ក្រសួងធនធានទឹក និងឧតុនិយម ឱ្យដឹងថា កម្ពុជានឹងចុះត្រជាក់ក្នុងរង្វង់២០-២២អង្សា រយៈពេលមួយសប្ដាហ៍ ដោយគិតចាប់ពីថ្ងៃទី៩ ដល់ថ្ងៃទី១៥ ខែវិច្ឆិកា ឆ្នាំ២០២១។
សេចក្ដីប្រកាសព័ត៌មានរបស់ក្រសួងធនធានទឹក នៅថ្ងៃទី០២ ខែវិច្ឆិកា ឆ្នាំ២០២១ បានឱ្យដឹងថា កម្ពុជានឹងទទួលឥទ្ធិលចំនួន៣ជាបន្តបន្ទាប់ ដូចជា ឥទ្ធិពលសម្ពាធខ្ពស់ចិន ចាប់ពីថ្ងៃទី៣ ដល់ថ្ងៃទី៤ ខែវិច្ឆិកា, ឥទ្ធិពលជ្រលងសម្ពាធទាបប៉ាស៊ីហ្វិក ចាប់ពីថ្ងៃទី៥ ដល់ថ្ងៃទី៨ ខែវិច្ឆិកា និងឥទ្ធិពលពីមូសុងឦសានក្នុងកម្រិតមធ្យម ដែលអាចធ្វើឱ្យសីតុណ្ហភាពអប្បបរមាធ្លាក់ចុះរយៈពេលមួយសប្ដាហ៍ ក្នុងរង្វង់២០-២២អង្សា រួមទាំងខ្យល់ត្រជាក់បក់ពីទិសឦសានផងដែរ។
ស្ថានភាពនេះ ក្រសួងថា នឹងធ្វើឱ្យបណ្ដាខេត្តនៅទំនាបកណ្ដាលអាចមានភ្លៀងលាយឡំផ្គរ រន្ទះ ក្នុងកម្រិតខ្សោយទៅមធ្យម ក្នុងនោះ បណ្ដាខេត្ត-រាជធានីនៅផ្នែកខាងក្រោម និងខេត្តជាប់ព្រំប្រទល់ជាមួយប្រទេសវៀតណាម នឹងអាចមានភ្លៀងធ្លាក់លាយឡំជាមួយផ្គរ រន្ទះ ពីកម្រិតតិចទៅបង្គួរ។ ដោយឡែក បណ្ដាខេត្តជាប់ជួរភ្នំដងរែក និងខ្ពង់រាបឦសាន អាចមានភ្លៀងតិចតួច និងតំបន់មាត់សមុទ្រអាចមានភ្លៀងក្នុងកម្រិតពីខ្សោយទៅបង្គួរ។
កាលពីថ្ងៃទី០៨ ខែមករា ឆ្នាំ២០២១ ក្រសួងធនធានទឹក និងឧតុនិយម ធ្លាប់ចេញសេចក្ដីជូនដំណឹងម្ដងរួចមកហើយអំពីការចុះត្រជាក់នៅកម្ពុជា ដោយធ្លាក់ចុះដល់១១អង្សាទៅ១៣អង្សា សម្រាប់តំបន់ជួរភ្នំដងរែក និងតំបន់ខ្ពង់រាបភាគឦសាន៕
