ក្រសួងយុត្តិធម៌ រំឭកតុលាការឱ្យពង្រឹងនីតិវិធីជំនុំជម្រះសំណុំរឿងបទល្មើសគ្រឿងញៀន ដើម្បីធានាសុក្រឹតភាពនៃការស្វែងរកការពិតស្របតាមច្បាប់ ក្រោយពីរកឃើញថា ករណីខ្លះបានដំណើរការទៅដោយមិនអនុលោមទៅតាមមាត្រា៧៤នៃច្បាប់។
រដ្ឋមន្ត្រីក្រសួងយុត្តិធម៌ លោក កើត រិទ្ធ បានលើកឡើងក្នុងលិខិតចុះថ្ងៃទី២៥ ខែតុលា ថាក្នុងយុទ្ធនាការដោះស្រាយការកកស្ទះសំណុំរឿងព្រហ្មទណ្ឌនៅតាមសាលាដំបូងរាជធានី-ខេត្ត នាពេលកន្លងមកនេះ ក្រសួងបានពិនិត្យឃើញថា សាលាដំបូង និងអយ្យការអមសាលាដំបូងរាជធានី-ខេត្តទាំងអស់ បានខិតខំប្រឹងប្រែងចាត់ការសំណុំរឿងព្រហ្មទណ្ឌភាគច្រើនដែលជាសំណុំរឿងពាក់ព័ន្ធនឹងបទល្មើសគ្រឿងញៀន បានយ៉ាងឆាប់រហ័ស និងជាច្រើនករណី ស្របតាមនីតិវិធីនៃច្បាប់ជាធរមាន។
ប៉ុន្តែលោកថា ទន្ទឹមនេះ ការកោះហៅឱ្យចូលរួមនិងការស្ដាប់ចម្លើយមន្ត្រីនគរបាល ឬភ្នាក់ងារនគរបាលយុត្តិធម៌ ក្នុងឋានៈជាសាក្សី ក្នុងនីតិវិធីស៊ើបសួរ និងការជំនុំជម្រះរបស់តុលាការនៅក្នុងសំណុំរឿងពាក់ព័ន្ធនឹងបទល្មើសគ្រឿងញៀនមួយចំនួន នៅមិនទាន់បានអនុវត្តឱ្យបានត្រឹមត្រូវស្របតាមនីតិវិធីច្បាប់ ដែលមានចែងក្នុងមាត្រា៧៤ កថាខណ្ឌទី១ នៃច្បាប់ស្ដីពីការត្រួតពិនិត្យគ្រឿងញៀននៅឡើយទេ។
បញ្ហានេះ រដ្ឋមន្ត្រីក្រសួងយុត្តិធម៌បានគូសបញ្ជាក់ថា វត្តមានចូលរួមរបស់នគរបាលយុត្តិធម៌ក្នុងឋានៈជាសាក្សីនៅក្នុងដំណើរការនីតិវិធីរបស់តុលាការ ចំពោះសំណុំរឿងបទល្មើសគ្រឿងញៀន «មានសារៈសំខាន់និងមានភាពចាំបាច់ក្នុងការធានាសុក្រឹតភាពនៃការស្វែងរកការពិត ប្រសិទ្ធភាពនៃការអនុវត្តច្បាប់ ក៏ដូចជាធានាបាននូវចំណាត់ការរឿងក្ដីប្រកបដោយភាពត្រឹមត្រូវស្របតាមច្បាប់»។
លោក កើត រិទ្ធ បានរំឭកទៅមន្ត្រីតុលាការឱ្យពិនិត្យនិងចាត់ចែងពង្រឹងការអនុវត្តនីតិវិធីស្របតាមខ្លឹមសារនៃមាត្រា៧៤ នៃច្បាប់ស្ដីពីការត្រួតពិនិត្យគ្រឿងញៀននេះឱ្យមានប្រសិទ្ធភាពខ្ពស់។
យ៉ាងណា ក្រសួងមិនបានបញ្ជាក់ថា ការជំនុំជម្រះសំណុំរឿងបទល្មើសគ្រឿងញៀនដែលមិនបានអនុវត្តត្រឹមត្រូវតាមច្បាប់មានប៉ុន្មានភាគរយ និងភាគច្រើនបានកើតឡើងនៅសាលាដំបូងរាជធានី-ខេត្តណាពិតប្រាកដទេ។
អ្នកនាំពាក្យក្រសួងយុត្តិធម៌ លោក ជិន ម៉ាលីន មិនអាចសុំការបញ្ជាក់បន្ថែមបានទេ នៅថ្ងៃពុធនេះ។
ដោយឡែក អ្នកនាំពាក្យអយ្យការអមសាលាដំបូងខេត្តព្រះសីហនុ និងជាព្រះរាជអាជ្ញារង លោក ហួត វិចិត្រ សុំមិនធ្វើអត្ថាធិប្បាយ ជុំវិញភាពមិនប្រក្រតីដែលក្រសួងយុត្តិធម៌រកឃើញនេះទេ ដោយថា ក្រសួងមិនបានសំដៅដល់សាលាដំបូងណាមួយ រួមទាំងខេត្តព្រះសីហនុ។
លោកថា៖ «បងបានព័ត៌មានមកពីណាដែលថាសាលាដំបូងខេត្តព្រះសីហនុមិនបានគោរពទៅតាមមាត្រាក្នុងច្បាប់ស្ដីពីការត្រួតពិនិត្យគ្រឿងញៀន [អត់ទេបង! គាត់និយាយជាទូទៅទេ ប៉ុន្តែក្នុងនាមសាលាដំបូងខេត្តមួយដែរ បងនឹងពិនិត្យឡើងវិញយ៉ាងម៉េចដែរជុំវិញការរកឃើញនេះ?] ធម្មតា សេចក្ដីសម្រេចរបស់ថ្នាក់ដឹកនាំ ពិសេសរបស់ឯកឧត្ដមរដ្ឋមន្ត្រី គ្រប់សាលាដំបូងទាំងអស់ត្រូវតែអនុវត្ត»។
នាយករងអង្គការឃ្លាំមើលសិទ្ធិមនុស្សលីកាដូ និងជាអង្គការឃ្លាំមើលសិទ្ធិអ្នកជាប់ឃុំ គឺលោក អំ សំអាត មានប្រសាសន៍ថា សេចក្ដីណែនាំ វាគ្រាន់តែជាសារក្រើនរំឭកប៉ុណ្ណោះ។ លោកផ្ដល់ជាយោបល់ថា ដើម្បីទប់ស្កាត់បញ្ហានេះឱ្យមានប្រសិទ្ធភាព ទាល់តែក្រសួងមានចំណាត់ការទៅលើមន្ត្រីដែលបានប្រព្រឹត្តខុស។
លោកថា៖ «ខ្ញុំគិតថា ជាប្រសិទ្ធភាព វាគួរតែចែងអំពីកាតព្វកិច្ចតែម្ដង ធ្វើជាសាក្សីក្នុងពេលជជែកដេញដោលតែម្តង។ ហើយទី២ ក្រសួងមហាផ្ទៃក៏ដូចគ្នាដែរ គួរតែណែនាំយ៉ាងណាដើម្បីឱ្យក្លាយជាកាតព្វកិច្ចទៅដល់មន្ត្រីដែលកសាងសំណុំរឿងគ្រឿងញៀនហ្នឹង […] បើសិនជាមិនអនុវត្ត វាទាល់តែមានវិធានការរដ្ឋបាល»។
យ៉ាងណា អំឡុងបិទបញ្ចប់យុទ្ធនាការដោះស្រាយការកកស្ទះសំណុំរឿងនៅតាមសាលាដំបូងរាជធានី-ខេត្ត ក្រសួងយុត្តិធម៌បានលើកឡើងនៅក្នុងសេចក្ដីប្រកាសរបស់ខ្លួន ចុះថ្ងៃទី២៩ ខែមិថុនា ឆ្នាំ២០២១ ថារយៈពេលជាង១ឆ្នាំ គិតពីថ្ងៃទី១៨ ខែឧសភា ឆ្នាំ២០២០ រហូតដល់ថ្ងៃទី១៧ ខែមិថុនា ឆ្នាំ២០២១ ភាគីពាក់ព័ន្ធបានដោះស្រាយសំណុំរឿងព្រហ្មទណ្ឌដែលកកស្ទះ ទាំងដំណាក់កាលអយ្យការ ដំណាក់កាលស៊ើបសួរ និងដំណាក់កាលជំនុំជម្រះ បានចំនួនសរុបជាង៣៧ ៩០០សំណុំរឿង ស្មើនឹង៩៦ភាគរយ នៃសំណុំរឿងព្រហ្មទណ្ឌដែលកកស្ទះសរុបជាង៣៩ ៥០០សំណុំរឿង។
តែសេចក្ដីប្រកាសនោះមិនបានញែកសំណុំរឿងព្រហុ្មទណ្ឌពាក់ព័ន្ធទៅនឹងបទល្មើសគ្រឿងញៀនថា មានប៉ុន្មានទេ ដោយគ្រាន់តែភ្ជាប់សារថា យុទ្ធនាការនោះប្រកាន់ខ្ជាប់នូវអភិក្រមការងារ «លឿន ត្រឹមត្រូវ យុត្តិធម៌ និងមិនពុករលួយ»៕
