អភិបាលរាជធានីភ្នំពេញ បញ្ជាដល់អាជ្ញាធរគ្រប់លំដាប់ថ្នាក់ទាំងអស់ត្រូវអនុវត្តវិធានការឱ្យបានម៉ឺងម៉ាត់ ដោយបន្តហាមបើកអាជីវកម្មខារ៉ាអូខេនិងក្លឹបកម្សាន្តនៅក្នុងភូមិសាស្រ្តរាជធានីភ្នំពេញ ដើម្បីទប់ស្កាត់ការឆ្លងរាលដាលនៃជំងឺកូវីដ-១៩។
ក្នុងកិច្ចប្រជុំស្ដីពីការជំរុញការងារចាក់វ៉ាក់សាំងបង្ការជំងឺកូវីដ-១៩ ទាំងដូសមូលដ្ឋាន និងដូសជំរុញ កាលពីម្សិលមិញ អភិបាលរាជធានីភ្នំពេញ លោក ឃួង ស្រេង បានថ្លែងតាមរយៈ Video Conference ថារាជរដ្ឋាភិបាលបានបើកប្រទេសឱ្យដំណើរការឡើងវិញលើគ្រប់វិស័យ លើកលែងតែក្លឹបកម្សាន្តនិងខារ៉ាអូខេ ដែលនៅមិនទាន់អនុញ្ញាតឱ្យបើកដំណើរការនោះទេ។
ករណីនេះ អភិបាលរាជធានីភ្នំពេញ ជំរុញទៅអាជ្ញាធរខណ្ឌទាំង១៤ និងកងកម្លាំងពាក់ព័ន្ធ ត្រូវអនុវត្តឱ្យបានម៉ឺងម៉ាត់បំផុតចំពោះការលួចបើកក្លឹបកម្សាន្តនិងខារ៉ាអូខេ ដោយសារទីតាំងទាំងពីរនេះ មានហានិភ័យខ្ពស់បំផុតនៃការឆ្លងរីករាលដាលជំងឺកូវីដ-១៩។
កាលពីដើមខែវិច្ឆិកានេះ ប្រមុខរដ្ឋាភិបាល លោក ហ៊ុន សែន បានប្រកាសបើកប្រទេសឡើងវិញ លើគ្រប់វិស័យ ចាប់ពីថ្ងៃទី១ ខែវិច្ឆិកា ឆ្នាំ២០២១តទៅ ដោយយោងទៅលើកត្តាសំខាន់ចំនួន៤ រួមមាន ការសម្រេចបានលទ្ធផលនៃការចាក់វ៉ាក់សាំងកូវីដ-១៩ ការពង្រឹងនិងពង្រីកសមត្ថភាពក្នុងការព្យាបាលជំងឺកូវីដ-១៩ ការឆ្លងកាត់បទពិសោធន៍នៃការគ្រប់គ្រងទប់ស្កាត់ការឆ្លងរាលដាលនៃជំងឺកូវីដ-១៩ ព្រមទាំងរបៀបគ្រប់គ្រងទប់ស្កាត់នៃជំងឺនេះក្នុងទ្រង់ទ្រាយធំ និងការយល់ដឹងរបស់ប្រជាពលរដ្ឋក្នុងការការពារខ្លួន និងការព្យាបាលជំងឺកូវីដ-១៩ ជាដើម។
យ៉ាងណា លោកនាយករដ្ឋមន្ត្រី ហ៊ុន សែន បានបញ្ជាទៅក្រសួងសុខាភិបាលឱ្យពង្រឹងសមត្ថភាពព្យាបាលជំងឺ-១៩ឡើងវិញ ក្រោយរកឃើញថា អត្រាភាគរយនៃអ្នកស្លាប់នៅកម្ពុជា ដោយសារជំងឺរលាកផ្លូវដង្ហើមធ្ងន់ធ្ងរនេះ ខ្ពស់ជាងបណ្ដាប្រទេសមួយចំនួន រួមទាំងប្រទេសថៃ និងវៀតណាម ដែលជាតួលេខមួយស្ថិតក្នុងការព្រួយបាម្ភនៅឡើយ ទាមទារឱ្យពង្រឹងសមត្ថភាពព្យាបាលឡើងវិញផងដែរ។
បើតាមក្រសួងសុខាភិបាល គិតត្រឹមព្រឹកថ្ងៃពុធនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន១១៨ ៧៨៧នាក់ ក្នុងនោះ អ្នកជំងឺព្យាបាលជាសះស្បើយចំនួន១១៥ ១១១នាក់ អ្នកស្លាប់កើនដល់ចំនួន២ ៨០៧នាក់ និងករណីនាំចូលពីក្រៅប្រទេសចំនួន១៩ ៦៥៤នាក់៕
