តុលាការខេត្តព្រះវិហារ បានសម្រេចផ្តន្ទាទោសអ្នកសារព័ត៌មានចំនួន៧នាក់ដាក់ពន្ធនាគារចំនួន២ឆ្នាំ និងម្នាក់ទៀតដាក់ពន្ធនាគារចំនួន២ឆ្នាំ៦ខែ ក្រោមការចោទប្រកាន់ពីបទ «កំហែងយក» ប៉ុន្តែទោសជាប់ពន្ធនាគារត្រូវបានព្យួរ ដោយតុលាការសម្រេចឱ្យឃុំខ្លួនត្រឹមជាង៤ខែប៉ុណ្ណោះ។
កាលពីថ្ងៃទី៤ ខែមិថុនា ឆ្នាំ២០២១ សមត្ថកិច្ចស្រុកត្បែងមានជ័យ ខេត្តព្រះវិហារ បានចាប់ខ្លួនអ្នកសារព័ត៌មានចំនួន៨នាក់ ក្នុងនោះមានស្ត្រី២នាក់ ដោយចោទប្រកាន់ពីបទ «កំហែងយក» បន្ទាប់ពីពួកគេរងការចោទថាបានជំរិតទារប្រាក់ក្នុងម្នាក់ចំនួន១០០ដុល្លារ ពីម្ចាស់សិប្បកម្មឈើមួយកន្លែង ស្ថិតនៅចំណុចអូរទីទុយ ភូមិក្រាំងដូង ឃុំព្រះឃ្លាំង ស្រុកត្បែងមានជ័យ ខេត្តព្រះវិហារ។ ក្រោយមក តុលាការខេត្តនេះសម្រេចឱ្យឃុំខ្លួនបណ្ដោះអាសន្ននៅពន្ធនាគារចំនួន៧នាក់ ខណៈម្នាក់ទៀតបានដោះលែងឱ្យនៅក្រៅឃុំបណ្ដោះអាសន្ន។
សហមេធាវីការពារក្ដីឱ្យអ្នកសារព័ត៌មានទាំង៨នាក់ លោក នួន ផានិត ប្រាប់ វីអូឌី ថាកាលពីម្សិលមិញ ចៅក្រមជំនុំជម្រះសាលាដំបូងខេត្តព្រះវិហារបានប្រកាសសាលក្រមផ្ដន្ទាទោសអ្នកសារព័ត៌មានចំនួន៧នាក់ឱ្យជាប់ពន្ធនាគារក្នុងម្នាក់ៗចំនួន២ឆ្នាំ ប៉ុន្តែអនុវត្តទោសតែ៤ខែ២០ថ្ងៃ ខណៈអ្នកសារព័ត៌មានម្នាក់ទៀតដែលនៅក្រៅឃុំនោះ ត្រូវបានតុលាការកាត់ទោសឱ្យជាប់ពន្ធនាគារ២ឆ្នាំ៦ខែ ប៉ុន្តែអនុវត្តទោសតែ៨ថ្ងៃប៉ុណ្ណោះ ដោយទោសនៅសល់គឺត្រូវព្យួរ។
បើតាមមេធាវីរូបនេះ អ្នកសារព័ត៌មានទាំង៨នាក់ត្រូវតុលាការខេត្តព្រះវិហារចោទប្រកាន់ពីបទ «កំហែងយក»។
របាយការណ៍របស់អង្គការអ្នកកាសែតនៅកម្ពុជា បានឱ្យដឹងថា ចាប់ពីខែមករា ដល់ខែតុលា ឆ្នាំ២០២០កន្លងទៅ មានអ្នកសារព័ត៌មានចំនួន៥៩នាក់បានទទួលរងនូវការធ្វើទុក្ខបុកម្នេញក្នុងរូបភាពផ្សេងៗ រួមមាន ការប្រើអំពើហិង្សា ការចាប់ខ្លួន និងការរងបណ្ដឹងពីតុលាការ ក្នុងនោះមានអ្នកសារព័ត៌មានចំនួន២៧នាក់ត្រូវបានចាប់ខ្លួន ៧នាក់ជាជនរងគ្រោះនៃការប្រើអំពើហិង្សា និងម្នាក់បានស្លាប់៕