សង្គមស៊ីវិលនិងអាណាព្យាបាលសិស្សមួយចំនួននៅមានការព្រួយបារម្ភចំពោះការដាក់ឱ្យដំណើរការរៀនក្នុងថ្នាក់ឡើងវិញ បើទោះបីជាការរៀនក្នុងថ្នាក់ផ្ទាល់មានប្រសិទ្ធភាពជាងការរៀនតាមអនឡាញយ៉ាងណាក្ដី។
អ្នកស្រី ហេង គឹមស៊្រង ដែលមានកូនតូចរៀននៅសាលាបឋមសិក្សាព្រះនរោត្ដម រាជធានីភ្នំពេញ បានសម្ដែងក្ដីព្រួយបារម្ភពីសុវត្ថិភាពរបស់កូន ទោះបីជាអ្នកស្រីយល់ឃើញថា ការរៀនផ្ទាល់ប្រសើរជាងការរៀនតាមអនឡាញ (online) ក្ដី។
លោកស្រីលើកឡើងថា៖ «សិស្សច្រើនពេក អ៊ីចឹងខ្លាចមានបញ្ហា វាលេងជាមួយគ្នា វាអត់សូវដឹង វាអត់ដូចមនុស្សធំ ។ ហើយសាលារដ្ឋ ដឹងហើយ សិស្សច្រើនណាស់ ខ្លាចហានិភ័យអ៊ីចឹង»។
ការលើកឡើងរបស់អ្នកស្រីបានធ្វើឡើងក្រោយពីក្រសួងអប់រំ យុវជន និងកីឡា បានប្រកាសនៅថ្ងៃទី២១ ខែតុលា ម្សិលមិញ ឱ្យត្រៀមបើកដំណើរការឡើងវិញ នូវគ្រឹះស្ថានសិក្សាចំណេះទូទៅគ្រប់កម្រិត គ្រឹះស្ថានឧត្ដមសិក្សា ទាំងសាធារណៈនិងឯកជន នៅតាមក្រុង-ស្រុកដែលជំងឺកូវីដ-១៩អាចគ្រប់គ្រងបាន និងតាមបណ្ដុំមនុស្សក្នុងថ្នាក់ចាប់ពី១៥នាក់ទៅ២០នាក់ ចាប់ពីថ្ងៃទី០១ ខែវិច្ឆិកា ឆ្នាំ២០២១នេះ។
និស្សិតផ្នែកគណិតវិទ្យានៃសាកលវិទ្យាល័យភូមិន្ទភ្នំពេញ កញ្ញា ហាំ ស្រីហ៊ាង ក៏មានការព្រួយបារម្ភដែរចំពោះការឆ្លងជំងឺកូវីដ-១៩ បន្ទាប់ពីប្រជាពលរដ្ឋជាច្រើនបានដើរលេងនៅអំឡុងពេលពិធីបុណ្យភ្ជុំបិណ្ឌ ហើយចំនួនអ្នកស្លាប់នៅតែបន្តមានជារៀងរាល់ថ្ងៃ។
កញ្ញាលើកឡើងថា៖ «យើងបានសង្កេតឃើញហើយថា កូវីដឥលូវ វាមិនទាន់ស្ងប់ស្ងាត់នៅឡើយទេ ប៉ុន្តែខណៈដែលកូវីដមិនទាន់ស្ងប់ស្ងាត់ ហើយពេលភ្ជុំបិណ្ឌ ក្រសួងបានប្រកាសឱ្យគោរពតាមវិធានការរបស់ក្រសួង តែយើងឃើញប្រជាជនយើងមួយចំនួនមិនបានគោរពតាមវិធានការហ្នឹងទេ»។
ចំណែកអាណាព្យាបាលសិស្សម្នាក់ទៀត អ្នកស្រី សុផាត មករា ដែលមានកូនរៀននៅថ្នាក់ទី៣វិញ បានសម្ដែងអារម្មណ៍រីករាយ នៅពេលទទួលបានដំណឹងថា ក្រសួងអប់រំនឹងបើកសាលារៀនឡើងវិញ ចាប់ពីខែវិច្ឆិកាខាងមុខ។ ប៉ុន្ដែជុំវិញការរីករាយនេះ អ្នកស្រីក៏នៅតែមានក្ដីបារម្ភខ្លះដែរចំពោះការឆ្លងជំងឺកូវីដ-១៩ ដោយអ្នកស្រីបានសង្កត់ធ្ងន់ថា សកម្មភាពរបស់កូនសិស្សថាតើអាចគោរពតាមគោលការណ៍ «៣កុំ ៣ការពារ» ដែរឬទេ។
អ្នកស្រីថា៖ «ប៉ុន្ដែក្នុងនាមជាម្ដាយ យើងអត់អាចបន្តឱ្យកូនយើងរៀនតាមរយៈអនឡាញទៀតបានទេ ពីព្រោះការរៀនតាមអនឡាញ គឺកូនយើងមិនអាចរៀនចេះដូចយើងរៀននៅផ្ទាល់បានទេ […] ហើយទន្ទឹមនឹងនេះដែរ ខ្ញុំក៏ចង់ឱ្យខាងសាលាពង្រឹងវិន័យទៅលើការការពារនិងអនាម័យឱ្យបានខ្ពស់»។
ប្រធានសមាគមគ្រូបង្រៀនកម្ពុជាឯករាជ្យ លោកស្រី អ៊ុក ឆាយ៉ាវី ហាក់មិនយល់ស្របចំពោះការបើកឱ្យដំណើរការរៀនក្នុងថ្នាក់ឡើងវិញទេ ខណៈដែលអ្នកស្លាប់ដោយសារជំងឺកូវីដ-១៩នៅតែបន្តមានជារៀងរាល់ថ្ងៃ។ បន្ថែមពីនេះ លោកស្រីស្នើឱ្យរដ្ឋាភិបាលពិចារណាឡើងវិញក្នុងការបើកសាលាឡើងវិញនេះ។
លោកស្រីលើកឡើងថា៖ «ការដែលពួកគាត់ស្និទ្ធស្នាលជាមួយមិត្តភក្តិនេះ ជាកត្តាប្រឈមខ្លាំង! ជាធម្មតា សិស្សានុសិស្សតែងតែទៅជួបជុំគ្នា ទោះបីប្រើអាល់កុល ប្រើម៉ាស់ តាមសាលា ប៉ុន្តែជួយបានភាគតិចទេ»។
ចំណែកប្រធានអង្គការគណនេយ្យសង្គមកម្ពុជា លោក សន ជ័យ មានប្រសាសន៍ថា ការបើកសាលារៀនឡើងវិញ គឺជាដំណោះស្រាយមួយល្អ ខណៈពេលដែលការផ្អាកដំណើរការរៀនសូត្របានបន្តអស់រយៈពេលជាច្រើនខែ និងមួយវិញទៀត ការយល់ដឹងទៅលើវិធានការបង្ការកូវីដ-១៩ ហាក់បីជាដឹងជ្រួតជ្រាបច្រើនក្នុងស្រទាប់មហាជន។ តែយ៉ាងណា លោកថា ការប្រុងប្រយ័ត្នខ្ពស់ក៏នៅតែជាអ្វីដែលយើងចង់ឃើញដែរ។
លោកលើកឡើងថា៖ «យើងកំពុងតែឆ្ពោះទៅកាន់រដូវរងា អ៊ីចឹងរដូវរងានេះ គួរតែប្រយ័ត្នប្រយែងខ្ពស់ដែរ បន្ថែមទៅលើពេលវេលាធម្មតា ភ្លៀងលាយក្ដៅ ព្រោះរដូវរងាមានលក្ខណៈស៊ីសង្វាក់គ្នាដូចកូវីដ-១៩ដែរ ពីព្រោះកូវីដ-១៩ ជាមេរោគរលាកផ្លូវដង្ហើម និងមានទម្រង់ដូចនឹងជំងឺផ្ដាសាយ»។
ទោះជាយ៉ាងនេះក្ដី នាយកសាលាវិទ្យាល័យបាក់ទូក លោក តូច កន្តាល់ មានប្រសាសន៍ថា ដើម្បីធានាឱ្យមានសុវត្ថិភាពសុខភាពដល់គ្រូនិងសិស្ស សាលាបានដាក់ចេញវិធានការខ្ជាប់ខ្ជួនតាមវិធានការ «៣កុំ ៣ការពារ» ជាពិសេសមានការបែងចែកចំនួនសិស្ស និងបែងចែកថ្នាក់រៀនផ្ទាល់ និងបន្តរៀនអនឡាញខ្លះផងដែរ។ តែអ្វីដែលលោកមានការព្រួយបារម្ភជាពិសេសនោះ គឺចំពោះសិស្សតូចៗដែលមិនបានអនុវត្តតាមវិធានការការពារ ដែលងាយក្នុងការឆ្លងអំឡុងពេលចេញលេង។
លោកលើកឡើងថា៖ «បញ្ហាសិស្សគាត់នៅពេលចេញលេង គាត់នៅក្បែរគ្នា កៀកកើយគ្នា សិស្សតូចៗគាត់មិនទាន់យល់ តែសិស្សធំគាត់យល់បានល្អ»។
អ្នកនាំពាក្យក្រសួងអប់រំ យុវជន និងកីឡា លោក រស់ សុវាចា បានមានប្រសាសន៍ថា ជាទូទៅ ការបើកដំណើរការគ្រឹះស្ថានសិក្សាគ្រប់កម្រិត សម្រាប់ការរៀននិងបង្រៀនតាមបណ្ដុំនៅរាជធានី-ខេត្ត ដែលមានហានិភ័យទាប បាននិងកំពុងប្រព្រឹត្តទៅដោយមានលទ្ធផលអាចទទួលយកបានតាមការគ្រោងទុក ទន្ទឹមនឹងការអនុវត្តយ៉ាងខ្ជាប់ខ្ជួននូវគោលការណ៍ប្រតិបត្តិស្តង់ដារ (SOP) និងវិធានការសុខាភិបាល។
លោកបន្តថា៖ «ក្រសួងអប់រំ យុវជន និងកីឡា បន្តយកចិត្តទុកដាក់កម្រិតខ្ពស់ តាមដាននិងវាយតម្លៃស្ថានភាពកូវីដ-១៩ និងកត្តាធម្មជាតិ ដោយយោងទៅលើកិច្ចសហការជាមួយក្រសួងសុខាភិបាល និងរួមទាំងទិដ្ឋភាពជាក់ស្តែង»។
យោងតាមសេចក្ដីជូនដំណឹងរបស់ក្រសួងអប់រំ នៅល្ងាចថ្ងៃទី២១ ខែតុលា បានឱ្យដឹងថា ចាប់ពីថ្ងៃទី១ ខែវិច្ឆិកា ឆ្នាំ២០២១ ក្រសួងនឹងពង្រីកវិសាលភាពនៃការបង្រៀននិងរៀនតាមបណ្ដុំសម្រាប់គ្រឹះស្ថានសិក្សាសាធារណៈនិងឯកជននៅគ្រប់កម្រិត ក្នុងភូមិសាស្ត្រទូទាំងរាជធានី-ខេត្តទាំងអស់។
បើតាមក្រសួងអប់រំ ការសម្រេចឈានទៅបើកសាលារៀនឡើងវិញនេះ បន្ទាប់ពីក្រសួងបានវាយតម្លៃទៅលើដំណើរការបង្រៀននិងរៀនតាមបណ្ដុំសម្រាប់គ្រឹះស្ថានសិក្សាសាធារណៈនិងឯកជននាពេលកន្លងមក ដោយមិនមានបញ្ហាឆ្លងរាលដាលជំងឺកូវីដ-១៩ធ្ងន់ធ្ងរនោះទេ។ ក្រសួងក៏បានវាយតម្លៃដែរថា ការឆ្លងជំងឺកូវីដ-១៩ ទៅលើគ្រូបង្រៀននិងសិស្សានុសិស្សក្នុងរយៈពេល៧ថ្ងៃមុនពិធីបុណ្យភ្ជុំបិណ្ឌ និង៧ថ្ងៃក្រោយពិធីបុណ្យភ្ជុំបិណ្ឌកន្លងមក មានកម្រិតតិចតួចនិងអាចគ្រប់គ្រងបាន ខណៈមាតាបិតា អាណាព្យាបាល គ្រូបង្រៀន និងសិស្សានុសិស្ស-និស្សិត ក៏បានទទួលវ៉ាក់សាំងការពារជំងឺកូវីដ-១៩ ក្នុងអត្រាខ្ពស់ផងដែរ៕