ចៅក្រមស៊ើបសួរសាលាដំបូងខេត្តក្រចេះ សម្រេចឃុំខ្លួនមេបញ្ជាការ និងមេបញ្ជាការរងកងរាជអាវុធហត្ថក្រុងក្រចេះ ជាបណ្ដោះអាសន្ន ដោយចោទពី «បទប្រើហិង្សាដោយចេតនា បទទារុណកម្ម និងអំពើឃោរឃៅ មានស្ថានទម្ងន់ទោស» ដែលប្រព្រឹត្តទៅលើកុមារី២នាក់ កាលពីចុងខែតុលាកន្លងទៅ។
ក្នុងដីកាបង្គាប់ឱ្យឃុំខ្លួនពីរដាច់ដោយឡែកពីគ្នារបស់ចៅក្រមស៊ើបសួរសាលាដំបូងខេត្តក្រចេះ លោក ឡេង ស៊ុនសុជាតិ កាលពីថ្ងៃទី១ ខែវិច្ឆិកា ឆ្នាំ២០២១ បានសម្រេចឃុំខ្លួនមេបញ្ជាការកងរាជអាវុធហត្ថក្រុងក្រចេះ លោក ទេព ហ៊ុយ និងមេបញ្ជាការរងកងរាជអាវុធហត្ថក្រុងក្រចេះ លោក គឹម សុវណ្ណរិទ្ធ ដើម្បីធ្វើការស៊ើបសួរបន្ត ក្នុងសំណុំរឿងហិង្សាដោយចេតនាទៅលើក្មេងស្រី២នាក់ដែលជាអ្នកបម្រើការងារនៅក្នុងផ្ទះ។
សេចក្ដីប្រកាសព័ត៌មានរបស់សាលាដំបូង និងអយ្យការអមសាលាដំបូងខេត្តក្រចេះ កាលពីម្សិលមិញ អះអាងថា លោក ទេព ហ៊ុយ អាយុ៤២ឆ្នាំ ត្រូវបានចោទ៣បទល្មើស រួមមាន ទារុណកម្ម និងអំពើឃោរឃៅមានស្ថានទម្ងន់ទោស ហិង្សាដោយចេតនាមានស្ថានទម្ងន់ទោស និងគំរាមកំហែងថានឹងសម្លាប់ តាមបញ្ញត្តិមាត្រា២១១, ២១៩, ២៣៣ នៃក្រមព្រហ្មទណ្ឌកម្ពុជា។
ប្រភពដដែលបន្តថា ចំណែកមេបញ្ជាការរងកងរាជអាវុធហត្ថក្រុងក្រចេះ លោក គឹម សុវណ្ណរិទ្ធ ដែលជាគូកននោះ ត្រូវបានចោទពី «បទហិង្សាដោយចេតនា មានស្ថានទម្ងន់ទោស» តាមបញ្ញត្តិមាត្រា២១៩ នៃក្រមព្រហ្មទណ្ឌ។
អយ្យការអមសាលាដំបូងខេត្តសរសេរថា៖ «បន្ទាប់ពីទទួលបានសំណុំរឿងខាងលើ ចៅក្រមស៊ើបសួរបានចាត់ការតាមនីតិវិធី និងសម្រេចឃុំខ្លួនបណ្ដោះអាសន្នលើជនត្រូវចោទ ឈ្មោះ ទេព ហ៊ុយ តាមដីកាបង្គាប់ឱ្យឃុំខ្លួនលេខ ២៦៣ ឃ.ខ ចុះថ្ងៃទី០១ ខែវិច្ឆិកា ឆ្នាំ២០២១ និងឈ្មោះ គឹម សុវណ្ណរិទ្ធ ភេទប្រុស អាយុ៤០ឆ្នាំ តាមដីកាបង្គាប់ឱ្យឃុំខ្លួនលេខ ២៦៤ ឃ.ខ ចុះថ្ងៃទី០១ ខែវិច្ឆិកា ឆ្នាំ២០២១ នៅពន្ធនាគារខេត្តក្រចេះ ដើម្បីធ្វើការស៊ើបសួរបន្ត»។
ស្ត្រីម្នាក់ដែលអះអាងថាជាម្ដាយរបស់កុមារីរងអំពើហិង្សាម្នាក់ក្នុងចំណោម២នាក់ អ្នកស្រី គិន សុខ ប្រាប់ វីអូឌី នៅថ្ងៃទី២ ខែវិច្ឆិកានេះថា គាត់មិននឹកស្មានថាមានការអន្តរាគមន៍ពីអាជ្ញាធរពាក់ព័ន្ធនោះទេ ដោយគិតថាគ្រួសារខ្លួនក្រីក្រ ខណៈជនបង្កនិងសាច់ញាតិវិញសុទ្ធតែជាអ្នកមានមុខតំណែងនិងតួនាទីធំៗក្នុងជួររដ្ឋាភិបាល។
យ៉ាងណា អ្នកស្រីថា គ្រួសាររបស់គាត់នៅតែមានការព្រួយបារម្ភខ្លះដែរ ដោយសារមានជនមិនស្គាល់អត្តសញ្ញាណជិះតាមពីក្រោយនិងក្រវែលមុខផ្ទះ ក្រោយពីថ្ងៃមានបញ្ហាជាមួយមេប៉េអឹមក្រុងមក។
អ្នកស្រី គិន សុខ និយាយថា៖ «ពួកខ្ញុំឈប់ គេឈប់! ពួកខ្ញុំជិះមក គេតាមពីក្រោយ។ ដល់ពេលខ្ញុំឈប់ទៀត គេឈប់ទៀតដែរ! អ៊ីចឹងពួកខ្ញុំមានអារម្មណ៍អត់ស្រួលទេ មានគេតាមយើងហើយ។ អារម្មណ៍ខ្ញុំខ្លាចថា គេធ្វើសកម្មភាពមិនឱ្យយើងដឹង! តែអានេះ ពួកខ្ញុំមិនបានចោទប្រកាន់គេទេ! យើងមិនដឹងដូចគ្នា តែតាំងពីមានរឿងជាមួយគាត់មក មានម៉ូតូតាមដានសកម្មភាពពួកខ្ញុំ មិនថាចេញឬចូលផ្ទះថ្មើរណា»។
អ្នកស្រីបន្តថា យុត្តិធម៌ដែលគាត់ចង់បាន គឺចង់ឃើញជនបង្កត្រូវបានផ្ដន្ទាទោសតាមច្បាប់ និងផ្ដល់សំណងសមរម្យដល់គ្រួសារពួកគាត់ដែលជាជនរងគ្រោះ។
ប្រធានសមាគមការពារសិទ្ធិមនុស្សអាដហុក លោក នី សុខា សាទរចំពោះការឃុំខ្លួនជនបង្ក ដោយថា ករណីនេះជាបទល្មើសព្រហ្មទណ្ឌ ដែលសមត្ថកិច្ចត្រូវតែចាត់វិធានការតាមនីតិវិធី។ យ៉ាងណា លោកថា នឹងរង់ចាំមើលតទៅទៀត ដើម្បីឱ្យប្រាកដថា តុលាការចាត់ការស្របតាមច្បាប់ និងចៀសវាងនិទណ្ឌភាពកើតមានឡើង។
លោកបន្តថា៖ «បើសិនជាមានការតាមអ៊ីចឹង ហើយគាត់មានអារម្មណ៍ចម្លែកក្នុងខ្លួន ហើយគាត់មិនទុកចិត្តពីសុវត្ថិភាពខ្លួនឯង គាត់គួរតែរាយការណ៍ប្រាប់ទៅសមត្ថកិច្ចនិងអង្គការផ្សេងៗដែលមានការពាក់ព័ន្ធ ដើម្បីឱ្យគេជួយតាមដាននិងជួយការពារសុវត្ថិភាពគាត់»។
លោក នី សុខា ថាដើម្បីបញ្ចៀសករណីហិង្សាលើកុមារបែបនេះទៀត រដ្ឋាភិបាលគួរពិនិត្យឡើងវិញនូវអនុសញ្ញាស្ដីពី សិទ្ធិកុមារ ដែលរដ្ឋាភិបាលកម្ពុជាក៏បានចុះហត្ថលេខាជាសមាជិកនៃអនុសញ្ញានោះផងដែរ។ លោកថា ការយកកុមារទៅប្រើប្រាស់ក្នុងន័យមួយដែលហួសពីលទ្ធភាព គឺជារឿងត្រូវចៀសវាង ហើយរដ្ឋាភិបាលត្រូវចាត់វិធានការច្បាប់លើអ្នករំលោភសិទ្ធិកុមារទាំងនោះឱ្យខានតែបានផងដែរ៕