថា ក្នុងបរិបទកូវីដ-១៩កំពុងរាលដាលនាពេលបច្ចុប្បន្ន ធ្វើឱ្យពលរដ្ឋជាច្រើនបាត់បង់ចំណូលឬមុខរបរ ហើយបញ្ហាប្រេងសាំងឡើងថ្លៃ កាន់តែធ្វើឱ្យពួកគាត់ជួបការលំបាកថែមទៀត។
អ្នកស្រីថា៖ «អ្នកដែលមានលុយ គេមិនសូវមានបញ្ហាទេ តែសម្រាប់គ្នាដែលជានិស្សិត អ្នកដែលក្រីក្រអ៊ីចឹងទៅ គ្នាមិនសូវមានលុយទេ។ ហើយសាំង[ឡើងថ្លៃ] គិតមើល! មួយថ្ងៃ អ្នកខ្លះទៅរកបានតែ៥ដុល្លារ ឬក៏១០ដុល្លារអីច្រើន! ហើយសាំងឡើងថ្លៃ ហើយគាត់គ្រាន់តែចំណាយលើសាំងហ្នឹង អស់ទៅហើយ»។
គិតត្រឹមថ្ងៃទី១៩ ខែតុលា ឆ្នាំ២០២១ ប្រេងម៉ាស៊ូតតម្លៃ៤ ០០០រៀល ប្រេងឥន្ធនៈធម្មតាមានតម្លៃ៤ ៣០០រៀលក្នុងមួយលីត្រ និងប្រេងឥន្ធនៈស៊ូពែ តម្លៃ៤ ៨៥០រៀលក្នុងមួយលីត្រ។ នេះបើយោងតាមតារាងតម្លៃប្រេងឥន្ធនៈតាមបណ្ដាក្រុមហ៊ុនផ្គត់ផ្គង់ប្រេងមួយចំនួនដូចជា តូតាល់(Total) កាល់តិច (Caltex) តេឡា (Tela) និង ភីធីធី (PTT) ក្នុងរាជធានីភ្នំពេញ។
កាលពីអំឡុងខែឧសភា ឆ្នាំ២០២០កន្លងទៅ តម្លៃប្រេងសាំងធម្មតាក្នុងប្រទេសកម្ពុជាបានធ្លាក់ចុះដល់២ ២៥០រៀលក្នុងមួយលីត្រ ហើយប្រេងម៉ាស៊ូតធ្លាក់ចុះដល់តម្លៃ២ ១៥០រៀលក្នុងមួយលីត្រ។ ការធ្លាក់ចុះនោះ បន្ទាប់ពីប្រមុខរាជរដ្ឋាភិបាលប្រកាសឱ្យប្រេងសាំងក្នុងប្រទេសបញ្ចុះតម្លៃ ដើម្បីជួយសម្រួលដល់ជីវភាពប្រជាពលរដ្ឋអំឡុងវិបត្តិជំងឺកូវីដ-១៩៕