អនុប្រធានទី១នៃរដ្ឋសភា លោក ងួន ញ៉ិល បានទទួលមរណភាពនៅម៉ោង១០និង៣៦នាទីព្រឹក ថ្ងៃទី៥ ខែវិច្ឆិកានេះ ក្នុងជន្មាយុ៧៩ឆ្នាំ ដោយរោគាពាធ។
យោងតាមសេចក្ដីជូនដំណឹងរបស់រដ្ឋសភា សពរបស់លោក ងួន ញ៉ិល ត្រូវបានតម្កល់ធ្វើបុណ្យទក្ខិណានុប្បទានតាមប្រពៃណីពុទ្ធសាសនា នៅគេហដ្ឋាននៃសព នៅភូមិអូរអណ្ដូង សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ។
លោក ងួន ញ៉ិល គឺជាតំណាងរាស្ត្រខេត្តកំពង់ធំ និងជាអនុប្រធានទី១ នៃរដ្ឋសភា។ លោកកើតនៅថ្ងៃទី២២ ខែធ្នូ ឆ្នាំ១៩៤២ នៅភូមិត្រពាំងជ្រៃ ឃុំបល្ល័ង្ក ស្រុកបារាយណ៍ ខេត្តកំពង់ធំ ហើយបច្ចុប្បន្នលោកមានទីលំនៅនៅសង្កាត់ព្រែកប្រា ខណ្ឌច្បារអំពៅ។ លោកមានកូនចំនួន៦នាក់។
ក្រៅពីតំណែងជាអនុប្រធានទី១នៃរដ្ឋសភា លោកក៏ធ្លាប់ជារដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ចន្លោះពីឆ្នាំ១៩៨៩ ដល់ឆ្នាំ១៩៩៣។
តំណាងរាស្ត្រខេត្តកំពង់ស្ពឺ និងជាកូនប្រុសរបស់លោកនាយករដ្ឋមន្ត្រី ហ៊ុន សែន គឺលោក ហ៊ុន ម៉ានី បានសរសេរសាររំលែកទុក្ខនៅលើទំព័រហ្វេសប៊ុករបស់លោក ដោយបានចាត់ទុកការបាត់បង់លោក ងួន ញ៉ិល ថាជាការបាត់បង់នូវឥស្សរជនឆ្នើមមួយរូបរបស់កម្ពុជា ដែលកន្លងមក លោកបានលះបង់កម្លាំងកាយចិត្ត ប្រាជ្ញា ស្មារតី និងវីរភាពអង់អាច ក្នុងការបំពេញកិច្ចការជូនប្រទេសជាតិនិងប្រជាជនកម្ពុជា៕