ក្រសួងអប់រំ យុវជន និងកីឡា នឹងពិនិត្យលើកពេលការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប ទៅដើមឆ្នាំ២០២២វិញ ដើម្បីទុកឱកាសជូនសិស្សថ្នាក់ទី១២មានពេលវេលាបន្ថែមសម្រាប់រៀនសូត្រត្រៀមប្រឡង។
អ្នកនាំពាក្យក្រសួងអប់រំ យុវជន និងកីឡា លោក រស់ សុវាចា បានគូសបញ្ជាក់នៅល្ងាចថ្ងៃទី៣ ខែវិច្ឆិកាថា នៅក្នុងសប្ដាហ៍នេះ ថ្នាក់ដឹកនាំក្រសួងនឹងប្រជុំវាយតម្លៃលើស្ថានការណ៍ពាក់ព័ន្ធ ដើម្បីកំណត់ពីការរៀបចំការប្រឡងបាក់ឌុប ដោយក្រសួងនឹងជូនដំណឹងនៅពេលក្រោយ។
ថ្មីៗនេះ ក្រសួងអប់រំ បានកំណត់យកថ្ងៃទី៦ ខែធ្នូ ឆ្នាំ២០២១ ជាសម័យប្រឡងបាក់ឌុប ដោយប្រធានមន្ទីរអប់រំ យុវជន និងកីឡា ត្រូវធ្វើសំណើមណ្ឌលប្រឡងដាក់ជូនរដ្ឋមន្ត្រី ដើម្បីពិនិត្យនិងសម្រេចតាមឋានានុក្រម។
រដ្ឋមន្រ្តីក្រសួងអប់រំ យុវជន និងកីឡា លោក ហង់ ជួនណារ៉ុន បានថ្លែងនៅពេលចុះទស្សនកិច្ច និងសម្ពោធវិទ្យាស្ថានស្រាវជ្រាវសេដ្ឋកិច្ចអាស៊ាន នៃសាកលវិទ្យាល័យជាតិគ្រប់គ្រង នៅថ្ងៃនេះថា ការប្រឡងសញ្ញាបត្របាក់ឌុប គឺត្រូវតែប្រឡងសម្រាប់ឆ្នាំនេះ ដោយមិនមានការអនុគ្រោះឱ្យជាប់ដោយស្វ័យប្រវត្តិដូចឆ្នាំមុននោះទេ៕
