ប្រភពស្និទ្ធនឹងនាយករដ្ឋមន្ត្រីប្រទេសស៊ូដង់ លោក Abdalla Hamdok បានឱ្យដឹងនៅថ្ងៃព្រហស្បតិ៍ម្សិលមិញថា ការពិភាក្សានានារវាងនាយករដ្ឋមន្ត្រីរបស់ខ្លួន និងមេដឹកនាំនៃរដ្ឋប្រហារយោធា កាលពីថ្ងៃទី២៥ ខែតុលា កំពុងតែដំណើរការទៅមុខ ស្របពេលដែលសហរដ្ឋអាមេរិក និងអង្គការសហប្រជាជាតិ បានដាក់សម្ពាធឱ្យមានជាដំណោះស្រាយលើបញ្ហានេះ។
ប្រភពមួយផ្សេងទៀតបានបន្ថែមថា ស៊ូដង់អាចនឹងបង្កើតក្រុមប្រឹក្សាអធិបតេយ្យថ្មីមួយដែលមានសមាជិកចំនួន១៤រូបក្នុងពេលឆាប់ៗនេះ ក្នុងជំហានដំបូងដោយយោធា ឆ្ពោះទៅរកការបង្កើតស្ថាប័នអន្តរកាលថ្មី។
ជាសញ្ញាចុងក្រោយនៃការបង្កើនសម្ពាធអន្តរជាតិ អគ្គលេខាធិការអង្គការសហប្រជាជាតិ លោក Antonio Guterres បានថ្លែងទៅកាន់មេបញ្ជាការយោធាប្រទេសស៊ូដង់ លោកឧត្ដមសេនីយ៍ Abdel-Fattah Burhan នៅថ្ងៃព្រហស្បតិ៍ ដោយបានជំរុញឱ្យមេបញ្ជាការយោធារូបនេះស្ដារឡើងវិញនូវសណ្ដាប់ធ្នាប់រដ្ឋធម្មនុញ្ញ និងដំណើរការអន្តរកាល។
ជាមួយគ្នានេះ ក្នុងកិច្ចសន្ទនាតាមទូរសព្ទជាមួយរដ្ឋមន្ត្រីការបរទេសអាមេរិក លោក Antony Blinken ក្នុងថ្ងៃព្រហស្បតិ៍ដដែល លោក Abdel-Fattah Burhan ក៏បានយល់ព្រមលើតម្រូវការក្នុងការពន្លឿនដើម្បីបង្កើតរដ្ឋាភិបាលថ្មីមួយផងដែរ។
ទីភ្នាក់ងារសារព័ត៌មាន Reuters បានស្រង់ការលើកឡើងរបស់ការិយាល័យលោក Abdel-Fattah Burhan យកមកចុះផ្សាយថា៖ «ភាគីទាំង២ បានឯកភាពគ្នាលើភាពចាំបាច់ក្នុងការរក្សាឱ្យបាននូវមាគ៌ានៃការផ្លាស់ប្ដូរប្រកបដោយប្រជាធិបតេយ្យ តម្រូវការក្នុងការបំពេញរចនាសម្ព័ន្ធនៃរដ្ឋាភិបាលអន្តរកាល និងជំរុញការបង្កើតរដ្ឋាភិបាល»។
យោងតាមក្រសួងការបរទេសសហរដ្ឋអាមេរិក បានបន្ថែមថា នៅក្នុងការអំពាវនាវរបស់លោក Antony Blinken នេះ ក៏បានជំរុញឱ្យលោក Abdel-Fattah Burhan ដោះលែងភ្លាមៗនូវឥស្សរជននយោបាយទាំងអស់ដែលត្រូវបានឃុំខ្លួនចាប់តាំងពីរដ្ឋប្រហារ ត្រលប់ទៅរកការសន្ទនាដោយអនុញ្ញាតឱ្យលោក Abdalla Hamdok ចូលទៅកាន់កាប់តំណែងវិញ និងស្ដារអភិបាលកិច្ចដែលដឹកនាំដោយជនស៊ីវិលនៅស៊ូដង់។
ទាក់ទិននឹងករណីនេះ អង្គការសហប្រជាជាតិ ក៏បាននិងកំពុងព្យាយាមសម្រុះសម្រួល ដើម្បីបញ្ចប់វិបត្តិនយោបាយដែលកើតឡើងក្រោយរដ្ឋប្រហារនៅក្នុងប្រទេសស៊ូដង់ផងដែរ ខណៈដែលអ្នកនយោបាយស៊ីវិលកំពូលមួយចំនួនត្រូវបានឃុំខ្លួន ហើយលោក Abdalla Hamdok ក៏ត្រូវបានកងកម្លាំងយោធាដាក់នៅក្រោមការឃុំខ្លួននៅក្នុងផ្ទះផងដែរ៕
