ក្រសួងការពារជាតិតៃវ៉ាន់ បានឱ្យដឹងនៅថ្ងៃអង្គារនេះថា ខ្លួននឹងជំរុញការហ្វឹកហ្វឺនកងកម្លាំងបម្រុងរបស់ខ្លួនបន្ថែមទៀតនៅឆ្នាំក្រោយ ដែលរួមទាំងការពង្រឹងលំហាត់ប្រយុទ្ធនិងបាញ់ ខណៈប្រទេសចិនបានបង្កើនសកម្មភាពយោធានានានៅជិតដែនកោះរបស់ខ្លួន។
ភាពតានតឹងរវាងតៃវ៉ាន់ និងចិន បានកើនឡើងក្នុងរយៈពេលប៉ុន្មានសប្ដាហ៍ថ្មីៗនេះ ខណៈចិនបានព្យាយាមបង្កើនសម្ពាធយោធាមួយចំនួន រួមមាន សកម្មភាពពីសំណាក់កងទ័ពអាកាសរបស់ខ្លួនម្ដងហើយម្ដងទៀតនៅក្នុងដែនអាកាសតៃវ៉ាន់។
កាលពីខែមុន រដ្ឋមន្ត្រីក្រសួងការពារជាតិតៃវ៉ាន់ លោក Chiu Kuo-cheng ធ្លាប់ចាត់ទុកស្ថានភាពនេះថាជាករណី «ធ្ងន់ធ្ងរបំផុត» ក្នុងរយៈពេលជាង៤០ឆ្នាំ ហើយលោកក៏បានជំរុញឱ្យមានការចំណាយលើវិស័យយោធាបន្ថែមទៀតផងដែរ។
ទីភ្នាក់ងារសារព័ត៌មាន Reuters បានស្រង់ការលើកឡើងរបស់ក្រសួងការពារជាតិតៃវ៉ាន់ ដែលបានឱ្យដឹងនៅក្នុងសេចក្ដីថ្លែងការណ៍មួយថា ចាប់ពីឆ្នាំក្រោយទៅ ការហ្វឹកហ្វឺនបន្ថែមដែលជាកាតព្វកិច្ចសម្រាប់កងកម្លាំងបម្រុងមួយចំនួន នឹងត្រូវបង្កើនដល់រយៈពេល១៤ថ្ងៃ ពី៥ទៅ៧ថ្ងៃនាពេលបច្ចុប្បន្ន ដើម្បីបង្កើនសមត្ថភាពប្រយុទ្ធប្រកបដោយប្រសិទ្ធភាពនៃកងកម្លាំងបម្រុងរបស់ខ្លួន។
សេចក្ដីថ្លែងការណ៍ដដែលបន្តថា ការបន្ថែមរយៈពេលនៃការហ្វឹកហ្វឺននេះក៏នឹងត្រូវបង្កើនការចំណាយទ្វេដងលើចំនួនគ្រាប់កាំភ្លើងដែលពួកគេត្រូវបាញ់ក្នុងសមយុទ្ធនានារបស់ពួកគេផងដែរ។
គួរបញ្ជាក់ថា ប្រទេសចិននៅតែបន្តអះអាងថា កោះតៃវ៉ាន់គឺជាទឹកដីរបស់ខ្លួន ហើយបាននិងកំពុងបង្កើនសម្ពាធកាន់តែខ្លាំងឡើងលើដែនកោះមួយនេះ ខណៈដែលសកម្មភាពរបស់ចិននេះក៏ត្រូវបានថ្កោលទោសដោយអន្តរជាតិផងដែរ៕
