ក្រុមសិទ្ធិមនុស្សជាង៥០០ស្ថាប័ន បានអំពាវនាវឱ្យក្រុមប្រឹក្សាសន្តិសុខអង្គការសហប្រជាជាតិ (United Nations Security Council) មានកិច្ចប្រជុំមួយ ដើម្បីបញ្ឈប់ការកើនឡើងនៃអំពើហិង្សានៅក្នុងរដ្ឋ Chin (Chin State) ប្រទេសមីយ៉ាន់ម៉ា ជាតំបន់ព្រំដែន ដែលបានក្លាយទៅជាតំបន់ជួរមុខមួយនៃការតស៊ូប្រឆាំងនឹងការគ្រប់គ្រងរបស់យោធា។
ការអំពាវនាវនេះត្រូវបានធ្វើឡើងបន្ទាប់ពីប្រព័ន្ធផ្សព្វផ្សាយក្នុងស្រុក ប្រជាពលរដ្ឋ និងអង្គការសហប្រជាជាតិ បានរាយការណ៍ជាបន្តបន្ទាប់អំពីការកើនឡើងនៃអាវុធធុនធ្ងន់ និងកងទ័ព នៅក្នុងរដ្ឋ Chin ដើម្បីកម្ចាត់ក្រុមជីវពលដែលបានបង្កើតឡើងក្រោយរដ្ឋប្រហារថ្ងៃទី១កុម្ភៈ។
អង្គការឃ្លាំមើលសិទិ្ធមនុស្ស (Human Rights Watch) បានចេញសេចក្ដីថ្លែងការណ៍មួយដែលតំណាងឱ្យអង្គការអន្តរជាតិ និងក្នុងស្រុក ចំនួន៥២១ ដោយអំពាវនាវដល់ក្រុមប្រឹក្សាសន្តិសុខឱ្យអនុម័តនូវដំណោះស្រាយ និងចាត់វិធានការណាមួយ មុនពេលដែលសកម្មភាពវាយប្រហារអាចនឹងកើនឡើងធ្ងន់ធ្ងរនៅក្នុងរដ្ឋ Chin ដែលមានព្រំប្រទល់ជាប់ប្រទេសឥណ្ឌា។
ទីភ្នាក់ងារសារព័ត៌មាន Reuters បានស្រង់សេចក្ដីថ្លែងការណ៍នោះយកមកចុះផ្សាយថា៖ «ក្រុមប្រឹក្សាសន្តិសុខត្រូវតែកោះប្រជុំជាបន្ទាន់មួយ ជុំវិញការវាយប្រហារកាន់តែខ្លាំងឡើងនៅក្នុងរដ្ឋChin និងវិបត្តិនយោបាយ សិទ្ធិមនុស្ស និងមនុស្សធម៌ជារួម ដែលបង្កឡើងដោយការស្វែងរកអំណាចនិងភាពលោភលន់របស់មេដឹកនាំយោធាមីយ៉ាន់ម៉ា»។
ទីភ្នាក់ងារមនុស្សធម៌របស់អង្គការសហប្រជាជាតិ នៅក្នុងរបាយការណ៍ស្ថានភាពមួយ កាលពីថ្ងៃពុធ ក៏បានឱ្យដឹងថា ការប៉ះទង្គិចគ្នារវាងកងកម្លាំងសន្តិសុខ និងកងកម្លាំងការពាររបស់ប្រជាជន មានការកើនឡើងកាន់តែខ្លាំងឡើងនៅក្នុងរដ្ឋ Chin ក៏ដូចជានៅក្នុងតំបន់ជិតខាង Magway និង Sagaing ផងដែរ។
ទាក់ទិននឹងករណីនេះ ទីភ្នាក់ងារសារព័ត៌មាន Reuters មិនអាចស្វែងរកការធ្វើអត្ថាធិប្បាយណាមួយពីរបបយោធាអំពីស្ថានការណ៍នៅក្នុងរដ្ឋ Chin នេះបាននោះទេ។
គួរបញ្ជាក់ថា ប្រទេសមីយ៉ាន់ម៉ាបានធ្លាក់ចូលក្នុងភាពច្របូកច្របល់ គិតចាប់តាំងពីក្រុមយោធាបានដណ្ដើមយកអំណាចទៅគ្រប់គ្រង កាលពីថ្ងៃទី១ ខែកុម្ភៈ និងបានផ្តួលរំលំរដ្ឋាភិបាលជាប់ឆ្នោតរបស់លោកស្រី អ៊ុងសាន ស៊ូជី ដែលបង្កឱ្យមានជាបាតុកម្មកើតឡើងជាញឹកញាប់នៅក្នុងប្រទេស ក្នុងនោះ ជនស៊ីវិលជាង១ ០០០នាក់ក៏ត្រូវបានសម្លាប់នៅក្នុងការបង្ក្រាបកូដកម្មនិងបាតុកម្មនានាផងដែរ។