អតីតតំណាងរាស្រ្តគណបក្សសមរង្ស៊ី មណ្ឌលខេត្តកណ្ដាល និងជាសមាជិកគណៈកម្មាធិការនាយក និងជាសមាជិកក្រុមការងារខេត្តមួយនេះ គឺលោក ឃឹម ឡាគី បានដាក់ពាក្យសុំបង្កើតគណបក្សថ្មីនៅក្រសួងមហាផ្ទៃ បន្ទាប់ពីលោកបានសិទ្ធិធ្វើនយោបាយឡើងវិញនៅខែសីហា។
តាមលិខិតស្នើសុំដែល វីអូឌី ទទួលបាន លោក ឃឹម ឡាគី បានស្នើទៅរដ្ឋមន្រ្តីក្រសួងមហាផ្ទៃ លោក ស ខេង នៅថ្ងៃទី២៤ ខែតុលា ឆ្នាំ២០២១ ដោយសុំបង្កើតគណបក្សនយោបាយឈ្មោះ “គណបក្សអនាគតជាតិ” (គ.អ.ជ) ក្នុងនាមលោកជាតំណាងស្ថាបនិករបស់គណបក្ស។
ក្នុងសំណើនោះ លោកបានភ្ជាប់ជាមួយចំនួនប្រជាពលរដ្ឋឯកភាពគាំទ្រ៨០នាក់ និងបានបញ្ជាក់ពីទីតាំងស្នាក់ការកណ្ដាលរបស់គណបក្ស ស្ថិតនៅឃុំព្រែកគយ ស្រុកស្អាង ខេត្តកណ្ដាល។
វីអូឌី មិនអាចស្វែងរកការទំនាក់ទំនងអតីតថ្នាក់ដឹកនាំគណបក្សប្រឆាំងវ័យ៤៦ឆ្នាំរូបនេះ ដើម្បីសុំការអធិប្បាយបន្ថែមជុំវិញការស្នើសុំបង្កើតគណបក្សបានទេ គិតត្រឹមថ្ងៃទី២៨ ខែតុលានេះ។
ដោយឡែក អ្នកនាំពាក្យក្រសួងមហាផ្ទៃ លោក ផាត សុផានិត ថ្លែងថា ក្រសួងមហាផ្ទៃបានទទួលពាក្យស្នើសុំនេះហើយកាលពីថ្ងៃចន្ទដើមសប្ដាហ៍នេះ។ លោកបន្ថែមថា ក្រសួងមិនទាន់សម្រេចយ៉ាងណាចំពោះសំណើនោះនៅឡើយ ដោយសារពាក្យស្នើទើបទទួលបាន។
លោក ផាត សុផានិត ថ្លែងតាមសារ Telegram ថា៖ «សំណើនេះកំពុងត្រូវបានអង្គភាពជំនាញពិនិត្យ ដើម្បីឱ្យស្របតាមច្បាប់និងនីតិវិធីជាធរមាន។ ដំណើរការមិនទាន់រួចរាល់នោះទេ ដោយសារឯកសារទើបតែបញ្ជូនមកដល់ក្រសួង។ ក្រសួងនឹងជូនដំណឹងទៅសាម៉ីសំណើអំពីលទ្ធផល»។
លោក ឃឹម ឡាគី ត្រូវបានព្រះមហាក្សត្រឡាយព្រះហត្តលេខាព្រះរាជទាននីតិសម្បទាយោបាយឡើងវិញ ជាមួយអតីតប្រធានប្រតិបត្តិអតីតគណបក្សសង្គ្រោះជាតិប្រចាំខេត្តតាកែវមួយរូបទៀត គឺលោក ម៉ៅ សុផល នៅថ្ងៃទី១៤ ខែសីហា ឆ្នាំ២០២១។
កាលពីថ្ងៃទី១៦ ខែវិច្ឆិកា ឆ្នាំ២០១៧ តុលាការកំពូលបានចេញដីការំលាយគណបក្សសង្គ្រោះជាតិ និងដកហូតសិទ្ធិធ្វើនយោបាយរយៈពេល៥ឆ្នាំពីមន្រ្តីក្នុងជួរថ្នាក់ដឹកនាំរបស់គណបក្សចំនួន១១៨រូប។
យ៉ាងណា គិតត្រឹមថ្ងៃទី២៨ ខែតុលា ឆ្នាំ២០២១នេះ ក្នុងចំណោមមន្រ្តីទាំងនោះប្រមាណជាជាង២០រូបហើយបានសុំសិទ្ធិធ្វើនយោបាយឡើងវិញ និងមានមួយចំនួនបានបង្កើតគណបក្សថ្មីៗជាបន្តបន្ទាប់ ដើម្បីត្រៀមប្រកួតក្នុងការបោះឆ្នោតជាមួយបក្សកាន់អំណាចនៅពេលខាងមុខ៕
