ក្រសួងសុខាភិបាល បានអនុញ្ញាតឱ្យប្រើប្រាស់ឱសថ Molnupiravir សម្រាប់ព្យាបាលជំងឺកូវីដ-១៩ ក្នុងលក្ខខណ្ឌបន្ទាន់។
យោងតាមសេចក្ដីប្រកាសរបស់ក្រសួងសុខាភិបាលនៅថ្ងៃនេះ បានឱ្យដឹងថា ឱសថ Molnupiravir ជាប្រភេទឱសថគ្រាប់ ប្រើលេបតាមមាត់ ដើម្បីប្រឆាំងនឹងមេរោគកូវីដ-១៩ (Antiviral) ដែលមានសុវត្ថិភាពនិងប្រសិទ្ធភាពខ្ពស់សម្រាប់ព្យាបាលជំងឺកូវីដ-១៩ (COVID-19)។ ក្រសួងបន្តថា ឱសថនេះផលិតដោយក្រុមហ៊ុន MyLan Laboratories Limited ដែលមានអាសយដ្ឋាននៅក្នុងប្រទេសឥណ្ឌា។
បើទោះបីជាមានប្រសិទ្ធភាពខ្ពស់ក្ដី តែក្រសួងសុខាភិបាលបានបញ្ជាក់ពីលក្ខខណ្ឌនៃការប្រើប្រាស់ថា គឺប្រើតែក្នុងអំឡុងពេលគ្រោះអាសន្នសុខភាពសាធារណៈនៃជំងឺកូវីដ- ១៩ ដែលកំពុងកើតមាន និងជាជម្រើសនៃការព្យាបាល ដែលស្ថិតក្រោមការស្រាវជ្រាវនិងវាយតម្លៃ និងប្រើក្រោមអាទិភាពរបស់រដ្ឋាភិបាលដែលមានចែងក្នុងផែនការដាក់ពង្រាយឱសថជាតិបច្ចុប្បន្ន និងក្រុមមនុស្សអាទិភាពប៉ុណ្ណោះ។
កាលពីថ្ងៃទី២៩ ខែតុលា ក្រសួងសុខាភិបាលក៏បានប្រកាសអនុញ្ញាតឱ្យកម្ពុជាប្រើប្រាស់វ៉ាក់សាំងការពារជំងឺកូវីដ-១៩ ផលិតនៅប្រទេសរុស្ស៊ី ឈ្មោះ Sputnik V ក្នុងលក្ខខណ្ឌបន្ទាន់ផងដែរ៕
