សាលាដំបូងខេត្តសៀមរាប ចេញដីកាកោះហៅជនសង្ស័យ៤រូបនិងបក្ខពួកឱ្យបង្ហាញខ្លួននៅតុលាការ ដើម្បីឆ្លើយបំភ្លឺពីដំណើររឿងហិង្សាដោយចេតនាមានស្ថានទម្ងន់ទោស ប្រព្រឹត្តនៅក្នុងស្រុកសូទ្រនិគម កាលពីជាង៧ខែមុន ទៅលើអ្នកសារព័ត៌មាន។
កាលពីថ្ងៃទី២៩ ខែមីនា ឆ្នាំ២០២១ អ្នកសារព័ត៌មាន៣រូបបានចុះទៅថតរូបកន្លែងបើកឱ្យលេងល្បែងបៀរខុសច្បាប់មួយកន្លែង នៅភូមិឈូក ឃុំខ្នារពោធិ៍ ស្រុកសូទ្រនិគម ខេត្តសៀមរាប។ ក៏ប៉ុន្តែនៅពេលចុះថត អ្នកសារព័ត៌មានទាំងនោះត្រូវបានមនុស្សមានគ្នាពី៦ទៅ៧នាក់ព្រួតវាយនិងដកហូតយកកាមេរ៉ា ដែលហិង្សានៅពេលនោះបង្កឱ្យអ្នករាយការណ៍ព័ត៌មានឱ្យទូរទស្សន៍ BTV ឈ្មោះ បូ សាវី រងរបួស ខណៈអ្នកសារព័ត៌មាន២នាក់ទៀតនៅស្ថាប័នផ្សេងគ្នា គេចផុតពីការប្រើអំពើហិង្សានេះ។ លោក បូ សាវី ដែលជាជនរងគ្រោះ បានដាក់ពាក្យបណ្ដឹងទៅស្ថាប័នពាក់ព័ន្ធ ស្វែងរកយុត្តិធម៌ចាប់ពីពេលនោះមក។
តាមដីកាកោះ ចុះថ្ងៃទី២៥ ខែកញ្ញា ឆ្នាំ២០២១ ដែលចេញដោយចៅក្រមស៊ើបសួរសាលាដំបូងខេត្តសៀមរាប លោក នូ វាសនា បានបញ្ជាក់ថា ការកោះហៅនេះ «ដើម្បីឆ្លើយបំភ្លឺពីដំណើរឿងហិង្សាដោយចេតនាមានស្ថានទម្ងន់ទោស និងបើកកន្លែងលេងល្បែងស៊ីសងខុសច្បាប់ ប្រព្រឹត្តនៅចំណុចទួលត្រពាំងតាតែ ភូមិឈូក ស្រុកសូទ្រនិគម» ហើយអ្នកទាំង៤ ត្រូវចូលបំភ្លឺនៅរសៀលថ្ងៃទី១០ ខែវិច្ឆិកា ឆ្នាំ២០២១។
បើតាមដីកាកោះដដែល បុរសជាជនសង្ស័យដែលត្រូវចូលបំភ្លឺនោះ រួមមាន ឈ្មោះ ជា ស៊ាង អាយុ៥១ឆ្នាំ, ព្រឿន ប្រី អាយុ៤៩ឆ្នាំ និងបក្ខពួក រួមទាំងឈ្មោះ វឿន វ៉ាត់ អាយុ៤១ឆ្នាំ ពួកគេរស់នៅក្នុងខេត្តសៀមរាបទាំងអស់គ្នា។
បុរសទាំង៤នាក់ដែលតុលាការកោះហៅ មិនអាចរកការបញ្ជាក់បាននៅឡើយទេ គិតត្រឹមថ្ងៃពុធនេះ។
អ្នកនាំពាក្យសាលាដំបូងខេត្តសៀមរាប លោក យិន ស្រាង មានប្រសាសន៍ថា តុលាការពិតជាបានកោះហៅជនត្រូវចោទទាំងនោះមែន ប៉ុន្តែនៅពេលសួរថា តើតុលាការបានទទួលដំណឹងថាបុរសទាំងនោះនឹងបង្ហាញខ្លួននៅតុលាការតាមដីកាកោះនេះទេ លោកថា «នេះជាសិទ្ធិរបស់ជនត្រូវចោទ»។
អ្នកសារព័ត៌មាននៅទូរទស្សន៍ BTV និងជាដើមបណ្ដឹង លោក បូ សាវី អះអាងថា លោកចង់ឃើញជនដៃដល់ដែលព្រួតគ្នាវាយលោក ត្រូវបានកាត់ទោសតាមច្បាប់ ខណៈលោកកំពុងព្រួយបារម្ភពីសុវត្ថិភាព ដោយសារតែជនដៃដល់នៅមានសេរីភាពនៅឡើយ។
លោកថា៖ «អ៊ីចឹង ខ្ញុំក៏ចង់បាននូវភាពយុត្តិធម៌ដែរ ហើយស្នើឱ្យតុលាការហ្នឹងមានវិធានការច្បាប់ឱ្យបានត្រឹមត្រូវ ដើម្បីជាគំរូមួយលើកទឹកចិត្តដល់អ្នកសារព័ត៌មានដែលបានបំពេញការងារជូនប្រជាពលរដ្ឋ»។
នាយកប្រតិបត្តិសមាគមសម្ព័ន្ធអ្នកសារព័ត៌មានកម្ពុជា (ខេមបូចា) លោក ណុប វី មានប្រសាសន៍ថា ជាសញ្ញាវិជ្ជមានមួយដែលតុលាការខេត្តសៀមរាបបានកោះហៅជនដៃដល់មកសាកសួរ បើទោះបីជាលោកគិតថា បញ្ហានេះវាបានអូសបន្លាយជាង៧ខែមកហើយក្ដី។ មួយវិញទៀត លោកថា ការនាំខ្លួនជនប្រព្រឹត្តបទល្មើសមកផ្ដន្ទាទោស ក៏ជាសញ្ញាវិជ្ជមានមួយដែរដើម្បីធានាដល់យុត្តិធម៌សង្គម។
តែលោកថា៖ «បើនៅក្នុងករណីនិទណ្ឌភាពនៅតែមាន មានន័យថា អ្នកដែលប្រព្រឹត្តល្មើសច្បាប់ហ្នឹងនៅតែហ៊ានប្រព្រឹត្តបទល្មើសផ្សេងៗទៀត ដោយមិនខ្លាចញញើតច្បាប់ នៅទីបំផុតគឺយើងទាំងអស់គ្នាទេដែលទទួលរងផលប៉ះពាល់ពីអំពើនិទណ្ឌភាពទាំងអស់ហ្នឹង»។
កាលពីថ្ងៃទី២ ខែវិច្ឆិកា ឆ្នាំ២០២១ ក្រុមអង្គការសមាគមចំនួន៩ ក្នុងនោះ មានទាំងមជ្ឈមណ្ឌលសិទ្ធិមនុស្សកម្ពុជា (CCRH) សមាគមកម្ពុជាដើម្បីការពារអ្នកកាសែត (CAPJ) សមាគមសម្ព័ន្ធអ្នកសារព័ត៌មានកម្ពុជា (ខេមបូចា) និងមជ្ឈមណ្ឌលសម្ព័ន្ធភាពការងារនិងសិទ្ធិមនុស្ស ផងដែរ បានចេញសេចក្ដីថ្លែងការណ៍រួមមួយអំពាវនាវឱ្យអាជ្ញាធររដ្ឋបង្កើនការប្រយុទ្ធប្រឆាំងនឹងនិទណ្ឌភាពលើឧក្រិដ្ឋកម្មប្រឆាំងអ្នកសារព័ត៌មាន។
សេចក្ដីថ្លែងការណ៍នោះបញ្ជាក់ថា ចាប់តាំងពីឆ្នាំ១៩៩៤មក អ្នកសារព័ត៌មានចំនួន១៧នាក់ត្រូវបានសម្លាប់ ក្នុងនោះមាន១២ករណី ដែលអ្នកប្រព្រឹត្តបទល្មើសមិនត្រូវបាននាំយកមកផ្តន្ទាទោសនោះទេ។
សេចក្ដីថ្លែងការណ៍នោះបន្តទៀតថា ក្នុងរយៈពេល១០ខែ ចាប់ពីខែមករា ដល់ខែតុលា ឆ្នាំ២០២១នេះ មានអ្នកសារព័ត៌មានសរុប៨១នាក់បានរងនូវការធ្វើទុក្ខបុកម្នេញ ក្នុងនោះអ្នកសារព័ត៌មាន ៣១នាក់ត្រូវបានឃាត់ខ្លួន ២០នាក់រងការប្រើអំពើហិង្សា ១៦នាក់រងការគំរាមកំហែង ៨នាក់រងពាក្យបណ្ដឹងពីតុលាការ ៥នាក់ត្រូវបានឃាត់ខ្លួនដើម្បីសួរចម្លើយពីសំណាក់អាជ្ញាធរ និងអ្នកសារព័ត៌មានជាស្ត្រីម្នាក់រងការបៀតបៀនផ្លូវភេទ។
ក្រុមអង្គការទាំងនោះរម្លឹកថា អ្នកសារព័ត៌មានមានបេសកកម្មយ៉ាងសំខាន់ ចូលរួមការពារប្រយោជន៍សាធារណៈ ជំរុញតម្លាភាពសង្គម និងអភិបាលកិច្ចល្អ។
តែយ៉ាងណា បើយោងតាមសន្ទស្សន៍សេរីភាពសារព័ត៌មានឆ្នាំ២០២១ ដែលផ្ដល់ចំណាត់ថ្នាក់ដោយអង្គការអ្នកកាសែតគ្មានព្រំដែន (Reporters Without Borders) កម្ពុជាជាប់ចំណាត់ថ្នាក់លេខ១៤៤ ក្នុងចំណោមប្រទេសចំនួន១៨០ ដែលចំណាត់ថ្នាក់នេះ សេរីភាពសារព័ត៌មាននៅកម្ពុជា បន្តធ្លាក់ចុះជាបន្តបន្ទាប់ចាប់ពីឆ្នាំ២០១៧មក៕
