សាលាឧទ្ធរណ៍រាជធានីភ្នំពេញ បានលើកពេលប្រកាសសាលដីកាលើបណ្ដឹងសាទុក្ខរបស់មេធាវីការពារក្ដីឱ្យស្ថាបនិកចលនាមាតាធម្មជាតិ លោក អាឡិច ហ្គន់សាឡេស ដេវិតសុន (Alejandro Gonzalez-Davidson) ក្រោមការចោទប្រកាន់ពីបទ «សមគំនិតញុះញង់» ទៅថ្ងៃទី១២ ខែវិច្ឆិកាវិញ បន្ទាប់ពីតុលាការបានបើកសវនាការនៅព្រឹកមិញនេះ។
ប្រធានក្រុមប្រឹក្សាសាលាឧទ្ធរណ៍ លោក ប្លង់ សំណាង បានបើកសវនាការសួរដេញដោលមេធាវីការពារក្ដីឱ្យលោក អាឡិច ហ្គន់សាឡេស ដេវិតសុន ចំពោះការមិនសុខចិត្តទៅនឹងសេចក្ដីសម្រេចរបស់ចៅក្រមសាលាដំបូង។
ក្រោយពីសវនាការប្រហែល១ម៉ោង ប្រធានក្រុមប្រឹក្សាសាលាឧទ្ធរណ៍បានប្រកាសលើកពេលប្រកាសសាលដីកាសំណុំរឿងនេះទៅថ្ងៃទី១២ ខែវិច្ឆិកា ឆ្នាំ២០២១ខាងមុខនេះ។
មេធាវីការពារក្ដីឱ្យលោក អាឡិច គឺលោក សំ ចំរើន បានលើកឡើងនៅក្នុងបន្ទប់សវនាការថា ការផ្ដល់គំនិតទៅយុវជនឱ្យចូលរួមការពារបរិស្ថាននោះ មិនមែនជាបទល្មើសឡើយ។ លើសពីនេះ អ្វីដែលកូនក្ដីរបស់លោកបានផ្ដល់ទៅយុវជន ដើម្បីការពារផលប្រយោជន៍របស់ប្រទេសកម្ពុជា បើទោះបីជាកូនក្ដីរបស់លោកជាជនបរទេសក៏ពិតមែន។
លោកថា៖ «គ្រាន់តែផ្ដល់គំនិត ហើយត្រូវផ្ដន្ទាទោសបែបនេះ ប្រហែលជាលែងមានអ្នកផ្ដល់គំនិតយោបល់ហើយ ព្រោះគេខ្លាចប៉ះពាល់ […] សកម្មភាពរបស់អាឡិច មិនបានសមគំនិតក្នុងអំពើញុះញង់នោះទេ ហើយការងារដែលពួកគាត់ធ្វើនោះជាផលប្រយោជន៍របស់កម្ពុជា»។
កាលពីថ្ងៃទី៥ ខែឧសភា ឆ្នាំ២០២១ ចៅក្រមសាលាដំបូងរាជធានីភ្នំពេញ បានសម្រេចផ្ដន្ទាទោស ស្ថាបនិកចលនាមាតាធម្មជាតិ និងសកម្មជនមាតាធម្មជាតិ ៤នាក់ ដាក់ពន្ធនាគារចន្លោះពី១៨ទៅ២០ខែ ពាក់ព័ន្ធបទ «ញុះញង់ និងសមគំនិត»។ ក្រៅពីនេះ តុលាការក្រុងភ្នំពេញក៏បានកាត់ទោសសកម្មជនបរិស្ថាននៃចលនាមាតាធម្មជាតិ កញ្ញា ភួន កែវរស្មី និងកញ្ញា ឡុង គន្ធា ដែលមានវត្តមាននៅក្នុងសវនាការសាលាឧទ្ធរណ៍នៅព្រឹកមិញនេះ ព្រមទាំងកញ្ញា ជា គន្ធីន ដែលមិនមានវត្តមានក្នុងសវនាការឧទ្ធរណ៍នោះ ឱ្យជាប់ពន្ធនាគាររយៈពេល១៨ខែ និងពិន័យប្រាក់៤លានរៀលដូចគ្នា។
ចំណែកលោក ថុន រដ្ឋា ត្រូវផ្ដន្ទាទោសដាក់ពន្ធនាគារ២០ខែ និងពិន័យជាប្រាក់៤លានរៀល ឬប្រហែល១ ០០០ដុល្លារ ពីបទ «ញុះញង់រំខានដល់សន្តិសុខសង្គម» ខណៈស្ថាបនិកចលនាមាតាធម្មជាតិ លោក អាឡិច ហ្គន់សាឡេស ដេវិតសុន (Alejandro Gonzalez-Davidson) ត្រូវបានផ្ដន្ទាទោសដាក់ពន្ធនាគារ២០ខែ និងពិន័យជាប្រាក់៤លានរៀលពីបទ «សមគំនិតក្នុងរឿងញុះញង់»។
ស្ថាននិកចលនាមាតាធម្មជាតិ លោក អាឡិច ហ្គន់សាឡេស ដេវិតសុន (Alejandro Gonzalez-Davidson) ត្រូវបាននិរទេសចេញពីប្រទេសកម្ពុជាកាលពីឆ្នាំ២០១៥៕