តុលាការក្រុងភ្នំពេញ នឹងដោះលែងសកម្មជនសង្គម និងសមាជិកអតីតបក្សប្រឆាំង សរុប១០នាក់ ចាប់ពីខែក្រោយនេះ ខណៈមន្ត្រីសិទ្ធិមនុស្សបានចាត់ទុកការកាត់ទោសពួកគេឱ្យជាប់ពន្ធនាគារកន្លងមកថា ជាសារនៃការគំរាមកំហែងដល់សិទ្ធិសេរីភាពនៃការជួបជុំដោយសន្តិវិធី។
តុលាការក្រុងភ្នំពេញ នៅថ្ងៃទី២៦ ខែតុលានេះ បានសម្រេចផ្ដន្ទាទោសសកម្មជនសង្គម សកម្មជននយោបាយ និងយុវជន ដែលកំពុងជាប់ឃុំ ឱ្យជាប់ពន្ធនាគារចំនួន២០ខែ និងពិន័យជាប្រាក់ម្នាក់ៗចំនួន២លានរៀល (២ ០០០ ០០០ រៀល) ពីបទ «ញុះញង់» តាមបញ្ញត្តិមាត្រា៤៩៤ និងមាត្រា៤៩៥ នៃក្រមព្រហ្មទណ្ឌកម្ពុជា។
សកម្មជនសង្គម និងយុវជន ដែលត្រូវបានផ្ដន្ទាទោសទាំងនោះ រួមមាន កញ្ញា ឈឿន ដារ៉ាវី, លោក ហ៊ុន វណ្ណៈ, លោក មាន ព្រហ្មមុនី, ព្រះតេជគុណ កើត សារ៉ាយ, លោក ថា ឡាវី, លោក មួង សុភ័ក្ត្រ និងកញ្ញា អេង ម៉ាឡៃ។
ប៉ុន្តែសម្រាប់កញ្ញា ឈឿន ដារ៉ាវី និងលោក ហ៊ុន វណ្ណៈ ត្រូវបានកាត់ទោសម្នាក់ៗឱ្យអនុវត្តទោសជាប់ពន្ធនាគារចំនួន១៥ខែ ខណៈអ្នកផ្សេងទៀតត្រូវអនុវត្តទោសជាប់ពន្ធនាគារចំនួន១៤ខែ ចំណែកទោសដែលនៅសល់ផ្សេងទៀតត្រូវបានព្យួរ ក្រោមការសាកល្បងសម្រាប់រយៈពេល២ឆ្នាំ។ ក្នុងរយៈពេល២ឆ្នាំនេះ តុលាការបានតម្រូវឱ្យពួកគេជូនដំណឹងទៅតុលាការ ប្រសិនបើពួកគេផ្លាស់ប្ដូរអាសយដ្ឋាន ផ្លាស់ប្ដូរការងារ ឬចង់ចាកចេញពីប្រទេស ព្រមទាំងលក្ខខណ្ឌផ្សេងៗទៀត។
ពួកគេទាំងនេះត្រូវបានអាជ្ញាធរចាប់ខ្លួនក្នុងខែសីហា និងខែកញ្ញា ឆ្នាំ២០២០ ពាក់ព័ន្ធនឹងការជួបជុំគ្នាសម្ដែងមតិនៅក្បែរសាលាដំបូងរាជធានីភ្នំពេញ ដើម្បីទាមទារឱ្យមានការដោះលែងលោក រ៉ុង ឈុន អតីតប្រធានសមាគមគ្រូបង្រៀនកម្ពុជាឯករាជ្យ និងជាប្រធានសហជីព។ បើគិតលើការជាប់ពន្ធនាគារកន្លងមក ពួកគេនឹងត្រូវដោះលែងវិញនៅអំឡុងពាក់កណ្ដាលខែវិច្ឆិកា ឬខែធ្នូ ខាងមុខនេះ។
ទោះជាយ៉ាងនេះក្ដី សាច់ញាតិនិងមេធាវីរបស់ពួកគេមួយចំនួនបានអះអាងថា ការកាត់ទោសនេះ គឺជារឿងអយុត្តិធម៌។
ម្តាយរបស់កញ្ញា ឈឿន ដារ៉ាវី គឺលោកស្រី ថាច់ ធីតា បានថ្លែងមកពីខេត្តបាត់ដំបងថា លោកស្រីមិនអាចទទួលយកបានទេ ចំពោះការកាត់ទោសនេះ។ លោកស្រីថា កូនរបស់លោកស្រីនិងយុវជនផ្សេងទៀតមិនត្រូវមានទោសនោះទេ។
លោកស្រីមានប្រសាសន៍ថា៖ «ខ្ញុំទទួលស្គាល់ហើយថា ខ្ញុំរំភើបដែរចំពោះកូនខ្ញុំដែលនឹងត្រូវចេញមកនៅពាក់កណ្ដាលខែ១១ហ្នឹង ប៉ុន្តែការដែលតុលាការកាត់ទោសគាត់ហ្នឹង គឺមិនយុត្តិធម៌! នាងខ្ញុំមិនអាចទទួលយកបានទេ អ៊ីចឹងចាំពេលដែលកូនខ្ញុំចាកចេញមកហ្នឹង យើងនឹងធ្វើការទៅតាមហ្នឹង ខ្ញុំនឹងពិភាក្សាជាមួយមេធាវី ថាតើត្រូវធ្វើយ៉ាងម៉េច»។
ចំណែកកញ្ញា អេង វ៉ាន់ឌី ប្អូនស្រីបង្កើតរបស់កញ្ញា អេង ម៉ាឡៃ ហៅ សូ មេត្តា ជាសកម្មជនសិទ្ធិមនុស្សនៅក្នុងក្រុមយុវជនខ្មែរថាវរៈ បានថ្លែងដែរថា នាងក៏មិនអាចទទួលយកបានដែរចំពោះការកាត់ទោសនេះ។
កញ្ញាបញ្ជាក់ថា៖ «បើគិតតាមផ្លូវច្បាប់ហ្មង គាត់អត់មានទោសកំហុសអ្វីទេ អានេះគេឃុំខ្លួនគាត់ ផ្ដន្ទាទោសគាត់១៤ខែ ហើយធ្វើឱ្យពួកខ្ញុំឈឺចាប់យ៉ាងខ្លាំង។ ដល់ពេលគាត់ជាប់រយៈពេល១ឆ្នាំជាងមកនេះ ធ្វើឱ្យជីវភាពគ្រួសារខ្ញុំធ្លាក់ចុះ»។
ទាក់ទងករណីនេះ នាយករងទទួលបន្ទុកកម្មវិធីឃ្លាំមើលនៃអង្គការលីកាដូ លោក អំ សំអាត បានចាត់ទុកការកាត់ទោសនេះ គឺជាសារមួយដែលគំរាមកំហែងដល់សិទ្ធិសេរីភាពនៃការជួបជុំ និងការប្រមូលផ្ដុំដោយសន្តិវិធី។
លោកបញ្ជាក់ថា៖ «អ៊ីចឹងអាការដែលកាត់ទោសឱ្យគាត់ជាប់ [ពន្ធនាគារ] ២០ខែ តែអនុវត្ត១៤ឬក៏១៥ខែនេះ យើងមើលទៅថាជាសារមួយដែលគំរាមកំហែងទៅលើសេរីភាពនៃការជួបជុំ នៃការប្រមូលផ្ដុំដោយសន្តិវិធី ឬក៏ការបញ្ចេញមតិដោយសន្តិវិធីរបស់ពួកគាត់»។
ទោះជាយ៉ាងណាក្ដី មេធាវីការពារក្ដីឱ្យសកម្មជនសង្គម លោក សំ សុគង់ នឹងពិភាក្សាជាមួយកូនក្ដីរបស់ខ្លួនថាតើត្រូវប្ដឹងឧទ្ធរណ៍បន្តទៀតឬបញ្ចប់នៅត្រឹមនេះ។
លោកមេធាវីបញ្ជាក់យ៉ាងដូច្នេះថា៖ «ទាក់ទងនឹងការផ្ដន្ទាទោសនេះ គឺខ្ញុំក៏មានការខកចិត្តដែរ បើសិនជាតុលាការសម្រេចឱ្យពួកគាត់រួចផុតពីបទចោទ អាហ្នឹងវាល្អជាង! ដោយសារយើងមើលពីសកម្មភាពរបស់គាត់ហ្នឹង គឺសកម្មភាពហ្នឹងមិនមែនជាបទល្មើសញុះញង់ទេ គ្រាន់តែជាការបង្ហាញអំពីការបញ្ចេញមតិ និងការជួបជុំដោយសន្តិវិធី។ ហើយជាពិសេស គឺគោលបំណងដែលសំខាន់នោះ គឺស្នើសុំឱ្យមានការដោះលែងលោកគ្រូ រ៉ុង ឈុន តែប៉ុណ្ណោះ។ អ៊ីចឹងវាអត់មានពាក់ព័ន្ធអីជារឿងញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គមអីទេ»។
ក្រៅពីការកាត់ទោសសកម្មជនសង្គមនិងយុវជនទាំងនោះ តុលាការក្រុងភ្នំពេញ នៅថ្ងៃនេះ ក៏បានកាត់ទោសសមាជិកអតីតគណបក្សប្រឆាំង៣នាក់ទៀត រួមមាន លោក ជុំ ពុទ្ធី លោក ឈួ ផេង និងលោក គង់ សំអាន ដោយចោទប្រកាន់និងផ្ដន្ទាទោសនៅក្នុងសំណុំរឿងតែមួយនេះដែរ ក្នុងនោះ លោក ជុំ ពុទ្ធី និងលោក ឈួ ផេង ត្រូវអនុវត្តទោសជាប់ពន្ធនាគារចំនួន១៥ខែ ខណៈលោក គង់ សំអាន នឹងត្រូវអនុវត្តទោសចំនួន១៤ខែ។
លើសពីនេះ មនុស្ស៤នាក់ផ្សេងទៀតដែលត្រូវជាសមាជិកអតីតគណបក្សប្រឆាំង ត្រូវបានតុលាការក្រុងភ្នំពេញសម្រេចផ្ដន្ទាទោសដោយកំបាំងមុខ ក្នុងនោះរួមមាន លោក សេង ម៉េងប៊ុនរ៉ុង, លោក ហូ វ៉ាន់, លោក អ៊ូ ចាន់រិទ្ធ និងលោក គង់ សុភា ពីបទ «ញុះញង់» និងចេញដីកាឱ្យតាមចាប់ខ្លួន។ អ្នកទាំងនេះត្រូវបានកាត់ទោសឱ្យជាប់ពន្ធនាគារម្នាក់ៗចំនួន២ឆ្នាំ ព្រមទាំងពិន័យជាប្រាក់ម្នាក់ៗចំនួន៤លានរៀល។
ចំណែកបទចោទប្រឆាំងនឹងអតីតតំណាងរាស្ត្រអូស្ត្រាលីដើមកំណើតខ្មែរ លោក ហុង លីម ត្រូវបានតុលាការទម្លាក់ចោលការចោទប្រកាន់៕