រដ្ឋមន្ត្រីការបរទេសអូស្ត្រាលី លោកស្រី ម៉ារីស ផេន (Marise PAYNE) នឹងមកបំពេញទស្សនកិច្ចជាផ្លូវការនៅកម្ពុជា ចាប់ពីថ្ងៃទី៧-៨ ខែវិច្ឆិកា ចុងសប្ដាហ៍នេះ។
យោងតាមសេចក្ដីប្រកាសរបស់ក្រសួងការបរទេសកម្ពុជា ឱ្យដឹងថា នៅក្នុងដំណើរទស្សនកិច្ចរយៈពេល២ថ្ងៃនៅកម្ពុជានេះ លោកស្រី ម៉ារីស ផេន រដ្ឋមន្ត្រីការបរទេស និងជារដ្ឋមន្ត្រីកិច្ចការនារីអូស្ត្រាលី នឹងជួបជាមួយលោកនាយករដ្ឋមន្ត្រី ហ៊ុន សែន និងជំនួបទ្វេភាគីជាមួយរដ្ឋមន្ត្រីការបរទេសកម្ពុជា លោក ប្រាក់ សុខុន។
ក្រសួងបន្តថា ជំនួបទ្វេភាគីនេះនឹងពិភាក្សាលើកិច្ចសហប្រតិបត្តិការទ្វេភាគីក្នុងវិស័យនានា ក៏ដូចជាបញ្ហាតំបន់និងអន្តរជាតិដែលជាចំណាប់អារម្មណ៍និងកង្វល់រួម និងរួមទាំងបញ្ហាកម្ពុជាធ្វើជាប្រធានអាស៊ាននៅឆ្នាំ២០២២ផងដែរ។
ក្រៅពីជំនួបខាងលើនេះ រដ្ឋមន្ត្រីការបរទេសនិងកិច្ចការនារីអូស្ត្រាលី នឹងអញ្ជើញទៅទស្សនាអង្គការកម្ពុជាដើម្បីជួយស្ត្រីមានវិបត្តិ ជាមួយរដ្ឋមន្ត្រីក្រសួងកិច្ចការនារីកម្ពុជា លោកស្រី អ៊ឹង កន្ថាផាវី។
កាលពីថ្ងៃទី៨ ខែតុលា រដ្ឋមន្ត្រីការបរទេសកម្ពុជា លោក ប្រាក់ សុខុន និងរដ្ឋមន្ត្រីការបរទេសអូស្ត្រាលី លោកស្រី ម៉ារីស ផេន ក៏បានជួបគ្នាតាមរយៈខ្សែទូរសព្ទផងដែរ។
រដ្ឋមន្ត្រីក្រសួងការបរទេសកម្ពុជា លោក ប្រាក់ សុខុន បានសរសេរនៅលើទំព័រហ្វេសប៊ុករបស់លោកថា ជំនួបកាលណោះ បានពិភាក្សាគ្នាអំពីបញ្ហាមួយចំនួន រួមទាំងភាពជាដៃគូសន្តិសុខត្រីភាគីរវាងអូស្ត្រាលី ចក្រភពអង់គ្លេស និងសហរដ្ឋអាមេរិក ដែលហៅថា «AUKUS»។
កាលណោះ លោកស្រីបានប្រាប់ភាគីកម្ពុជាថា ការបង្កើតសម្ព័ន្ធភាពយោធាអាមេរិក អង់គ្លេស និងអូស្ត្រាលី (AUKUS) ក្នុងគោលបំណងលើកកម្ពស់សន្តិភាពនិងសន្តិសុខនៅក្នុងតំបន់ឥណ្ឌូ-ប៉ាស៊ីហ្វិកតែប៉ុណ្ណោះ ហើយថា AUKUS នឹងគោរពមជ្ឈភាពរបស់អាស៊ាន និងទស្សនវិស័យរបស់អាស៊ានស្តីពីឥណ្ឌូ-ប៉ាស៊ីហ្វិក៕