អ្នកនាំពាក្យក្រសួងការបរទេសអ៊ីរ៉ង់ បានឱ្យដឹងថា រដ្ឋមន្ត្រីការបរទេសរបស់ខ្លួន គឺលោក ហូសេន អាមៀអាប់ឌុលឡាហៀន (Hossein Amirabdollahian) បានឆ្លងវីរុសកូវីដ-១៩ បន្ទាប់ពីទទួលបានលទ្ធផលតេស្តវិជ្ជមាននៃវីរុសនេះ។
ទីភ្នាក់ងារសារព័ត៌មាន Reuters បានស្រង់សម្ដីអ្នកនាំពាក្យក្រសួងការបរទេស លោក Saeed Khatibzadeh ដែលបានថ្លែងប្រាប់ប្រព័ន្ធផ្សព្វផ្សាយរដ្ឋ កាលពីយប់ថ្ងៃចន្ទថា៖ «បច្ចុប្បន្ន ស្ថានភាពសុខភាពទូទៅរបស់លោក អាមៀអាប់ឌុលឡាហៀន គឺល្អធម្មតា ខណៈដែលលោកនៅតែអាចបន្តធ្វើការងារបានពីកន្លែងដែលរូបលោកត្រូវបានដាក់ឱ្យនៅដាច់ដោយឡែកពីគេ»។
ទាក់ទិននឹងករណីនេះ អ្នកនាំពាក្យដដែលបន្ថែមថា របៀបវារៈនៃដំណើរទស្សនកិច្ចរបស់លោករដ្ឋមន្ត្រីនៅពេលខាងមុខ ក៏មានការផ្លាស់ប្តូរផងដែរ។
ក្រសួងការបរទេសអ៊ីរ៉ង់ បានរាយការណ៍កាលពីព្រឹកថ្ងៃចន្ទថា លោក ហូសេន អាមៀអាប់ឌុលឡាហៀន គ្រោងនឹងធ្វើដំណើរទៅកាន់ប្រទេសឥណ្ឌា នៅចុងខែវិច្ឆិកានេះ ដើម្បីចូលរួមក្នុងកិច្ចប្រជុំគណៈកម្មការសេដ្ឋកិច្ចរួម ឥណ្ឌូ-អ៊ីរ៉ង់ (Indo-Iranian Joint Economic Commission)។
ទោះជាយ៉ាងណា គ្មានការបញ្ជាក់បន្ថែមណាមួយពីលោក Saeed Khatibzadeh ថាតើរដ្ឋមន្ត្រីការបរទេសរូបនេះនឹងអាចធ្វើដំណើរទៅចូលរួមក្នុងកិច្ចប្រជុំខាងលើនេះបានតាមការគ្រោងទុកឬយ៉ាងណានោះទេ៕