គណបក្សប្រជាជនកម្ពុជា បានតែងតាំងលោក ឃួង ស្រេង អភិបាលរាជធានីភ្នំពេញ ជាប្រធានគណៈកម្មាធិការគណបក្សនេះ ប្រចាំនៅរាជធានីភ្នំពេញ។
យោងតាមសេចក្ដីសម្រេចស្ដីពីការតែងតាំងដំឡើងឋានៈមន្រ្តីគណបក្ស ដែលចុះហត្ថលេខាដោយលោកនាយករដ្ឋមន្ត្រី ហ៊ុន សែន ប្រធានគណបក្សប្រជាជនកម្ពុជា នៅថ្ងៃទី១ ខែវិច្ឆិកា ឆ្នាំ២០២១ បានសម្រេចតែងតាំងដំឡើងឋានៈលោក ឃួង ស្រេង ពីអនុប្រធានគណៈកម្មាធិការគណបក្ស ទៅជាប្រធានគណៈកម្មាធិការគណបក្សនេះ ប្រចាំរាជធានីភ្នំពេញ។
ការតែងតាំងលោក ឃួង ស្រេង ពីអនុប្រធានទៅជាប្រធានគណៈកម្មាធិការគណបក្សប្រជាជនកម្ពុជានៅរាជធានីភ្នំពេញនេះ ធ្វើឡើងក្រោយពីអតីតប្រធានគណៈកម្មាធិការគណបក្សនេះ លោក ប៉ា សុជាតិវង្ស ត្រូវបានរដ្ឋសភាបោះឆ្នោតជាសមាជិកថ្មីនៃរដ្ឋាភិបាលក្នុងឋានៈជា «ទេសរដ្ឋមន្ត្រីទទួលបេសកកម្មពិសេស» កាលពីចុងខែតុលាថ្មីៗនេះ៕
